Ang Biblia​—⁠Ang Panuytoy Sang Dios Para sa Tanan nga Katawhan

1 Mga apat ka bilyon (4,000,000,000) ka Biblia ang naimprinta sa kapin sa 2,100 ka hambal kag dialekto, busa ang Pulong sang Dios matigayon sang kapin sa 90 porsiento sang populasyon sang duta. Apang, may yara tiggulutom sa kalibutan “para sa pagpamati sa mga pulong ni Jehova.” (Amos 8:11) Madamo nga tawo nga may kopya sang Biblia ang wala nagabasa sini ukon wala makahangop sang mga kaundan sini. Paano naton sila mapahulag nga gamiton ang Biblia subong isa ka praktikal nga panuytoy sa ila kabuhi?

2 Sa Disiembre itanyag naton ang libro nga The Bible​—⁠god’s Word Or Man’s? Kon may interesado, mahimo man naton matanyag ang badbad sang biblia nga nakabulig sa aton sa nagligad nga 47 ka tuig​—⁠ang New World Translation. Sarang ini mahimo paagi sa pagpakita sang maathag kag moderno nga pamulong sini. (Tan-awa ang “All Scripture” nga libro, pahina 328, parapo 6.) Ipasundayag naton ang aton hanuot nga apresasyon sa sining dulot gikan kay Jehova paagi sa mapagsik nga pagbulig sa iban nga batunon ang Biblia subong ang panuytoy sang Dios para sa tanan nga katawhan.

³ Sarang ninyo masugdan ang presentasyon paagi sa paggamit sing tract nga “Kon Ngaa Imo Masaligan ang Biblia.” Ayhan makasiling kamo:

◼ “Walay sapayan nga ang Biblia matigayon sang kapin sa 90 porsiento sang populasyon sang kalibutan, diutay lamang nga tawo ang nagabasa sini sing regular. Ano bala sa banta mo ang rason?” Basaha ang nahaunang duha ka parapo sang tract, kag ang 2 Timoteo 3:⁠16. Itanyag ang God’s Word nga libro. Kon indi pagbatunon ang libro, pangabaya ang tagbalay nga basahon ang nabilin nga bahin sang tract. Ipadaku ang katapusan nga subtitulo, “Pagtagna sang Palaabuton.”

⁴ Kon magbalik sa mga tawo nga nabilinan sing tract nga “Kon Ngaa Imo Masaligan ang Biblia,” mahimo ninyo ini matilawan:

◼ Pagkatapos mapakilala liwat ang imo kaugalingon, basaha ang katapusan nga duha ka parapo sang tract. Pamangkuta ang tagbalay kon bala nabinagbinag na niya ang posibilidad nga magkabuhi sing dayon sa duta. Pagkatapos sia makasabat, magsiling: “Nakapat-od ang mga Saksi ni Jehova nga ang tanan nga tagna nga masapwan sa Biblia matuman, lakip na ang mga tagna tuhoy sa isa ka matahom nga palaabuton para sa tanan nga katawhan nga nagatuman sa mga sugo sang Dios.” Ipakita ang ilustrasyon sa pahina 13 sa Ginapatuman nga brosyur, baliki ang leksion 5, kag ipanugda nga binagbinagon ang mga sabat sa nalista nga mga pamangkot, busa nagasugod sing isa ka pagtuon.

⁵ Sa teritoryo diin relihioso ang mga tawo, mahimo ninyo tilawan ining una nga paagi:

◼ “Ginapalig-on namon ang daku pa nga pagtahod sa Biblia. Madamong pamilya ang may Biblia, apang talagsa lamang nila ini ginatan-aw kon may mabug-at sila nga mga problema. Natalupangdan mo bala ini? [Pasabta sia.] Ayhan nagapati sila nga ang Biblia karaan na. Ining libro, The Bible​—⁠God’s Word or Man’s?, nagahatag sing makakumbinsi nga pamatuod nga ang Biblia sibu sa siensia kag nagahatag ini sing praktikal nga mga solusyon sa mabudlay nga mga problema karon.” Ipadaku ang pila ka punto gikan sa kapitulo 8 ukon kapitulo 12 sang libro, kag nian itanyag ini.

⁶ Kon nagaduaw sa napahamtangan sing “God’s Word” nga libro, mahimo kamo makasiling:

◼ “Sang nagligad nga pagduaw ko sa imo, ginhambalan naton kon paano nagabulig ang Biblia sa paglubad sa masibod nga mga problema karon. Ang mga nagbaton sa sini subong ang Pulong sang Dios nabuligan man sa pagkabuhi sing mas malipayon, sing mas kontento. Luyag ko ipakita sa imo ang isa sa praktikal nga mga prinsipio sang Biblia nga ginapaathag sa libro nga ginbilin ko sa imo.” Ipaathag ang isa sa Makasulatanhon nga mga prinsipio nga masapwan sa parapo 12, parapo 3-6, kag maghinakop paagi sa pagbasa sang parapo 7. Kon interesado sia, magtanyag sing pagtuon sa Ihibalo nga libro ukon sa Ginapatuman nga brosyur.

⁷ Ang masunod nga presentasyon mahimo nga magapukaw sa gulang-gulang nga mga tawo:

◼ “May tion sadto anay nga ang Biblia ginabasa sa kalabanan nga puluy-an kag ang mga pamilya nagakabuhi suno sa mga prinsipio sini. Amo man bala sini anay sa inyo pamilya? [Pasabta sia.] Sa karon, madamo ang daw tuman na kasako sa paghinguyang sing tion sa pagbasa sing Biblia ukon nagahunahuna sila nga ang moral nga mga prinsipio sini karaan na. Ang kapitulo 13 sini nga libro, The Bible​—⁠God’s Word or Man’s?, nagahatag sing tatlo ka matuodtuod nga eksperiensia sang mga indibiduwal nga nakahimo sing maayo nga mga pagbag-o sa kabuhi pagkatapos makatuon sang Biblia. Kon luyag mo mabasa kon paano sila nabuligan sang gahom sang Pulong sang Dios, nalipay ako sa pagbilin sini nga libro sa imo.”

⁸ Sa pagduaw liwat, mahimo kamo makasiling:

◼ “Sang nagligad nga paghambalanay naton, gin-ugyunan naton nga ang moral nga mga prinsipio sang Biblia wala ginasapak sang karon nga katilingban. Dapat bala kita mabalaka sa sina nga dipagsapak? [Pasabta sia.] Ginpabaloran sing daku ni Jesucristo ang pagkuha sing ihibalo sa Biblia.” Basaha ang Juan 17:⁠3. Nian ipaathag ang parapo 5 sang kapitulo 1 sa Ihibalo nga libro. Ipaathag ang aton wala bayad nga programa sa pagtuon sa Biblia, kag magpanugda nga ipasundayag ini sa gilayon.

⁹ Ipangamuyo ninyo nga pakamaayuhon ni Jehova ang inyo tanan nga panikasog nga ipatalupangod ang Biblia​—⁠ang panuytoy sang Dios para sa tanan nga katawhan.