Magpadayon sa Pagpamulong sang Kamatuoran
1 Ang mga apostoles nagsiling: “Indi kami mahimo mag-untat sa pagpamulong nahanungod sa mga butang nga amon nakita kag nabatian.” (Binu. 4:20) Madamo kita karon sing mga literatura sa Biblia nga magamit sa aton ministeryo, apang dapat man kita magpadayon sa pagpamulong sang kamatuoran. Yari ang pila ka paagi sa paghimo sini samtang ginaduaw naton liwat ang mga nagbaton sang ulihi nga mga guwa.
2 Kon nagaduaw liwat sa napahamtangan sing pinasahi nga Abril nga “Magmata!” sa topiko sini nga “Ang Tion nga Wala Na sing mga Inaway,” mahimo ka makasiling:
◼ “Ginhambalan naton sang nagligad ang nahanungod sa mga inaway kag ang bahin sang relihion sa sini. Nahangpan mo bala nga inang mga hitabo nagapamatuod nga nagakabuhi kita sa katapusan nga mga adlaw? [Ipakita ang Ihibalo nga libro. Basaha ang nahaunang parapo sang kapitulo 11, kag ipakita ang kahon sa pahina 102.] Ginapaathag sining libro ining tema kag ang 18 pa nga nalista diri sa mga kaundan. [Ipakita ang pahina 3.] Luyag ko ipasundayag sa imo kon paano ka mabuligan sining libro.” Kon ginpahanugutan, sugdi ang pagtuon sa pahina 6.
3 Kon ginhambalan ninyo ang tuhoy sa malig-on nga pagkabuhi sa Mayo 15 nga “Lalantawan” sa imo nahauna nga pagduaw, mahimo nimo masiling ang subong sini:
◼ “Sadtong una naton nga paghambalanay, ginbasa naton ang teksto gikan sa Biblia nga nagahatag sa aton sing paglaum para sa palaabuton. Luyag ko karon ipaathag kon sin-o ang makahatag sa aton sing balatyagon nga may kalig-unan karon mismo.” Basaha ang Salmo 4:8. Buksi ang Ihibalo nga libro sa pahina 168 kag basaha ang parapo 19. Nian mamangkot: “Luyag mo bala ang wala bayad nga pagtuon sang Biblia sa puluy-an agod masapwan ining sahi sang kalig-unan sa imo kabuhi?” Kon huo ang sabat, buksi ang kapitulo 1.
4 Kon ginhambalan ninyo ang Mayo 22 nga “Awake!” tuhoy sa pag-abyanay sa imo nahaunang pagduaw, mahimo nimo masiling ang masunod sa imo pagduaw liwat:
◼ “Sang nagligad ginhambalan naton kon paano naton matigayon ang maayong mga abyan. Apang ano ang matabo kon magautwas ang mga dipaghangpanay? Magatapos bala ini sang pag-abyanay? [Pasabta sia.] Sa artikulo nga ginhambalan naton sang nagligad nga semana, may isa ka seksion tuhoy sa ‘When Problems Arise.’ Mahimo mo bala makuha ang imo kopya?” Hambali sa malip-ot ang artikulo kag basaha ang Efeso 4:26. Nian idul-ong ang paghambalanay sa Ihibalo nga libro, ayhan nagagamit sang mga punto sa pahina 166.
5 Mahimo nimo matanyag sing direkta ang isa ka pagtuon sa pagduaw liwat paagi sa pagsiling:
◼ “Ginapanagtag namon ang amon mga magasin agod sugiran ang mga tawo nahanungod sa kon ano ang ginatudlo sang Biblia. Kon ginaapresyar sang mga tawo ang ila natun-an, nagatanyag kami sing wala bayad nga pagtuon sang Biblia sa puluy-an. [Patuhuyi ang kahon ‘Abiabihon Mo Bala ang Isa ka Pagduaw?’ sa likod nga panghapin sang Ang Lalantawan.] Ginagamit namon ining libro, Ang Ihibalo nga Nagadul-ong sa Kabuhi nga Walay Katapusan, subong giya. Tuguti ako nga ipakita sa imo kon paano ginahimo ang isa ka pagtuon.”
6 Kon magpadayon kita sa pagpamulong sang kamatuoran, makapat-od kita nga may pila nga magapamati kag magapanghikot sing kalahamut-an.—Mar. 4:20.