Ang Ihibalo Gikan Sa Dios Nagasabat Sang Madamong Pamangkot
1 Antes mo matigayon ang sibu nga ihibalo sang kamatuoran, ayhan may madamo ikaw nga pamangkot tuhoy sa kabuhi nga indi mo masabat. Daw ano gid ang imo kalipay nga makabaton sing pasad-sa-Biblia nga mga sabat sa sadtong mga pamangkot! Karon mabuligan mo na ang iban sa pagpangita sadto man nga mga sabat. (Ipaanggid ang 2 Timoteo 2:2.) Mapaambit mo sa ila ang ihibalo sang Dios nga nagadul-ong sa kabuhi nga walay katapusan. (Juan 17:3) Apang paano mo mabuligan ang isa nga maapresyar ang balor sini nga ihibalo? Ti, dumduma ang mga pamangkot nga ginsabat sang kamatuoran para sa imo. Ano ang luyag mahibaluan sinang mga nagapangita sing kamatuoran? Ang pagdumdom sini makabulig sa imo sa pagtanyag sing libro nga Ang Ihibalo nga Nagadul-ong sa Kabuhi nga Walay Katapusan. Ang masunod nga mga panugda mahimo makabulig sa imo kon nagahanda sa pagpanaksi sa Hunyo.
2 Sanglit madamo nga tawo ang nagapalibog kon ngaa tuman kadamo ang pag-antos sa kalibutan, ining paagi mahimo makatigayon sing maayo nga sabat:
◼ “Kon may matabo nga kinaugali nga kalamidad ukon kon ang krimen kag kasingki nagadugang, ang mga tawo masami nagapamangkot kon ngaa nagakatabo ining makakulugmat nga mga butang. Ano ang isabat mo?” Pasabta sia kag pasalamati sia sa sabat niya. Nian buksi ang kapitulo 8 sang Ihibalo nga libro, kag ipatalupangod ang ginasiling sa parapo 2. Ipaathag nga ginahatag sini nga libro ang sabat sang Biblia kon ngaa nagakatabo ang malain nga mga butang kag magsiling: “Luyag ko ibilin sa imo ini nga libro sa manubo lamang nga kontribusyon.” Nian maghimo sing kahimusan sa pagbalik agod mapadayon ang inyo paghambalanay.
3 Kon nagabalik sa imo napahamtangan sing “Ihibalo” nga libro, makasiling ka:
◼ “Interesado ako sa imo opinyon tuhoy sa kon ngaa tuman kadamo ang pag-antos sa kalibutan. Nagaugyon ka bala sa sabat sang Biblia subong sang ginpaathag sa libro?” Pasabta sia. Basaha ang parapo 17 sa pahina 77 sang Ihibalo nga libro, kag basaha ang Roma 9:14 gikan sa Biblia sang tagbalay. Nian magsiling: “Ang maayong balita amo nga ang Dios wala nagahatag sa aton sing kasakit kag pag-antos. Nagsaad sia nga hatagan niya kita sing kabuhi nga walay katapusan nga may paghidait kag kalipay. Ang nahaunang kapitulo sini nga libro ginatig-uluhan ‘Mahimo Mangin Malipayon ang Imo Palaabuton!’ Luyag ko ipaathag sa imo kon paano ina mangin matuod para sa imo kag sa imo mga hinigugma.” Buksi ang kapitulo 1, kag ipasundayag ang aton metodo sa pagtuon. Tuptupi ang madamo nga bahin sang kapitulo kon nagakabagay sa kahimtangan.
4 Ayhan pakamaayuhon mo nga gamiton ang introduksion sa pahina 14 sang “Reasoning” nga libro, sa ubos sang tig-ulo “Old Age/Death”:
◼ “Nakapamangkot ka na bala: ‘Kamatayon gid bala ang katapusan sang tanan? Ukon may iban pa bala nga butang pagkatapos mapatay?’ [Pasabta sia.] Ginasabat sang Biblia ang aton bisan ano man nga pamangkot tuhoy sa kamatayon. [Basaha ang Manugwali 9:5, 10.] Ginapakita man sini nga may matuod nga paglaum para sa mga may pagtuo. [Buksi ang parapo 13 sa pahina 84 sa Ihibalo nga libro; basaha kag ipaathag ang ginsiling ni Jesus sa Juan 11:25.] Ining bug-os nga kapitulo ginhugod sa pagsabat sa pamangkot, Ano ang nagakatabo sa aton napatay nga mga hinigugma? Kon luyag mo ini mabasa, sarang ko mabilin sa imo ining kopya sa manubo lamang nga kontribusyon.”
5 Kon nagaduaw liwat, mahimo nimo mapahanumdom ang tagbalay tuhoy sa imo nagligad nga pagduaw kag nian magsiling:
◼ “Sang nagligad ginhambalan naton ang tuhoy sa kon ano ang nagakatabo kon ang isa ka tawo mapatay. Madamo ang nagapati nga ang kabuhi sa pihak nga kamatayon mahimo nga sa langit ukon sa impierno. Apang nahunahuna mo na bala ang posibilidad nga mabuhi liwat ang mga patay diri mismo sa duta? [Pasabta sia.] Suno sa Biblia, ang mga pagabanhawon ginalakip sa mga mahagop nga magapanubli sang duta. [Basaha ang Salmo 37:11, 29, nian ipaathag ang parapo 20 sa pahina 88 sang Ihibalo nga libro.] Ina nga paglaum naglugpay sa minilyon ka tawo nga nagakabuhi nga may kahadlok sa kamatayon. Ining libro magabulig sa imo nga mahangpan ini sing mas maayo. Mahimo ko bala mapasundayag kon paano?”
6 Kon gusto mo ang simple nga presentasyon, mahimo nimo ini tilawan:
◼ “Luyag ko ipakita sa imo ang isa ka ilustrasyon sa sining libro, Ang Ihibalo nga Nagadul-ong sa Kabuhi nga Walay Katapusan. Indi bala ini isa ka matahom nga laragway?” Buksi ang libro agod makita sang tagbalay ang pahina 4-5. Pasabta sia. Nian basaha ang ginasiling sa pahina 5. Maghinakop paagi sa pagsiling: “Mahimo nimo matigayon ining libro agod imo ini mabasa. May manubo lamang nga kontribusyon sa pagtabon sa mga gasto sa pag-imprinta.” Hibalua kon san-o ang kombeniente nga tion sa pagbalik agod masundan ang interes nga ginpakita.
7 May ihibalo kita gikan sa Dios nga nagasabat sang importante nga mga pamangkot sa kabuhi. Maghanda sing makugi, kag pakamaayuhon ni Jehova ang imo mga panikasog sa pagpaambit sining nagahatag-sing-kabuhi nga impormasyon upod sa mga nagapangita sing kamatuoran.