Ang Pagduaw nga Mahimo Mangin Pagpakamaayo
1 Malipayon nga ginbaton ni Zacheo si Jesus subong bisita sa iya puluy-an. Kag nangin daku gid nga pagpakamaayo yadto nga pagduaw!—Luc. 19:2-9.
2 Karon, subong Ulo sang kongregasyon, ginasugo ni Jesucristo ang mga gulang nga ‘bantayan ang panong sang Dios.’ (1 Ped. 5:2, 3; Juan 21:15-17) Dugang sa pagpanudlo sa mga miting kag sa pagpanguna sa pag-alagad sa latagon, ang mga manugtatap sang kongregasyon nagahatag sing mahigugmaon, personal nga bulig sa indibiduwal nga mga katapo sang kongregasyon. Busa, sa pulupanag-on, ayhan ginapaabot mo nga makabaton sing personal nga igtalupangod gikan sa mga gulang, sa imo man puluy-an, sa Kingdom Hall, samtang magkaupod nga nagaalagad sa latagon, ukon sa iban pa nga mga okasyon. Dapat mo bala kahadlukan ang mga pagduaw sang mga gulang? Indi gid. Kon nagaduaw sila sa imo, wala ini nagakahulugan nga nakahimo ka sing sala. Ano, kon amo, ang katuyuan sang isa ka pagduaw sa pagbantay?
3 Si Pablo nagsiling nga luyag niya duawon ang mga kauturan ‘agod tan-awon kon kamusta sila.’ (Binu. 15:36) Huo, subong mahigugmaon nga mga manugbantala, ang mga gulang interesado gid kaayo sa inyo kahimtangan. Luyag nila magbulig sa espirituwal nga mahimo nga mapuslanon kag makapalig-on sa imo. Ining personal nga pag-ulikid amo ang luyag sang aton mahigugmaon nga Manugbantay nga si Jehova nga matigayon sang tagsatagsa sa aton.—Ezeq. 34:11.
4 Abiabiha ang mga Pagduaw Sang mga Gulang: Ang tulumuron ni Pablo sa pagduaw sa iya mga kauturan amo ang ‘pagpaambit sa ila sang pila ka espirituwal nga mga hiyas agod mapalig-on sila, kag agod may pagbayluhanay sing pagpalig-on.’ (Roma 1:11, 12) Kita tanan nagakinahanglan sing espirituwal nga pagpalig-on sa sining mabudlay nga katapusan nga mga adlaw, kag kinahanglan naton ang bulig agod magpadayon nga malig-on sa pagtuo. Ang imo positibo nga pagbaton sa pagduaw sa pagbantay pat-od gid nga magaresulta sa maayo nga pagbayluhanay sing pagpalig-on.
5 Pasalamati ang madamong benepisyo nga matigayon gikan sa hilikuton sa pagbantay sang mga gulang. Kon may mga butang ukon pamangkot nga ginakabalak-an mo, dumduma nga ang mga gulang sa kongregasyon handa sa pagbulig. Indi mangalag-ag nga ipakighambal sa ila ang bisan ano nga butang nga mahimo makaapektar sa imo espirituwal nga kaayuhan. Pasalamati ining mahigugmaon nga kahimusan ni Jehova, kag magkalipay sa mga pagpakamaayo nga mahatag sini nga pagduaw.