“Ibantala ang Pulong . . . sing Hilingagawon”
1 Kon makabaton ka sing isa ka butang nga namarkahan sing “HILINGAGAWON,” paano mo ini tamdon? Ang tinaga nga “hilingagawon” nagakahulugan sing “pagkinahanglan sing gilayon nga igtalupangod.” May maayo gid nga rason nga ginsugo ni apostol Pablo ang mga Cristiano nga “ibantala ang pulong . . . sing hilingagawon.” (2 Tim. 4:2) Nagahulag ka bala paagi sa paghatag sing gilayon nga igtalupangod sa sining hilikuton?
2 Mahimo nga ginbalita kay Pablo nga ang pila sang iya mga kauturan nagpakita sing huyog sa ‘pagligoy sa ila hilikuton’ subong mga Cristiano. (Roma 12:11) Naglatid ini sa mga resulta sang ila pinangabudlayan subong man sa kalipay nga naagom kuntani nila sa pagbulig sa iban.
3 Ang Pagtamod ni Jesus sa Ministeryo: Daw ano nga kalipay ang naagom ni Jesus sa pagtuman sang iya ministeryo! Sia nagsiling: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” Ang halimbawa ni Jesus nagpahulag sa iya mga disipulo, nga ginpalig-on niya paagi sa pagsiling sa ila nga ‘ang kaumhan maputi na nga alanyon.’ (Juan 4:34, 35) Ang pagbatyag sing pagkahilingagawon nga ginpakita niya sa bug-os niya nga ministeryo maathag gid sang ginsilingan niya ang iya mga disipulo nga ‘makitluoy sa Agalon sang alanyon agod magpadala sia sing mga mamumugon sa iya alanyon.’ (Mat. 9:38) Nahangpan ni Jesus nga ang iya hilikuton amo ang pagbantala, kag determinado sia nga indi pagtugutan ang bisan ano nga butang nga magapugong sa iya sa paghimo sini.
4 Kamusta Kita? Sa karon, mas hilingagawon pa nga padayunon ang pagbantala nga hilikuton. Sa madamo nga bahin sang kalibutan, ang mga kaumhan nagakaigo na nga anihon. Bisan sa mga kadutaan diin ang maid-id nga pagpanaksi daw ginahatag, ginatos ang ginabawtismuhan kada tuig. Bangod ang katapusan sining sistema sang mga butang madasig nga nagahilapit, may yara ‘madamo nga himuon sa hilikuton sang Ginuo.’ (1 Cor. 15:58) Labaw sa iban pa nga tion, kinahanglan kita manikasog sing lakas sa pagsugid sang mensahe sang Ginharian sa iban.
5 Mangin masako kita sa pagpalab-ot sa iban sang maayong balita, sa pamalaybalay kag bisan diin man nga may mga tawo sa teritoryo. Paagi sa pagpakigbahin sing bug-os kon mahimo sa pagbantala nga hilikuton, mapakita naton sing maathag nga ginauna naton ang Ginharian sa aton kabuhi. (Mat. 6:33) Ang aton katutom sa pagbantala sang pulong sing hilingagawon magahatag sa aton sing daku nga kalipay.