Pamangkot

◼ Ano ang himuon naton sa pagbulig nga mapauswag ang pagkaepektibo sang aton mga miting?

Ang iban ayhan nagahunahuna nga salabton lamang sang mga gulang kag sang ministeryal nga mga alagad ang kadalag-an sang mga miting sa kongregasyon bangod sila ang nagadumala kag nagahatag sang kalabanan nga mga bahin. Matuod, kita tanan mahimo makabulig sing personal agod mangin makawiwili kag mapuslanon ang mga miting. Mahimo kita makabulig nga mangin mas epektibo ang mga miting sa masunod nga napulo ka paagi:

Maghanda sing abanse. Kon maghanda kita sing maayo, ang mga miting mangin makawiwili sa aton. Kon kita tanan nagahimo sini, ang mga miting mangin mas mapagsik kag mas makapalig-on. Magtambong sing tayuyon. Ang madamo nga tumalambong labi nga nagapalig-on sa tanan nga nagatambong, nagapabakod sang aton pagpabalor sa pagkaimportante sang pagtambong. Mag-abot sa husto nga oras. Kon nagalingkod na sa wala pa magsugod ang programa, makabuylog kita sa nagabukas nga ambahanon kag pangamuyo kag busa makabenepisyo sing bug-os gikan sa miting. Magtambong nga nasangkapan sing maayo. Paagi sa pagdala sang aton Biblia kag (mga) publikasyon nga ginagamit sa miting, masundan naton kag mahangpan sing maayo pa ang ginahambalan. Likawi ang mga tublag. Makapamati kita sing mas maayo kon maglingkod kita sa atubangan. Ang paghutikay kag masunson nga pagkadto sa kasilyas makadula sang konsentrasyon naton kag sang iban. Makigbahin. Kon mas madamo sa aton ang nagabayaw sang aton mga kamot kag nagakomento, mas madamo ang mapalig-on kag mapabakod sa aton mga ekspresyon sang pagtuo. Magkomento sing malip-ot. Nagahatag ini sa madamo sing kahigayunan nga makapakigbahin. Dapat naton ituon ang aton malip-ot nga mga komento sa materyal nga ginatun-an. Ihatag ang mga bahin. Subong mga estudyante sa Teokratikong Eskwelahan sa Pagministro ukon subong mga may bahin sa Miting sa Serbisyo, maghanda sing maayo, mag-ensayo sing abanse, kag manikasog nga mahatag ang imo bahin. Hatagi sing komendasyon ang mga may bahin. Sugiri ang iban kon daw ano ka daku nga ginaapresyar ang ila mga panikasog. Nagapabakod ini sa ila kag nagapahulag sa ila nga himuon ang maayo pa sa ulihi. Maglinig-unay. Ang maayo nga mga panamyaw kag makapalig-on nga mga paghambalanay, antes kag pagkatapos sang mga miting, nagadugang sa kalipay kag mga benepisyo nga maagom naton gikan sa pagtambong sa mga miting.