Pagpalambo sing Interes sa mga Pagduaw Liwat
1 Ang ministeryo ginapaanggid sa pagpanguma, kag ang mga pagduaw liwat ginapaanggid sa paghabok kag pagbunyag. (Mat. 13:23; Luc. 10:2; 2 Cor. 9:10) Subong “mga masigkamanugpangabudlay sang Dios,” obligasyon naton nga buligan ang bisan anong bag-o lang manugdo nga binhi sa pagtubo nga mangin gulang kag mangin mabungahon. (1 Cor. 3:6, 9) Paano naton ini mahimo sing labing maayo?
2 Mangin maabtik sa paghimo sing mga pagduaw liwat. Repasuha ang imo house-to-house records, kag pamat-uri kon ano ang hambalan, pasad sa ginhambalan ninyo sa nahauna nga pagduaw. Maayo pirme nga gamiton ang Biblia, nagakilala sa gahom sini sa paglab-ot sang tagipusuon.—Heb. 4:12.
3 Kon nabilin mo ang brosyur nga “Nagaulikid Gid Bala ang Dios sa Aton?,” mahimo ka magasugod paagi sa pagsiling sing kaangay sini:
◼ “Madamo nga tawo ang nagapati nga laglagon sang Dios ang duta, samtang ang iban nahadlok nga basi himuon mismo ina sang tawo. Ano sa banta mo? [Pasabta sia.] Ginasugiran kita sang Biblia nga sa baylo nga laglagon ang duta, dulaon sang Dios sa sini ang pagkadimatarong, nagahimo sini nga isa ka duog nga may paghidait kag kalig-unan.” Buksi ang pahina 22, kag basaha ang Hulubaton 2:21, 22, nga ginbalikwat didto. Ipaathag ang kahimusan sa pagtuon sang Biblia sa puluy-an.
4 Kon napahamtang mo ang “Toloka” nga brosyur, mahimo ka makasiling:
◼ “Sang nagligad nga pagduaw ko, ginbasa naton ang nahanungod sa saad sang Dios nga himuon nga bag-o ang tanan nga butang. Kita kag ang aton mga hinigugma mahimo makaagom sini nga pagpakamaayo paagi sa pagtuon sing dugang pa nahanungod sa kabubut-on sang Dios kag kon paano ini iaplikar sa aton kabuhi.” Basaha ang Juan 17:3, kag nian buksi ang mga parapo 52 kag 53 sa pahina 27.
5 Kon nagatatap sang napahamtang nga “Katuyuan sang Kabuhi” nga brosyur sa isa ka relihioso nga tawo, ayhan masapwan mo nga nagakaigo ang magsiling:
◼ “Walay duhaduha nga madamong bes nga ginsulit-sulit mo ang pangamuyo sang Ginuo. Ano ang nagasulod sa imo hunahuna kon ginapangabay mo nga magkari ang Ginharian sang Dios?” Pagkatapos makasabat ang tagbalay, patuhuyi ang mga parapo 8 kag 9 sa pahina 26, kag nian basaha ang Daniel 2:44. Ipaathag nga ang pagkari sang Ginharian sang Dios magakahulugan sang pagtapos sa kalautan kag pag-antos.
6 Dumduma nga sarang maduaw liwat ang bisan sin-o nga handa sa pagpamati, may napahamtang man nga literatura ukon wala. Tinguhi nga mag-iskedyul sing pila ka tion kada semana para sa mga pagduaw liwat. Kabay nga pakamaayuhon ni Jehova ang imo makugi nga panikasog nga makapatubas sing bunga sa iya kadayawan.—Juan 15:8.