Ang mga Pagduaw Liwat Nagaresulta sa mga Pagtuon sa Biblia
1. Ngaa importante gid nga hilikuton ang pagduaw liwat?
1 Wala lamang ginsugo ni Jesus ang iya mga sumulunod nga magbantala kundi ‘maghimo man sing mga disipulo, nagatudlo sa ila.’ (Mat. 28:19, 20) Ang manugbantala nagabantala, apang labaw pa ang ginahimo sang manunudlo. Nagatudlo sia, nagapaathag, kag nagahatag sing pamatuod. Ang isa ka paagi nga matudluan naton ang iban amo ang pagduaw liwat sa mga interesado upod ang tulumuron nga makasugod sa ila sing mga pagtuon sa Biblia.
2. Sin-o ang dapat naton duawon liwat?
2 Sin-o ang dapat mo nga duawon liwat? Pat-ura nga mabalikan ang tanan nga nakabaton sang literatura ukon ang nagpakita sing bisan diutay lang nga interes sa maayong balita. Kon may nasapwan ka nga interesado samtang nagapanaksi sa publiko nga mga duog, tinguhai nga kuhaon ang direksion ukon numero sang telepono agod mapalambo ang interes. Mangin positibo tuhoy sa pagsugod sing mga pagtuon sa Biblia. Padayon nga pangitaa ang mga luyag magtuon sa Biblia, kag mahimo gid nga makita mo sila.—Mat. 10:11.
3, 4. Ano ang nalakip sa isa ka epektibo nga pagduaw liwat?
3 Magpakita Sing Personal nga Interes: Ang paghanda para sa epektibo nga pagduaw liwat nagasugod sa una nga pagduaw. Ang madinalag-on nga mga ebanghelisador nagapanilag kon ano ang nagapainteres sa tagbalay, kag ginagamit nila ini para sa dugang pa nga mga paghambalanay. Nasapwan sang pila nga mas maayo kon magbilin sing pamangkot antes maglakat agod mapukaw ang interes sang tagbalay para sa masunod nga pagduaw. Ang aton sinsero nga interes sa mga tawo nagapahulag sa aton nga panumdumon sila bisan nagbiya na kita sa tagbalay, kag nagapahulag ini sa aton nga duawon sila liwat gilayon. Kon posible, tinguhai nga magduaw liwat samtang daku pa ang interes—ayhan pagligad sing isa ukon duha ka adlaw.
4 Kon nagaduaw liwat, tinguhai nga padayunon ang inyo ginhambalan sang nagligad. Himua nga tulumuron nga makapaambit sing bisan isa lang ka teksto sa kada pagduaw, kag magpamati. Pangilalaha sing maayo ang tagbalay. Nian sa masunod nga mga pagduaw, ipaambit ang mga kamatuoran gikan sa Pulong sang Dios nga may kaangtanan gid sa iya mga ginakabalak-an.
5. Anong simple nga pagpalapit ang sarang magamit sa pagsugod sing mga pagtuon sa Biblia?
5 Mangin Mahunahunaon sa Pagsugod Sing Pagtuon sa Biblia: Maghimo sing mga pagduaw liwat upod ang tulumuron nga makasugod sing pagtuon sa Biblia. Paano ini himuon? Sambita nga luyag mo magpaambit sing isa ka talalupangdon nga punto, kag buksi ang isa ka parapo sang Ihibalo nga libro ukon Ginapatuman nga brosyur nga sa banta mo makaganyat sa tawo. Basaha ang parapo, binagbinaga ang pamangkot, kag hinun-anuni ang isa ukon duha ka ginsambit nga mga kasulatan. Sarang ini mahimo sa ganhaan sa lima tubtob napulo ka minuto. Maghinakop paagi sa pagpamangkot sang masunod nga pamangkot kag maghimo sing mga kahimusan agod padayunon ang paghambalanay sa masunod nga tion.
6. Paano naton mapakita nga ginaapresyar naton ang pagkaimportante sang mga pagduaw liwat?
6 Ang pagpalambo sang tanan nga interes nga aton masapwan isa ka importante nga bahin sang aton ministeryo. Busa, magpahamtang sing tion sa imo iskedyul kada semana para sa mga pagduaw liwat. Ang paghimo sini makadugang sang imo pagkaepektibo sa ministeryo kag makahatag sing matuod nga kalipay.