Kinahanglan—Dugang Pa nga mga Pagtuon sa Biblia
1 Si Jehova nga Dios nagapakamaayo sang iya dutan-on nga organisasyon sing padayon nga pagtubo. Sang nagligad nga tuig sa pag-alagad, 375,923 ang ginbawtismuhan sa bug-os nga kalibutan—ang promedyo nga kapin sa 1,000 ka bag-ong disipulo kada adlaw, ukon mga 43 kada oras! Sa nanuhaytuhay nga bahin sang kalibutan, ang hilikuton sang Ginharian nagasanyog kag naagom ang daku nga mga pag-uswag, walay sapayan sang dinikada nga kabudlayan nga gin-atubang sang aton mga kauturan. Makakulunyag nga basahon ang pag-uswag nga ginahimo sa pagpalapnag sing maayong balita!
2 Sa sanga sang Pilipinas sang nagligad nga tuig sang pag-alagad, nakita man naton ang mga pag-uswag sa promedyo nga kabug-usan nga mga manugbantala kag mga auxiliary payunir, sa mga oras nga ginhinguyang sa pagbantala, kag sa kadamuon sang mga bukleta, brosyur, kag magasin nga napahamtang. Nagdugang ang kadamuon sang nabawtismuhan kag may pinakamataas nga tumalambong sa Memoryal. Kamusta naman ang pagduaw liwat kag pagtuon sa Biblia nga hilikuton? Nagnubo ang aton kabilugan nga kadamuon sang mga pagduaw liwat kag may mga 5-porsiento nga pagnubo sa mga pagtuon sa Biblia. Apang, ining mga bahin sang ministeryo kinahanglanon sa paghimo sing mga disipulo. Ano ang himuon sang tagsatagsa sa aton agod mabaliskad ining pagnubo sa mga pagduaw liwat kag mga pagtuon sa Biblia?
3 Pabakura ang Handum nga Makadumala Sing Pagtuon: Kita mismo dapat magkonsentrar nga mangin mabakod kag aktibo sa espirituwal. Ang matuod nga mga sumulunod ni Cristo “makugi sa maayong mga buhat.” (Tito 2:14) Kon ginarepaso naton ang aton ministeryo, makasiling bala kita nga nalangkag gid kita sa pagtatap sa tanan nga napahamtangan sing literatura sa latagon? Mapagsik bala kita sa pagtanyag sing mga pagtuon sa Biblia sa puluy-an sa tanan nga nagapakita sing interes? (Roma 12:11) Ukon dapat bala naton palambuon ang daku pa nga handum sa paghimo sing mga pagduaw liwat kag sa pagsugod sing mga pagtuon sa Biblia sa puluy-an?
4 Ang personal nga pagbasa sing Biblia, tayuyon nga pagtambong sa mga miting, kag pagtuon sa mga publikasyon magahupot sa aton nga buhi sa espirituwal kag napapagsik sang espiritu sang Dios. (Efe. 3:16-19) Magapabakod ini sang aton pagtuo kag pagsalig kay Jehova kag sa aton gugma sa aton isigkatawo. Magapahulag ini sa aton nga itudlo ang kamatuoran sa iban, busa nagahimo sang aton ministeryo nga makawiwili, madinalag-on, kag makapapagsik. Huo, dapat nga luyag naton ang dugang pa nga mga pagtuon sa Biblia!
5 Magtuon Una Upod sa Pamilya: Ang Cristianong mga ginikanan nga may mga kabataan nga nagapuyo sa puluy-an dapat mangin mabinalak-on sa ila programa sang tayuyon nga pagtuon sang pamilya sa Biblia. (Deut. 31:12; Sal. 148:12, 13; Hulu. 22:6) Mapuslanon gid para sa mga ginikanan nga tun-an ang Ginapatuman nga brosyur kag nian ang Ihibalo nga libro upod sa ila kabataan sa paghanda sa ila nga makalipikar subong dibawtismado nga mga manugbantala kag makadedikar kag makapabawtismo. Sa pagkamatuod, mahimo binagbinagon ang dugang pa nga materyal, depende sa kinahanglanon kag edad sang bata. Mahimo isipon sang isa ka ginikanan nga nagatuon upod sa isa ka dibawtismado nga bata ang pagtuon, oras, kag mga pagduaw liwat, suno sa ginabalay sa “Pamangkot” sa Hunyo 1987 nga Ang Aton Ministeryo sa Ginharian.
