Karon Na ang Tion
1 Sang ginsulat ni apostol Pablo ang iya ikaduha nga sulat sa mga taga-Corinto, ginpahanumdom niya sila nga nangako sila nga maghimo sing isa ka maayong buhat para sa ila masigkatumuluo sa Jerusalem. Apang, isa na ka tuig ang nagligad, kag wala pa nila gihapon matapos ang ila ginsugdan nga hilikuton. Gani ginsugo niya sila: “Lakat kag tapusa ini: mangin handa sa pagtapos sa inyo ginbuko subong sang pagbaton ninyo sa sini.”—2 Cor. 8:11, The New English Bible.
2 Sang isa ukon pila ka tion, kita tanan nagpahamtang sang mga tulumuron sa aton kaugalingon. Mahimo nga namat-od kita nga pauswagon ang aton pagpakigbahin sa ministeryo sa latagon, kilalahon sing suod pa ang aton mga kauturan, makalipikar para sa isa ka pribilehiyo sa pag-alagad, ukon sa paglandas sa pila ka kaluyahon. Bisan nga nagsugod kita upod ang maayo nga mga katuyuan, mahimo nga wala kita magpadayon agod malab-ot ang aton tulumuron. Antes kita makamulalong, senemana, binulan, ukon tinuig na ang nagligad nga wala kita sing nahimuan nga bisan anong pag-uswag. Kinahanglan ayhan nga iaplikar naton sa aton kaugalingon ang laygay nga “lakat kag tapusa” kon ano ang aton nasugdan?
3 Paglab-ot sang Aton mga Tulumuron: Mahapos lamang ang maghimo sang isa ka personal nga pangako apang mas mabudlay ang maglab-ot sang aton tulumuron. Ang pagpabuyanbuyan sarang makasablag sing bisan anong pag-uswag. Dapat kita mangin determinado nga magpadayon nga walay pagpalantang. Importante ang magtalana sang ginakinahanglan nga tion agod tapuson ang hilikuton. Maayo ang magtalana sang isa ka tion nga tapuson ang buluhaton kag pat-uron nga matuman ini.
4 Kon ginabudlayan kita sa paglab-ot sang aton mga tulumuron, mahapos ang mamalibad: ‘Himuon ko ini dugay-dugay.’ Apang wala kita makahibalo kon ano ang matabo sa palaabuton. Si disipulo Santiago nagpaandam: “Wala ninyo mahibalui kon ano ang sa buwas. . . . Ang bisan sin-o nga nakahibalo sang maayo buhaton kag wala nagabuhat sini, sa iya ini sala.”—Sant. 4:13-17.
5 Bangod sang madamo nga tublag subong man ang mga ginapangayo sang iban, ang aton mga tulumuron madali nga mapatumbayaan. Kinahanglan ang maayo nga panikasog agod mahuptan ini nga lab-as sa hunahuna. Ang pagsambit sang amo nga butang sa aton mga pangamuyo mabuligon. Ang pagpangabay sa iban sa pagpahanumdom kag pagpalig-on sa aton mahimo makabulig. Ang pagbutang sing tanda sa aton kalendaryo makapahanumdom sa aton nga usisaon ang aton pag-uswag. Dapat mamat-od ang isa nga ‘himuon kon ano ang ginatuyo sang iya tagipusuon.’—2 Cor. 9:7.
6 Ang bulan sang Oktubre nagaaman sang maayo nga kahigayunan sa pagtuon sang igtalupangod sa aton mga tulumuron. Magatanyag kita sang mga suskripsion sang Ang Lalantawan kag Magmata! Mahimo bala kita makapahamtang sang rasonable nga mga tulumuron nga lalab-uton? Ano abi kon tinguhaan naton nga pauswagon ang kadamuon sang aton ginapahamtang nga mga magasin? Ang pagpamat-od sa paghimo sang mga pagduaw liwat kag sa pagsugod sang isa ka bag-o nga pagtuon sa Biblia makatarunganon nga mga tulumuron para sa madamo.
7 Indi maalamon ang dipagsapak sa kon ano ang importante, sanglit ining “kalibutan nagataliwan.” (1 Juan 2:17) Matigayon naton karon ang pinasahi nga mga pribilehiyo sa pag-alagad. Depende sa aton kon himuslan naton ini.