Mga Manugtatap nga Nagapanguna—Mga Konduktor sa Pagtinuon sang Kongregasyon sa Libro
1 Isa ka tumalagsahon nga pribilehiyo para sa kalipikado nga gulang ukon ministeryal nga alagad nga mangin konduktor sa Pagtinuon Sang Kongregasyon sa Libro. Ang pagtatap sa espirituwal nga mga kinahanglanon sang mga miembro sang iya grupo isa ka mabug-at nga responsabilidad. Ang iya mga katungdanan may yara tatlo ka kategoriya.
2 Sangkol sa Pagtudlo: Nagakinahanglan sing maayo nga paghanda agod mapaambit sang konduktor sang Pagtinuon Sang Kongregasyon sa Libro ang paghangop sa grupo kada semana. Ginapanikasugan niya nga mapauswag ang pag-apresyar sa materyal nga ginatun-an. Sa baylo nga magkomento sing madamo sa tion sang pagtinuon, kon kinahanglanon nagapautwas sia sing dugang pa nga mga pamangkot agod mapaguwa ang importante nga mga punto sa ginatun-an. Ang hangkat sa iya amo ang paghimo sa pagtuon nga makawiwili kag makatudlo kag ang pagpakomento sa tanan sa paghinambalanay. Ang iya tulumuron amo ang pagpalig-on sa espirituwal, ang pagpadaku sa praktikal nga kabilihanan sang pagtuon, kag ang pagtinguha nga ang materyal makalab-ot sa hunahuna kag tagipusuon.—1 Tes. 2:13.
3 Mabuligon nga Pagbantay: Ang konduktor sa Pagtinuon Sang Kongregasyon sa Libro “subong sang palalipdan sa hangin kag palanaguan sa unos.” (Isa. 32:2) Nagaulikid gid sia sa tanan nga yara sa iya grupo kag nagapat-od nga ginahatag ang espirituwal nga bulig kon may isa sa iya grupo nga naluyahan sing buot.—Ezeq. 34:15, 16; 1 Tes. 2:7, 8.
4 Makugi nga Pag-ebanghelyo: Ang konduktor sa Pagtinuon Sang Kongregasyon sa Libro mahunahunaon sa paghimo sing praktikal nga mga kahimusan para ang tanan sa iya grupo makapakigbahin sing bug-os sa ministeryo sa latagon. Nagapanguna sia sa hilikuton sa pag-ebanghelyo, nakahibalo nga ang pagkatayuyon, kakugi, kag kapagsik nga ginapakita niya sa pag-alagad mabanaag sa grupo. (Col. 4:17; 2 Tes. 3:9) Sa ulihi, nagapanikasog sia nga updan ang kada miembro sang iya grupo sa pag-alagad. Kon luyag naton nga mag-uswag ang aton mga ikasarang sa pagbantala kag pagtudlo sa ministeryo, ang konduktor sa Pagtinuon Sang Kongregasyon sa Libro makabulig sa aton sa pagtigayon sang aton tulumuron.—1 Tim. 4:16; 2 Tim. 4:5.
5 Tunay kita nga ginapakamaayo sining mga dulot nga mga tawo nga handa sa paghatag sa aton sing espirituwal nga bulig kag mahigugmaon nga pagsakdag. (1 Tes. 5:14) Kabay nga ipakita naton ang aton pagpasalamat sa sining matahom nga aman halin kay Jehova paagi sa aton regular nga pagpakigbahin sa pagtinuon sa libro kag sa aton matutom nga pagsakdag sa hilikuton sa pag-ebanghelyo.—Heb. 10:25.