6 Pauswaga ang Personal nga Organisasyon: Nagabinagbinag sa kadamuon sang mga magasin, brosyur, kag libro nga napahamtang, walay duhaduha nga madamo nga binhi ang ginasab-ug. Ining mga binhi sang kamatuoran nga ginsab-ug may daku nga posibilidad nga makapamunga sing bag-ong mga disipulo. Apang malipay gid bala ang isa ka mangunguma ukon hardinero kon pirme lang sia nagatanom kag, walay sapayan sang tanan niya nga panikasog, wala naman sing tion sa pagpangani? Indi. Sa kaanggid, ang ministeryo sa pagtatap kinahanglanon.
7 Tayuyon bala ikaw nga nagaiskedyul sing tion sa paghimo sing mga pagduaw liwat? Baliki gilayon ang tanan nga interes nga nasapwan. Maghimo sing mga pagduaw liwat upod ang tulumuron nga makasugod sing pagtuon sa Biblia. Nagahupot bala ikaw sing mahipid, suno-sa-tion, kag organisado sing maayo nga rekord sang imo mga pagduaw liwat? Lakip sa ngalan kag direksion sang tagbalay, pat-ura nga irekord ang petsa sang nahauna nga pagduaw, ang bisan ano nga napahamtang, ang malip-ot nga paglaragway sa kon ano ang ginhambalan, kag ang punto nga mahimo hambalan sa masunod nga pagduaw. Magbilin sing espasyo sa imo rekord para sa dugang pa nga impormasyon nga madugang pagkatapos sang tagsa ka pagduaw liwat.
8 Tun-i Kon Paano Maghimo Sing Pagduaw Liwat: Ano ang pila ka punto nga dumdumon kon nagaduaw liwat sa isa ka interesado? (1) Mangin mainit, mainabyanon, mapagsik, kag dipormal. (2) Hambali ang mga topiko ukon mga pamangkot nga nagawili sa iya. (3) Hupti nga simple, makawiwili, kag Makasulatanhon ang paghambalanay. (4) Sa tagsa ka pagduaw, panikasugi nga tudluan ang tagbalay sing butang nga makita niya nga may personal nga kabilihanan sa iya. (5) Palambua ang kalangkag sa topiko nga pagahambalan sa masunod nga pagduaw. (6) Indi magdugay. (7) Indi mamangkot sing butang nga mahuy-an ang tagbalay ukon maipit sia. (8) Mangin mahinantupon nga indi pakamalauton ang sayop nga mga pagtamod ukon malain nga mga batasan sang tagbalay antes mapalambo ang espirituwal nga apresasyon.—Tan-awa ang suplemento sang Marso 1997 nga Ang Aton Ministeryo sa Ginharian para sa dugang nga bulig sa kon paano mangin madinalag-on sa paghimo sing mga pagduaw liwat kag sa pagsugod sing mga pagtuon sa Biblia.
9 Tukiba ang Tanan nga Posibilidad: Sa isa ka kongregasyon, ang ngalan kag mga numero sang apartment sang tanan nga nagapuyo sa estrikto sing seguridad nga tinukod posible nga nakuha. Ang tagsa ka pumuluyo ginsulatan sing personal, kag duha ka tract ang ginlakip. Sa katapusan sang sulat, isa ka pagtuon sa Biblia sa puluy-an ang gintanyag kag ginlakip ang lokal nga numero sang telepono agod makasabat ang ginsulatan. Sa sulod sang pila ka adlaw, isa ka pamatan-on nga lalaki ang nanawag nga nagapangabay sing pagtuon. Ginduaw sia liwat pagkadason nga adlaw, kag natukod ang isa ka pagtuon sa Ihibalo nga libro. Sadto nga gab-i nagtambong sia sa Pagtinuon Sang Kongregasyon sa Libro, kag padayon sia nga nagtambong sa tanan nga miting. Sa gilayon, ginsugdan niya ang tayuyon nga adlaw-adlaw nga pagbasa sing Biblia. Nag-uswag sia padulong sa bawtismo.
