“Nasangkapan Sing Bug-os Para sa Tagsa ka Maayong Buhat”
1 Ang katawhan ni Jehova sa karon ginapakamaayo sing bugana nga espirituwal nga pagkaon. (Isa. 25:6) Tuman kadamo nga Makasulatanhon nga materyal ang mahimuslan paagi sa personal kag pamilya nga pagtuon kag sa mga miting sa kongregasyon, mga asambleya, kag mga kombension. Apang ginahimuslan bala naton ini tanan sa tuyo nga “may lubos nga ikasarang, nga nasangkapan sing bug-os para sa tagsa ka maayong buhat”?—2 Tim. 3:17.
2 Hunahunaa lamang ang espirituwal nga menu para sa tuig 1998, nga katunga na ang nagligad! Paagi sa semanal nga mga miting sa kongregasyon, ginatuptupan naton ang pila sa talalupangdon nga mga punto sa 23 ka tulun-an sang Cristianong Griegong Kasulatan, ginarepaso ang impormasyon gikan sa Insight on the Scriptures nahanungod sa kabuhi sang 49 ka karakter sa Biblia, kag ginabinagbinag ang 138 ka pahina sang Proclaimers nga libro. Ginarepaso man naton ang ikatlo nga bahin sang Ihibalo nga libro, halos ang bug-os nga Kalipay sa Pamilya nga libro, kag ang bug-os nga God’s Word nga libro. Dugang pa, ginapakaon kita paagi sa 12 ka guwa sang Ang Aton Ministeryo sa Ginharian, 52 ka artikulo nga tulun-an sa Lalantawan, kag halos subong man kadamo nga mga pamulongpulong publiko sa nanuhaytuhay nga mga tema sa Biblia. Dugang sa sini tanan amo ang dagaya nga mga programa sa kombension kag asambleya. Bugana gid nga espirituwal nga maayong butang ang ginaaman sa aton!
3 Pasalamati ang mga Aman ni Jehova: Agod makapanginpulos sing bug-os, dapat naton mahangpan kon ngaa nagaaman si Jehova sing subong sina nga espirituwal nga kabuganaan. Ang pagkaon sa sining maayo nga mga butang nagapabakod sang aton pagtuo kag nagapalig-on sang aton kaangtanan sa iya. (1 Tim. 4:6) Apang, ang espirituwal nga pagkaon wala gin-aman para tudluan lamang kita. Nagapahulag ini sa aton nga ipaambit ang kamatuoran sa iban kag nagasangkap sa aton nga mangin epektibo sa paghimo sini subong mga ministro sang maayong balita.—2 Tim. 4:5.
4 Indi naton pagpatumbayaan ang aton espirituwal nga mga kinahanglanon, kundi pirme palambuon ang kahidlaw sa bugana kag makaalayaw sa espirituwal nga mga aman gikan sa latok ni Jehova. (Mat. 5:3; 1 Ped. 2:2) Agod makapanginpulos sing bug-os, dapat kita magpain sing nagakaigo nga tion para sa importante nga mga butang subong sang tayuyon nga personal kag pamilya nga pagtuon sa Biblia kag sang pagtambong sa mga miting. (Efe. 5:15, 16) Ang makalilipay nga mga padya sa paghimo sini nagahisanto sa inspirado nga laygay nga ginsulat ni Pablo sa matutom nga Hebreong mga Cristiano, suno sa Hebreo 13:20, 21.