Pagpanaksi sa “Tanan nga Sahi Sang Tawo”
1 Kon nagapakigsugilanon kita sa mga tawo nga may lainlain nga kultura ukon relihion, ginadumdom naton nga ang kabubut-on ni Jehova amo nga “ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Tim. 2:4) Dugang sa madamong ginhanda sing pinasahi nga mga bukleta kag mga brosyur, may yara kita duha ka maayong publikasyon nga sarang magamit sa bisan anong tion sa pagbulig sa mga indibiduwal nga wala gintudluan sang ila relihion sing kamatuoran tuhoy sa Dios kag kay Cristo.
2 Ang libro nga Mankind’s Search for God nagapaathag sa ginhalinan sang dalagku nga mga relihion sang kalibutan kag busa mahimo makabulig sa mga tawo bisan diin sa pagpaanggid sang ila mga pagtuluuhan sa kon ano ang ginatudlo sang Biblia sa lamang matuod nga Dios. Sa pihak nga bahin, paagi sa pagpatalupangod sa kabuhi ni Jesucristo, Ang Pinakabantog nga Tawo nga Nagkabuhi makabulig sa isa ka tawo nga makilala sing maayo ang Anak sang Dios kag mapasuod sa iya, kaangay sang madamo nga tawo sang unang siglo. (Juan 12:32) Kon nagakaigo, ayhan luyag mo tilawan ang masunod nga mga panugda sa pagtanyag sini nga mga libro.
3 Kon ginahunahuna mo nga nagakaigo itanyag ang “Pinakabantog nga Tawo” nga libro sa isa ka tawo, mahimo ka mamangkot:
◼ “Ano ang madumduman mo kon mahunahuna mo si Jesucristo? [Pasabta sia.] Madamong istoryador ang nagakilala kay Jesus subong ang pinakabantog nga tawo nga nagkabuhi. [Magbalikwat sing halimbawa gikan sa introduksion sang Pinakabantog nga Tawo nga libro.] Ginapakita sang Biblia nga ang kabuhi ni Jesus isa ka huwaran para sa aton nga ilugon.” Basaha ang 1 Pedro 2:21 kag ang nahaunang parapo sa katapusan nga pahina sang introduksion sang Pinakabantog nga Tawo nga libro. Kon ang tagbalay interesado makahibalo tuhoy kay Jesus, itanyag ang libro. Antes ka maghalin, basaha ang Juan 17:3 kag mamangkot, “Paano kita makakuha sini nga ihibalo nga nagadul-ong sa kabuhi nga walay katapusan?” Maghimo sing pat-od nga kahimusan nga makabalik agod masabat ina.
4 Kon magbalik ka agod ipaathag kon paano makakuha sing nagahatag-kabuhi nga ihibalo, mahimo ka makasiling:
◼ “Nangako ako nga magbalik agod ipakita sa imo kon paano kita makakuha sing ihibalo nga nagadul-ong sa kabuhi nga walay katapusan.” Ipakita ang Ihibalo nga libro, kag nagagamit sang nahauna nga kapitulo, ipasundayag ang isa ka pagtuon.
5 Kon luyag mo itanyag ang “Mankind’s Search for God,” mahimo ka mamangkot:
◼ “Bangod sang tuman kadamo nga lainlain nga relihion sa karon, napaligban mo na bala kon paano naton mahibaluan kon diin ang isa nga ginakahamut-an sang Dios?” Pagkatapos sia makasabat, buksi ang Mankind’s Search for God nga libro sa pahina 377. Ipatalupangod ang pangunang punto sa numero 7, kag mamangkot kon bala nagaugyon ang tagbalay nga dapat mahiusa sang matuod nga relihion ang tanan nga rasa sang katawhan. Buksi ang isa sa mga ginhinambitan nga mga kasulatan, kag kon may tion pa, ipaathag ang pila sang iban pa nga mga punto sa listahan. Kon interesado gid sia, itanyag ang libro. Sa paghalin, mahimo ka mamangkot, “Paano dapat maapektuhan sang matuod nga relihion ang paggawi sang isa ka tawo?” Maghimo sing kahimusan para sa isa ka pagduaw liwat agod masabat ang pamangkot.
6 Kon magbalik ka agod ipaathag kon paano maapektuhan sang matuod nga relihion ang kabuhi sang isa ka tawo, mahimo ka mamangkot:
◼ “Paano sa banta mo dapat maapektuhan sang relihion ang paggawi sang tawo? [Pasabta sia.] Si Cristo naghatag sa aton sing talaksan nga paagi sa sini ang relihion dapat takson.” Basaha ang Mateo 7:17-20 sing direkta gikan sa pahina 12 sang Mankind’s Search for God nga libro. Nian agdaha ang tagbalay nga basahon ang parapo 20 sa pahina 13-14. Kon may tion pa, ipaathag ang parapo 25-9 sa pahina 16-18. Mahimo ini magdul-ong sa pagtuon sa Ginapatuman nga brosyur ukon sa Ihibalo nga libro.
7 Mga Bulig sa Pag-umpisa Sang Paghambalanay: May yara madamong bulig sa pagpanudlo sa Mankind’s Search for God nga libro, nga mahimo magamit subong mga bulig sa pag-umpisa sang paghambalanay sa una nga pagduaw ukon sa pagduaw liwat. Mahimo nimo sugdan ang paghambalanay paagi sa pagpamangkot lamang sing isa ka nagakaigo nga pamangkot. Halimbawa, talupangda ining mga pamangkot kag mga topiko kag ang mga pahina nga nagasabat sini (ginbadbad na sa Hiligaynon):
“Mga Pamangkot nga Nagakinahanglan Sing Sabat” —17-18.
“Si Jesus Bala Patupato Lamang?” —237.
“Sin-o ang Nagsulat Sang Biblia?” —241.
“Ang Qur’ān kag ang Biblia” —285.
“Pamatuod Sang Pagkamasaligan Sang Biblia” —340-1.
“Kon Ano ang Ginatuuhan Sang mga Saksi ni Jehova” —356-7.
“Kon Paano Makilala ang Matuod nga Relihion” —377.
8 Sarang mo mabuksan ang napili nga (mga) pahina sa Mankind’s Search for God nga libro kag mapaathag ang punto nga ginahambalan. Nian maghimo sing kahimusan para sa isa ka pagduaw liwat paagi sa paghatag sing may kaangtanan nga pamangkot nga sarang masabat gikan sa Ginapatuman nga brosyur ukon Ihibalo nga libro. Pat-ura nga agdahon ang tagbalay sa Miting Publiko, kag magbilin sing handbill.
9 Ang tanan nga sahi sang bunayag-sing-tagipusuon nga mga tawo nagapangita sing kamatuoran tuhoy sa Dios kag kay Cristo. Sarang naton sila mabuligan sa aton pagpanaksi nga hilikuton. Kon amo, padayon kita nga ‘mangabudlay sing lakas kag manikasog, bangod ginbutang naton ang aton paglaum sa buhi nga Dios, nga amo ang Manluluwas sang tanan nga sahi sang mga tawo.’—1 Tim. 4:10.