10 Ang mga manugbantala sa isa ka grupo naghimo sing kahimusan sa paghimo sing mga pagduaw liwat sing mag-ululupod. Sang ginduaw sang isa ka utod nga babayi ang iya duluawon, ang tagbalay nga ginapangita niya wala sa balay, apang isa pa ka lamharon nga babayi ang nagguwa, nga nagasiling: “Madugay ko na kamo ginahulat.” Ang tagbalay nakabaton anay sing Ihibalo nga libro gikan sa isa ka kakilala. Sang nagduaw ang mga utod sa iya ganhaan, nabasa na niya ang libro sing duha ka beses kag nagdayaw gid sia sa impormasyon nga ginaunod sini. Nagsiling sia nga wala sia makibot nga makita ang mga Saksi nga nagduaw sa iya sadto nga adlaw bangod ginapangamuyo niya nga magkari sila kag magtuon sing Biblia upod sa iya. Isa ka pagtuon ang nasugdan, nagsugod sia sa pagtambong sa mga miting sa kongregasyon, kag madasig sia nga nag-uswag.
11 Ginhatagan sining karon lang sang isa ka utod nga babayi, nga halos 25 ka tuig na nga nabawtismuhan, ang iya iloy sing Ihibalo nga libro. Ginbasa sang iya iloy, nga katapo sang isa ka relihion, ang libro. Sang nabasa niya ang duha ka kapitulo, gintawag niya ang iya anak kag, sa kakibot sang anak, nagsiling: “Luyag ko mangin isa sang mga Saksi ni Jehova!” Ang iloy nagtuon kag karon nabawtismuhan na.
12 Tilawi Ining mga Panugda: Natilawan mo na bala ang direkta nga paagi sa pagsugod sing mga pagtuon? Mahimo ka lang magsiling: “Kon luyag mo ang walay bayad nga pagtuon sa Biblia sa puluy-an, mapakita ko sa sulod sang pila ka minuto kon paano ini ginahimo. Kon maluyagan mo ini, mahimo ka makapadayon.” Sang ginhimo ini, walay pangalag-ag nga ginbaton sang madamo nga tawo ang tanyag kag nakita ang isa ka pasundayag tuhoy sa pagtuon sa Biblia.
13 Antes sang pagtuon, ipakita sa estudyante kon paano maghanda sing abanse paagi sa pagbasa sa ginhinambitan nga mga kasulatan kag sa pagkurit sa yabi nga mga tinaga bilang sabat sa naimprinta nga mga pamangkot. Magkonsentrar lamang sa pangunang mga punto. Bisan nga mahimo kita mangin mapabisusibuon sa nahaunang pila ka sesyon, ang pagtuon sa Biblia dapat hiwaton sing tayuyon. Hunahunaa kon paano mo mapakilala ang pangamuyo subong kinahanglanon nga bahin sang pagtuon kag kon paano mo mahanda sing Makasulatanhon ang estudyante sa pagpamatok. Himua gid ang pagtuon nga makawiwili.
14 Sa pagkamatuod, indi palareho ang pag-uswag sang kada estudyante sa Biblia. Ang iban indi subong ka mahuyugon sa espirituwal sangsa iban ukon subong kaabtik sa paghangop sa mga butang nga ginatudlo. Ang iban tuman kasako kag mahimo nga indi makahinguyang sing tion nga kinahanglanon agod matuptupan ang bug-os nga kapitulo kada semana. Busa, sa pila ka hitabo ayhan kinahanglan ang kapin sa isa ka sesyon agod matuptupan ang pila ka kapitulo kag dugang pa nga binulan agod matapos ang libro. Sa pila ka hitabo mahimo naton anay tun-an ang Ginapatuman nga brosyur kag pagkatapos sina ang Ihibalo nga libro; sa iban naman, kon natapos na ang Ihibalo nga libro, ayhan nakita naton nga nagakaigo ang pagtuon sa Ginapatuman nga brosyur. Ini, dugang sa pagtambong nila sa mga miting sa kongregasyon, magabulig sa kada estudyante nga matigayon ang mapag-on nga sadsaran sa kamatuoran.
15 Labaw sa tanan, mangamuyo nga makatigayon sing pagtuon sa Biblia! (1 Juan 3:22) Ang isa sang labing makapaladya nga mga eksperiensia para sa isa ka Cristiano amo ang gamiton ni Jehova sa pagbulig sa isa nga mangin disipulo ni Jesucristo. (Binu. 20:35; 1 Cor. 3:6-9; 1 Tes. 2:8) Karon na ang tion sa pagpakita sing daku nga kakugi sa hilikuton nga pagtuon sa Biblia, nagasalig sing bug-os sa bugana nga pagpakamaayo ni Jehova sa aton mga panikasog nga makasugod sing madamo pa nga pagtuon!
[Blurb sa pahina 3]
Nagapangamuyo ka bala nga makasugod sing isa ka bag-ong pagtuon sa Biblia?