Ginadugangan ang Pagpanaksi Samtang Nagahilapit ang Katapusan

¹ Ang tig-alani isa ka makalilipay nga tion. Tion man ini sa pagpangabudlay sing lakas. Limitado lamang ang tion sa pagtipon sa patubas. Ang mga mamumugon indi dapat magpabuyanbuyan sa ila hilikuton.

² Sing malaragwayon, ginpaanggid ni Jesus ang “katapusan sang sistema sang mga butang” sa tig-alani. (Mat. 13:39) Nagakabuhi kita sa katapusan sining sistema sang mga butang, nga may limitado na lamang nga tion nga nabilin sa paghatag sing panaksi sa “bug-os napuy-an nga duta.” (Mat. 24:14) Samtang labi pa nga nagahilapit ang katapusan, dapat naton dugangan ang aton bahin sa ministeryo. Ngaa? Si Jesus nagpaathag: “Ang alanyon bugana, apang pila lamang ang mga mamumugon.”​—⁠Mat. 9:​37, 38; Roma 12:⁠11.

³ Himua Ini sing Hilingagawon: Sang ginsugdan ni Jesus ang iya daku nga hilikuton sa pagbantala, may yara lamang sia tatlo ka tuig kag tunga sa pagtuman sang ginsugo sa iya. Nagbantala sia upod ang balatyagon sang pagkahilingagawon, nga nagasiling: “Dapat ko ibantala ang maayong balita sang ginharian sang Dios, kay bangod sini ginpadala ako.”​—⁠Luc. 4:⁠43.

⁴ Ginpatudok ni Jesus sa iya mga disipulo ini man nga balatyagon sang pagkahilingagawon. (Mar. 13:32-37) Amo ina kon ngaa “sa adlaw-adlaw sa templo kag sa balay-balay nagpadayon sila nga walay untat sa pagpanudlo kag sa pagpahayag sing maayong balita nahanungod kay Cristo, si Jesus.” (Binu. 5:42) Wala nila gin-una sa ila kabuhi ang indi tanto ka importante nga mga hilikuton. Bisan diutay lamang sila, madinalag-on nila nga nabantala ang maayong balita “sa tanan nga tinuga sa idalom sang langit.”​—⁠Col. 1:⁠23.

⁵ May daku pa gid nga rason agod palambuon naton karon ini man nga balatyagon sang pagkahilingagawon, samtang “ang katapusan sang tanan nga butang malapit na.” (1 Ped. 4:7) Si Jehova nagtalana sing adlaw kag takna para sa katapusan sining sistema sang mga butang. (Mat. 24:36) Ang pagbantala nga hilikuton pagatapuson sa tion nga nabilin. Amo ina kon ngaa padayon naton nga ginadugangan ang aton panikasog agod mapalab-ot naton sa madamo pa nga katawhan ang maayong balita.

⁶ Paagi sa pagdugang sang aton bahin sa pagpanaksi nga hilikuton samtang nagahilapit ang katapusan, may kaayawan kita nga makasiling kay Jehova, subong ni Jesus: ‘Natapos namon ang buluhaton nga ginhatag mo sa amon nga himuon.’​—⁠Juan 17:⁠4.