Pagpalapnag sa Ihibalo nga Nagadul-ong sa Kabuhi nga Walay Katapusan
1 Si Jehova amo “ang Isa nga nagatudlo sa mga tawo sing ihibalo.” (Sal. 94:10) Ginagamit niya kita sa pagpalapnag sa nagaluwas-kabuhi nga ihibalo tuhoy sa iya sa mga wala makahibalo kon paano mag-alagad sa iya sing kalahamut-an. Ang libro nga Ang Ihibalo nga Nagadul-ong sa Kabuhi nga Walay Katapusan isa ka maayong instrumento sa pagtudlo agod buligan ang mga bunayag sing tagipusuon nga makaagom sing sibu nga ihibalo sang kamatuoran. (1 Tim. 2:3, 4) Ang maathag kag makatarunganon nga pagpaathag sang Ihibalo nga libro sa kamatuoran magabulig sa mga tawo nga mahangpan kon ano ang ginatudlo ni Jehova sa ila. Sini nga bulan luyag naton masugilanon ang mga tawo sa paagi nga magapahulag sa ila nga basahon ang libro. Yari ang pila ka panugda. Tinguhai nga ipabutyag ini sa imo kaugalingon nga mga tinaga kag natural nga paagi sang pagpakigsugilanon.
2 Sanglit ang kalabanan nga mga tawo mahimo nga namatyan sing isa ka hinigugma, mahimo nimo mabinagbinag ang paglaum nga pagkabanhaw paagi sa pagsiling anay sing subong sini:
◼ “Ang kalabanan sa aton namatyan sing isa ka hinigugma. Napaligban na bala naton kon bala makita pa naton sia liwat? [Pasabta sia.] Ang kamatayon indi bahin sang orihinal nga katuyuan sang Dios para sa tawo. Ginpamatud-an ni Jesus nga ang aton mga hinigugma sarang maluwas gikan sa kamatayon. [Basaha ang Juan 11:11, 25, 44.] Ginapakita sini kon ano ang ginsaad sang Dios nga himuon para sa aton. [Buksi ang Ihibalo nga libro sa larawan sa pahina 85 kag basaha ang kapsion. Nian ipakita ang larawan sa pahina 86 kag kumentuhi ini.] Kon luyag mo makabasa sing dugang pa nahanungod sining paglaum sang pagkabanhaw, nalipay ako sa pagbilin sini nga libro sa imo.”
3 Pagkatapos sang nahaunang paghambalanay nahanungod sa paglaum nga pagkabanhaw, mahimo nimo masugdan ang masunod nga pagsugilanunay sa amo gihapon nga tawo sa sining paagi:
◼ “Ayhan madumduman mo ang ginsiling ko nga ang kamatayon indi bahin sang orihinal nga katuyuan sang Dios para sa tawo. Kon amo, ngaa nagatigulang kita kag nagakapatay? Ang pila ka bao nagakabuhi sing kapin sa 100 ka tuig, kag may mga kahoy nga nagapamuhi sing linibo ka tuig. Ngaa ang tawo nagakabuhi lamang sing 70 ukon 80 ka tuig? [Pasabta sia.] Nagakapatay kita bangod ginlapas sang nahaunang tawhanon nga mag-asawa ang Dios.” Basaha ang Roma 5:12. Buksi ang pahina 53 sang Ihibalo nga libro kag basaha ang titulo sang kapitulo. Binagbinaga ang nahaunang tatlo ka parapo, ginapakita ang mga sabat sa gin-imprinta nga mga pamangkot. Maghimo sing kahimusan sa pagbalik agod hambalan ang nabilin nga bahin sang kapitulo.
