Ang Aton mga Isigkatawo Kinahanglan Makabati Sing Maayong Balita
1 Kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Tim. 2:4) Ang “tanan nga sahi sang tawo” nagalakip sa aton tanan isigkatawo. Agod mapalab-utan sila sing maayong balita, dapat kita mangin mapasibusibuon sa aton mga presentasyon kag mabalaka sa kon ano ang mahimo mangin makawiwili sa tagsa ka tawo nga masugilanon naton. (1 Cor. 9:19-23) Ang organisasyon ni Jehova nag-aman sing mga galamiton nga makabulig sa aton nga malab-ot ang tagipusuon sadtong ‘nahuyog sing matarong sa kabuhi nga walay katapusan.’ (Binu. 13:48) Tan-awon naton kon paano naton magamit ang nanuhaytuhay nga mga brosyur sa Hulyo kag Agosto sa pagtalupangod sa espirituwal nga mga kinahanglanon sang aton mga isigkatawo.
2 Gamiton nga mga Brosyur: Makita sa ubos ang mga panugda nga mahimo makabulig kon nagatanyag sing mga brosyur. Ang tagsa ka panugda nagalakip sing (a) nagapahunahuna nga pamangkot sa pagsugod sing paghambalanay, (2) reperensia kon diin makita sa brosyur ang mga punto nga mahambalan, kag (3) nagakaigo nga kasulatan nga mabasa sa tion sang paghambalanay. Ang iban pa nga bahin sang presentasyon mahimo nimo himuon sa imo kaugalingon nga mga tinaga, suno sa reaksion sang tawo. Para sa kalabanan nga mga brosyur, ginasambit sang nagligad nga isyu sang Ang Aton Ministeryo sa Ginharian ang mas detalyado nga pagtanyag sing brosyur.
Nagaulikid Gid Bala ang Dios sa Aton?
Ano sa banta mo ang paglaum nga makabulig sa mga tawo nga nagaantos sing pag-abuso?—Pahina 27-8, parapo 23-7; Isa. 65:17, 18; km 7/97 p. 4.
Ano ang Katuyuan Sang Kabuhi?—Paano Mo Masapwan Ini?
Ngaa tuman kadamo nga tawo sa karon ang daw indi kontento sa ila kabuhi?—Pahina 29-30, parapo 2, 25-6; Sal. 145:16; km 7/96 p. 4.
Agoma ang Kabuhi sa Duta Sing Dayon!
Napaligban mo bala kon ano na karon ang ginahimo ni Jesucristo?—Mga larawan 41-2; Bug. 11:15; km 8/96 p. 8.
The Government That Will Bring Paradise.
Luyag mo bala mahibaluan ang tuhoy sa Ginharian nga gintudlo ni Jesus nga ipangamuyo naton?—Pahina 3; Mat. 6:9, 10; km 8/96 p. 8.
Kon ang Isa nga Ginahigugma Mo Mapatay.
Napaligban mo na bala kon paano lugpayan ang isa nga namatyan sing hinigugma?—Pahina 26, parapo 2-5; Juan 5:28, 29; km 7/97 p. 4.
Dapat Ka Bala Magpati sa Trinidad?
Ang aton bala paghangop sa matuod nga kinaiya sang Dios importante para sa aton palaabuton?—Pahina 3, parapo 3, 7-8; Juan 17:3.
3 Brosyur nga Makapabakod Sing Pagtuo sa Biblia: Sa “Pagtuo sa Pulong Sang Dios” nga Distrito nga mga Kombension sang nagligad nga Disiembre kag Enero, nakabaton kita sing bag-ong brosyur nga natig-uluhan Isa ka Libro Para sa Tanan nga Tawo. Sanglit wala pa naton matanyag ini nga brosyur sa pag-alagad sa latagon kutob sang ginpaguwa ini, ang kampanya sa Hulyo kag Agosto mangin maayo gid nga kahigayunan agod mapanagtag sing maayo ining bag-ong brosyur sa latagon. Sanglit bag-o ini, magaganyat ini sa mga nakabasa na sa aton nagligad nga mga brosyur kag maluyag makakuha sang aton tanan pinakabag-o nga mga publikasyon.
4 Ining bag-ong brosyur ginbalhag agod buligan ang mga tawo nga mahimo nga edukado apang diutay lamang ang nahibaluan tuhoy sa Biblia. Gindesinyo ini agod pahulagon sila nga usisaon ang Pulong sang Dios. Kon nagatanyag sini nga brosyur, ayhan luyag mo gamiton ang masunod nga panugda:
Isa ka Libro Para sa Tanan nga Tawo.
Nagaugyon ka bala nga ang pagtigayon sing masangkad nga edukasyon nagalakip sang pagkuha sing pila ka ihibalo sa kon ano ang kaundan sang Biblia?—Pahina 3, parapo 1-3 kag pahina 30, parapo 2; Manugw. 12:9, 10.
5 Brosyur sa Pagtuon sa Biblia: Ang aton tulumuron sa ministeryo amo pirme ang pagsugod sing isa ka pagtuon sa Biblia, ayhan sa una nga pagduaw ukon sa masunod nga pagduaw liwat. Bangod sina, may yara kita masunod mahapos-gamiton nga brosyur sa pagsugod kag sa pagdumala sing mga pagtuon sa Biblia sa puluy-an:
Ano ang Ginapatuman sang Dios sa Aton?
Nahibaluan mo bala nga sa 30 minutos ukon kubos kada semana sa sulod sang 16 ka semana, matigayon mo ang sadsaran nga paghangop sa Biblia?—Leksion 2, parapo 6; 2 Tim. 3:16, 17; km 3/97 p. 4.
6 Sa ilustrasyon tuhoy sa maluluy-on nga Samaritano, ginpaathag ni Jesus nga ang matuod nga isigkatawo amo ang isa nga nagapakita sing gugma kag kaayo sa pagbulig sa isa kag isa sa kasisit-an. (Luc. 10:27-37) Ang aton mga isigkatawo ginasit-an sa espirituwal. Dapat nila mabatian ang maayong balita. Abagahon naton ang responsabilidad nga ipaambit ini sa ila, busa nagapamatuod sang aton kaugalingon nga matuod nga mga disipulo ni Jesucristo.—Mat. 24:14; Gal. 5:14.