Magsalig Kay Jehova Sa Pagpatubo
1 “Sa nahaunang tion nabatyagan ko ang tumalagsahon nga kalipay nga makabulig sa pagtukod sing isa ka kongregasyon. Nagkinahanglan ini sing duha ka tuig sang makugi nga pagpangabudlay, dalayon nga pagpangamuyo, kag pagsalig kay Jehova nga ‘nagapatubo [sini].’ ” Amo sini ang ginsulat sang isa ka mapisan nga payunir nga nakatuon sa pagsalig kay Jehova para sa pagtubo. (1 Cor. 3:5-9) Sa pagpangita naton sa mga tawo nga nahuyog sa espirituwal, nagakinahanglan man kita sing pagsakdag sang Dios agod ang aton ministeryo magapamunga.—Hulu. 3:5, 6.
2 Ang Pagtubo Nagakinahanglan sing Pagkultibar: Ang binhi sang kamatuoran dapat kultibahon agod magtubo ini. Ang pagduaw liwat sa sulod sang isa ukon duha ka adlaw pagkatapos sang nahaunang pagduaw masunson nga nagapatubas sing maayong mga resulta. Mangin mainit kag mainabyanon. Buligi sia nga mangin komportable. Indi pagsoloha ang tanan nga paghambal. Tuguti sia nga makilala ka, kag ipakita nga interesado ka sa iya subong isa ka tawo.
3 Sa Agosto, padayunon naton ang pagtanyag sing nanuhaytuhay nga mga brosyur sa mga tawo nga masugilanon naton. Apang, dapat man naton tatapon ang mga interesado nga nasalapuan kag ang mga napahamtangan. Sarang naton ini mahimo paagi sa paghimo sing mga pagduaw liwat kag pagtanyag sing mga pagtuon sa Biblia. (Mat. 28:19, 20) Bangod sini, ang Ginapatuman nga brosyur mahimo magamit sa pagsugod sing mga pagtuon. Mahimo nimo masapwan ang masunod nga apat ka panugda nga mabuligon.
4 Kon nasugilanon mo ang isa nga nabalaka sa nagalain nga mga kahimtangan sa kalibutan, mahimo nimo liwat masugdan ang paghambalanay paagi sa pagsiling:
◼ “Nagapati ako nga, kaangay ko, nabalaka man ikaw sa pagkalusod sang moralidad sa katilingban sang tawo. Makabati kita sing makapahanusbo nga mga balita tuhoy sa kasingki sa balay, nga nagaresulta sa pag-abuso sa mga kabataan, mga ginikanan, kag mga tiayon. Kag daw subong bala nga madamong tawo ang nagabutig ukon nagapangawat agod lamang mapaayawan ang ila kaugalingon nga mga luyag. Sa banta mo, importante gid bala sa Dios kon paano nagakabuhi ang mga tawo? [Pasabta sia.] Ang Dios naghimo sing pat-od nga mga talaksan para sundon sang tawo, kag indi ini makapabug-at sa aton.” Basaha ang 1 Juan 5:3. Nian itanyag ang Ginapatuman nga brosyur, kag buksi ini sa leksion 10. Basaha ang nahaunang parapo. Ipakita ang nagahilay nga mga dinalan kag mga tinaga sa pamuno sang parapo 2-6, kag pamangkuta ang tagbalay kon ano nga buhat, sa banta niya, ang labing makahalalit sa sosiedad. Basaha ang may kaangtanan nga parapo kag tan-awa ang isa ukon duha ka kasulatan kon ginatugot sang kahigayunan. Maghinakop paagi sa pagbasa sa parapo 7, kag nian maghimo sing mga kahimusan nga makaduaw liwat para sa dugang nga paghambalanay.
5 Para sa mga nasugilanon mo nga nabalaka tuhoy sa ila pamilya, mahimo nimo masiling ang subong sini:
◼ “Nagahunahuna ka bala nga makatarunganon nga paabuton nga ang Manunuga magahatag sa aton sing mga galamiton nga kinahanglan naton agod makatukod sing isa ka madinalag-on nga pagkabuhi sang pamilya?” Pasabta sia. Itanyag ang Ginapatuman nga brosyur, buksi ang leksion 8, kag ipaathag nga nagaunod ini sing mga prinsipio gikan sa Biblia para sa kada katapo sang pamilya. Ipasundayag kon paano gamiton ang brosyur upod sang Biblia agod matigayon ang labing daku nga kapuslanan gikan sa sini. Sunda ang mga instruksion nga masapwan sa pahina 2 sang brosyur. Maghimo sing mga kahimusan nga makaduaw liwat agod mapadayon ang pagtuon sa leksion, ukon kon matapos mo ini, agod matun-an ang isa pa ka leksion nga napili sang tagbalay sa brosyur.
6 Yari ang direkta nga paagi nga mahimo nimo magamit sa pagtanyag sang aton programa sang pagtuon sa Biblia. Ipakita ang “Ginapatuman” nga brosyur, kag magsiling:
◼ “Ining brosyur nagaunod sing kompleto nga kurso sa pagtuon, nga nagatuptop sa sadsaran nga mga panudlo sang Biblia. Sa tagsa ka pahina, masapwan mo ang mga sabat sa mga pamangkot nga nagapalibog sa mga tawo sa sulod sang mga siglo. Halimbawa, Ano ang katuyuan sang Dios para sa duta?” Buksi ang leksion 5, kag basaha ang mga pamangkot sa pamuno sang leksion. Pamangkuta ang tagbalay kon diin ang nagawili gid sa iya, kag nian basaha ang katumbas nga (mga) parapo, nga ginatan-aw ang nagakaigo nga mga kasulatan. Ipaathag nga ang makaalayaw nga mga sabat sa iban pa nga mga pamangkot madali man makita subong sang pamangkot nga ginbinagbinag. Magpanugda nga magabalik ka liwat agod hambalan ang isa pa ka pamangkot kag sabat.
7 Ukon ayhan pakamaayuhon mo nga tilawan ang isa ka simple nga paagi sa pagsugod sing pagtuon sa Biblia paagi sa pagsiling:
◼ “Nakahibalo ka bala nga paagi sa paghinguyang sing pila lamang ka minuto, masapwan mo ang sabat sa isa ka importante nga pamangkot sa Biblia? Halimbawa, . . .” Nian hinambiti ang pamangkot nga makita sa pamuno sang isa sa mga leksion sa brosyur, ang isa nga sa banta mo magawili sa indibiduwal. Para sa pila ka ideya sang mga pamangkot nga mahimo nimo magamit, tan-awa ang mga parapo 15 kag 16 sang suplemento sang Marso 1997 nga Ang Aton Ministeryo sa Ginharian, nga natig-uluhan: “Magtipon sing Kasidla sa Paghimo sing mga Pagduaw Liwat.”
8 Ang pagbaton sing malipayon sa hangkat nga maghimo sing mga pagduaw liwat kag magdumala sing mga pagtuon sa Biblia bahin sang pagkamangin “masigkamanugpangabudlay” sang Dios. (1 Cor. 3:9) Samtang nagapangabudlay kita sing lakas sa pagkultibar sa interes nga nasalapuan kag nian nagasalig kay Jehova sa pagpatubo sini, magaagom kita sing daku nga kaayawan nga indi mahatag sang iban pa nga hilikuton.