Pagsunod sa Aton Huwaran Subong mga Manugdala sing Kapawa
1 Si Jesus nagsiling: “Ako ang kapawa sang kalibutan.” Paagi sa pagsunod sa iya halimbawa, ang mga disipulo man ni Jesus nangin mga “kapawa sang kalibutan.” (Mat. 5:14) Nagsiling si Jesus nga ang tanan nga magasunod sa iya magapanag-iya sing “kapawa sang kabuhi.”—Juan 8:12.
2 Ang organisasyon ni Jehova nagahanas sa aton nga mangin epektibo nga mga manugdala sing kapawa. Kon ginasunod naton sing maayo ang panuytoy nga ginabaton naton, mahimo naton mapasanagan ang tanan nga sahi sang mga tawo. (1 Tim. 4:6) Indi lamang ang pagsugid sang kamatuoran sa tagsa ka kahigayunan kundi ang paghupot man sing maayong pagginawi ang nadalahig sa pag-alagad subong mga manugdala sing kapawa. Ang pagginawi sang aton Huwaran indi mamulay. Subong mga sumulunod niya, dapat naton ipakita nga ang Cristianismo amo ang aton adlaw-adlaw nga dalanon sang kabuhi. (Efe. 5:9; Tito 2:7, 8, 10) Dapat kita magpatubas sing maayong mga buhat nga makita sang iban, nga nagapahulag sa ila sa paghimaya sa Dios.—Mat. 5:16.
3 Ang isa ka Saksi makaeksperiensia sing dikinaandan nga pangabay samtang nagapamalaybalay. Malain gid ang pamatyag sang mag-asawa, apang kinahanglan nga madeposito nila ang kuwarta sa banko. Nangabay sila kon mahimo ini madeposito sang Saksi. Nagpasugot sia kag ginhatagan sing $2,000 agod dalhon sa banko! Sang magbalik sia, namangkot sia: “Paano ninyo ako ginsaligan nga wala pa gani ninyo ako makilal-i?” Ang sabat: “Nahibaluan namon, kag nahibaluan sang tanan, nga mga Saksi ni Jehova lamang ang mahimo nga masaligan.” Daw ano gid ang aton pagpasalamat nga ang pagsunod naton sa moral nga mga prinsipio sang Biblia nagapatubas sinang maayong mga buhat!
4 Ang isa ka maestra sa Grade 1 nagpaathag sa iya klase kon ngaa ang anom ka tuig nga estudyante nga Saksi wala nagapakigbahin sa pagkolor sa mga larawan sa Halloween. Ang maestra nagsiling nga ginpabugal niya sia bangod sang iya kaisog nga mangin tuhay. Kon may malig-on kita nga ginapatihan, siling sang maestra, dapat naton ini pangapinan sing maisugon. Sadto nga gab-i gin-usisa sang maestra ang iya kaugalingon nga mga pagtuluuhan kag ginbaton nga wala sia nagpakita sing kaanggid nga kaisog sa pagpangapin sa iya malig-on nga pagtuo. Pagkadason nga adlaw ginpahibalo niya nga indi na niya pagpaentrahon ang iya klase sa bisan anong mga selebrasyon, kay sia mismo wala nagapati sa iban sini!
5 Ang katawhan ni Jehova nalangkag sa pagpaiwag sang ila kapawa, bisan diin man sila. Ang huwaran nga pagginawi sang mga kabataan sa eskwelahan gindayaw sang mga kabutho kag mga manunudlo. Bangod sang maayo nga pagginawi sang hamtong nga mga Saksi sa kasilingan, ang iban may maayo nga reaksion sa mensahe sang Ginharian. Ang dipormal nga pagpanaksi nagaganyat sa sinsero nga mga tawo sa pagtuon sing dugang pa. Bisan ang aton pagkapisan kag pagkabunayag sa sekular nga palamugnan nagahatag sing panaksi.
6 Paagi sa pagsunod sing suod sa aton Huwaran, padayon naton nga mahimpit ang aton mga ikasarang subong mga disipulo niya. Ang pag-ilog sa iya halimbawa magapat-od nga ang aton kapawa “magaiwag sa tanan.”—Mat. 5:15; 1 Ped. 2:21.