Bag-ong Programa sang Pinasahi nga Adlaw nga Asambleya

Ang aman tuhoy sa pinasahi nga mga adlaw nga asambleya nagsugod sang 1987. Ining isa ka adlaw nga pagtilipon nangin makapalig-on sa mga alagad ni Jehova kag sa mga interesado nga nagatambong. Sugod sa Pebrero, 1999, ang bag-ong programa sang pinasahi nga adlaw nga asambleya ihatag. Makita ninyo ang siam ka pamulongpulong kag madamo nga interbyu kag eksperiensia nga mapuslanon sa espirituwal.

“Ipakita ang Tinagipusuon nga Pagpabalor sa Latok ni Jehova” amo ang tema sang bag-ong programa. (Isa. 65:​14; 1 Cor. 10:21) Magapabakod ini sa aton pamat-od nga ang aton pagsimba kay Jehova amo dapat ang una sa aton kabuhi. (Sal. 27:4) Ang bahin sang manugtatap sa sirkito nga “Pag-usisa sa mga Huyog Sang Aton Tagipusuon” magahinun-anon sang aton panimuot tuhoy sa pagtambong sa mga miting. Ang dinapit nga humalambal (ukon ang lokal nga utod nga lalaki kon wala sing dinapit nga humalambal) magapakita sa aton kon paano ang “Paghupot sa Espirituwalidad Paagi sa Pagkaon sa Latok ni Jehova.” Ang praktikal nga pagpalig-on ihatag man sa mga pamatan-on sa organisasyon ni Jehova agod mahuptan ang kalig-on sa pag-alagad sa Dios. Ang panguna nga diskurso sang dinapit nga humalambal, nga natig-uluhan sing “Napabakod sa Espirituwal sa Paghatag Sing Masidla nga Panaksi,” magapakita kon paano ang mga aman sa kalalangan sang kongregasyon nagasangkap sa aton sa pagpanaksi sing masidla tuhoy sa Ginharian. Sin-o ang indi maluyag nga makabenepisyo gikan sa sining programa?

Ang bag-ong mga nagdedikar nga luyag magpabawtismo dapat magpahibalo sa gilayon sa nagadumala nga manugtatap. Nagasalig kami nga samtang ginasugdan naton ang ika-12 nga tuig sang kahimusan tuhoy sa pinasahi nga adlaw nga asambleya, ang tanan nga magatambong mapalig-on sa espirituwal para sa hilikuton sa unahan.