Ang mga Ministeryal nga Alagad Nagahimo Sing Mapuslanon nga Pag-alagad

¹ “Ginapakita nila sa ila kaugalingon nga dedikado gid sila nga mga lalaki nga ang pagtuo ginapadayag sa makugi nga pag-alagad sa Ginharian kag sa pagbulig sa iban nga maglig-on sa pagtuo.” Amo sini ang ginasiling sang Organisado sa Pagtuman sang Aton Ministeryo, sa pahina 57, tuhoy sa mga ministeryal nga alagad. Sa pagkamatuod, ang espirituwal nga halimbawa nga ginpahamtang sang aton mga ministeryal nga alagad takus ilugon. Ang pagpangabudlay upod sa ila kag upod sa mga gulang “nagapatubo sa lawas agod nga maglig-on ini sa gugma.”​—⁠Efe. 4:⁠16.

² Ang mga ministeryal nga alagad nagahimo sing importante nga hilikuton sa kongregasyon. Hunahunaa lamang ang ila tanan mapuslanon nga mga serbisyo! Nagatatap sila sang mga kuwenta, literatura, magasin, suskripsion, kag teritoryo; nagapanghikot sila subong mga attendant; nagadipara sang kasangkapan sa sound, kag nagabulig sa pagmentinar sang Kingdom Hall. Nagapakigbahin sila sa Teokratikong Eskwelahan sa Pagministro kag Miting sa Serbisyo. Ang pila sa ila nagahatag pa gani sing mga pamulongpulong publiko ukon nagadumala sing pila ka miting sang kongregasyon. Kaangay sang mga bahin sang pisikal nga lawas, ang mga ministeryal nga alagad nagahimo sing mga serbisyo nga kinahanglan naton.​—⁠1 Cor. 12:​12-26.

³ Ang makita ang mga ministeryal nga alagad nga nagakooperar sing nahiusa sa mga gulang subong bahin sang isa ka hubon sang mga alagad nga nagatinahuray kag nagahangpanay nagapalig-on sa iban sa paghimo sing amo man. (Col. 2:19) Paagi sa matutom nga pagtuman sang ila mga responsabilidad kada semana kag paagi sa pagpakita sing personal nga interes sa iban, nagabulig sila sa espirituwal nga pag-uswag sang kongregasyon.

⁴ Ano ang himuon naton agod mapakita naton ang aton apresasyon sa mapisan nga mga ministeryal nga alagad? Dapat naton hibaluon ang ila gintangdo nga mga katungdanan kag ipakita ang kahanda sa pagkooperar kon ang aton bulig ginakinahanglan. Paagi sa hambal ukon buhat, mapahibalo naton sa ila nga ang ila hilikuton ginapasalamatan. (Hulu. 15:23) Ang mga nagapangabudlay sing lakas para sa aton takus nga kilalahon sing hanuot.​—⁠1 Tes. 5:​12, 13.

⁵ Ginahatag sang Pulong sang Dios ang katungdanan kag mga kalipikasyon sang mga ministeryal nga alagad. (1 Tim. 3:​8-10, 12, 13) Ang ila mapuslanon nga sagrado nga pag-alagad kinahanglanon gid sa pagpanghikot sang kongregasyon. Ini nga mga lalaki nagakabagay sang aton padayon nga pagpalig-on, kay sila tanan ‘madamo sing ginahimo sa hilikuton sang Ginuo.’​—⁠1 Cor. 15:⁠58.