4 Kon nagapakighambal ka sa isa ka tawo nga daw relihioso, mahimo ka makasiling:
◼ “May ginatos ka lainlain nga mga relihion karon. Nagatudlo sila sing madamong nagasumpakilay nga mga pagtuluuhan. Ang iban nga mga tawo nagasiling nga ang tanan nga relihion maayo kag indi importante kon ano ang aton ginatuuhan. Ano ang imo opinyon? [Pasabta sia.] Gintudlo ni Jesus ang matuod nga relihion kag ginpakita nga ang iban nga mga porma sang pagsimba indi kalahamut-an sa Dios. [Basaha ang Mateo 7:21-23.] Kon luyag naton pahamut-an ang Dios, dapat naton sia simbahon suno sa iya kabubut-on.” Buksi ang Ihibalo nga libro sa pahina 5, basaha ang titulo kag ang pila sang mga subtitulo. Itanyag sa iya ang libro.
5 Ang mga tawo nga naligban bangod sang madamong relihion mahimo magaapresyar sang sabat sa sining pamangkot sa imo pagduaw liwat:
◼ “Bangod sang madamong lainlain nga mga relihion nga nagaluntad sa karon, paano naton mahibaluan kon diin ang matuod? Paano mo mahibaluan kon diin nga relihion ang husto? [Pasabta sia.] Ginsugid ni Jesus sa aton kon paano naton makilala ang iya matuod nga mga sumulunod.” Basaha ang Juan 13:35. Binagbinaga ang mga parapo 18 kag 19 sa kapitulo 5 sang Ihibalo nga libro. Ipakita nga paagi sa paggamit sining Makasulatanhon nga mga panuytoy, makilala sang isa ang matuod nga relihion. Isaysay kon paano nakilal-an ang mga Saksi ni Jehova sa bug-os nga kalibutan tungod sang ila matuod nga gugma kag mataas nga mga talaksan sa moral. Ipaathag kon paano ang pagtuon sa Biblia, nga nagagamit sang Ihibalo nga libro, maathag nga magapakilala sang porma sang pagsimba nga ginakahamut-an sang Dios.
6 Kon isa ka ginikanan ang masugilanon mo, ini nga paagi mahimo mangin epektibo:
◼ “Kada adlaw, makabati kita sing mga report nahanungod sa dimasaway nga pagginawi sang mga pamatan-on nga daw wala sing bisan ano man nga mga talaksan sa moral. Ginabasol sang iban ang mga eskwelahan bangod sang indi pagtudlo sa mga kabataan kon ano ang husto kag sala. Sin-o sa banta mo ang dapat maghatag sining paghanas? [Pasabta sia.] Pamatii ang ginasiling sang Biblia sa sining pamangkot. [Basaha ang Efeso 6:4.] Nagasugid ini sa aton nga ang pagpatudok sa mga talaksan sa moral sa mga kabataan katungdanan sang mga ginikanan.” Buksi ang Ihibalo nga libro sa pahina 145, basaha ang parapo 16, kag kumentuhi ang mga larawan sa pahina 147. Ipaathag nga ang libro gindesinyo para tun-an sang bug-os nga pamilya. Nagagamit sang mga parapo 17 kag 18 sa pahina 146, magpanugda nga ipasundayag kon paano naton ginahimo ina nga pagtuon upod sa mga pamilya.
7 Kon nakasugod ka sing pagtuon upod sa isa ka nabalaka nga ginikanan sa nahauna nga pagduaw, mahimo nimo ini mapadayon sa pagduaw liwat paagi sa pagsiling:
◼ “Madamong pagsulay sa aton mga pamatan-on ang ginahatag sang karon nga kalibutan. Bangod sini, mabudlay para sa ila ang mangin mahinadlukon sa Dios samtang nagadaku sila. Ayhan madumduman mo nga sang nagligad nga paghambalanay naton, ginhambalan naton ang duha ka prinsipio. Subong diosnon nga mga ginikanan, dapat kita magpahamtang sing maayong halimbawa para sa aton kabataan, kag mag-aman sing dalayon nga mga pagpakita sang aton gugma sa ila. May isa pa ka butang nga ginasiling ang Biblia nga ginakinahanglan sang kabataan gikan sa ila mga ginikanan.” Basaha ang Hulubaton 1:8. Buksi ang pahina 148 sa Ihibalo nga libro kag padayuna ang pagtuon, nagatuptop sang mga pahina 19-23. Magpanugda nga magabalik ka liwat sa pagtuon upod sa bug-os nga pamilya, sugod sa kapitulo 1.