Gamita sing Epektibo ang Inyo Tion

¹ Ang tanan may palareho nga kadamuon sang tion nga magamit niya kada semana. Ang tion nga ginahugod naton sa pagpalapnag sing maayong balita ilabi na nga hamili bangod tion ini nga ginahinguyang sa nagaluwas-kabuhi nga hilikuton. (Roma 1:16) Ginapakita naton ang aton apresasyon sa sini paagi sa paghanda sing maayo para sa pag-alagad nga ginplano, sa pag-abot sing husto sa oras sa mga miting para sa pag-alagad, kag sa pagkadto sa teritoryo sa gilayon. Mas maayo nga nagabantala kita sangsa nagahulat. Sanglit gintudluan kita ni Jehova nga “sa tagsa ka butang may gintalana nga tion,” dapat naton gamiton sing maayo gid ang tion nga gintigana naton para sa ministeryo.​—⁠Manugw. 3:⁠1.

² Gamita sing Maalamon ang Inyo Tion: Madamong pagpakamaayo ang magaabot sa aton kon matutom nga ginasunod naton ang isa ka iskedyul agod makapakigbahin sing tayuyon sa ministeryo sa latagon. Natural lang nga ang maayong mga resulta nga matigayon naton sa ministeryo nagakabagay gid sa kadamuon sang tion nga ginhinguyang sa pag-alagad. Paagi sa pagbag-o diutay sa aton rutina, makahinguyang bala kita sing madamo pa nga tion sa pag-alagad sa latagon? Halimbawa, pagkatapos sang hilikuton sa magasin kon Sabado, makahinguyang bala kita sing dugang pa nga tion sa pila ka pagduaw liwat? Kon medyo madugay na kita nga nagaalagad sa latagon kon Domingo, makahinguyang bala kita sing tion sa mga pagduaw liwat ukon sa pagdumala sing isa ka pagtuon sa Biblia? Posible bala nga dugangan ang aton pamalaybalay nga hilikuton sing pagpanaksi sa dalan? Sa sini ukon sa iban pa nga mga paagi, mahimo naton mapauswag ang aton pag-alagad.

³ Kon nagaguwa kita sa latagon, mawasi naton ang hamili nga tion kon indi kita maghalong. Sa pagkamatuod, kon mainit gid ang tiempo, ang malip-ot nga pagpahuway magaparepresko sa aton kag magabulig sa aton nga magpadayon. Apang, mangin timbang, kay ini nga mga pahuway mahimo nga indi pirme kinahanglanon.

⁴ Sining ulihi nga tinuig labi nga nagabudlay nga maabtan ang mga tawo sa balay. Agod malubad ini nga kahimtangan, madamong manugbantala ang nagapamalaybalay sa lain nga oras sa isa ka adlaw. Ngaa indi tilawan nga magpanaksi sa kahapunanon ukon sa kasisidmon?

⁵ Mas maayo nga wala kita nagasugilanunay samtang nagapanaksi sa dalan. Sa baylo, magtindog nga malayo sa isa kag isa kag palapiti ang mga tawo agod makasugod sing mga paghambalanay upod sa ila. Sa amo ang tion ginagamit sing mas epektibo kag daku pa nga kalipay ang matigayon gikan sa hilikuton.

⁶ Himusli ang mga Kahigayunan nga Makapanaksi: Sang ang tagbalay nagsiling nga indi sia interesado, namangkot ang Saksi kon may iban pa nga tawo sa balay nga mahimo niya masugilanon. Nagdul-ong ini sa pagpakigsugilanon sa ulo sang pamilya, nga madamong tinuig na nga nagamasakit kag pirme na lang nagahigda sa katre. Ang paglaum nga ginahatag sa Pulong sang Dios nagpukaw liwat sang iya interes sa kabuhi. Wala magdugay nakabangon na sia, nagatambong sa mga miting sa Kingdom Hall, kag nagapaambit sang iya bag-ong natukiban nga paglaum sa iban!

⁷ Gingamit sang isa ka tin-edyer nga utod nga babayi ang panugda nga mag-alagad sa latagon isa ka oras antes sang Pagtinuon Sang Kongregasyon sa Libro. Sa una nga ganhaan nga ginduaw niya, nasugilanon niya ang 13-anyos nga dalagita nga namati sing maayo kag nagkuha sing literatura. Sang masunod nga adlaw sa eskwelahan, nakita sang lamharon nga utod nga babayi ining dalagita. Wala madugay pagkatapos sadto, gintanyagan niya sia sing pagtuon sa Biblia, kag nagpasugot ang dalagita.

⁸ Himua Ini nga De-Kalidad nga Tion: Ang regular nga pagpakigbahin sa pag-alagad sa latagon nagabulig sa aton nga mapalambo ang aton mga ikasarang sa pagtanyag sing maayong balita. Mapauswag mo bala ang imo ikasarang sa pagsugod sing isa ka paghambalanay sa ganhaan paagi sa paggamit sing mas epektibo nga introduksion? Mangin mas sampaton ka bala nga manunudlo kon nagadumala sing pagtuon sang Biblia sa puluy-an? Paagi sa paghimo sini, imo gid mahinguyang ang imo tion sa pag-alagad sing epektibo kag ang imo ministeryo sing mas mabungahon.​—⁠1 Tim. 4:⁠16.

⁹ Bangod “ang tion nga nabilin ginpalip-ot,” ang aton kabuhi dapat masako sa Cristianong mga hilikuton. (1 Cor. 7:29) Ang pagpain sing tion para sa pagbantala nga hilikuton amo ang dapat naton unahon. Makigbahin kita sing maayo kag sing makugi sa ministeryo. Ang tion isa ka makalilipay nga butang nga ginhatag ni Jehova sa aton. Gamita ini pirme sing maalamon kag sing maayo.

[Kahon sa pahina 4]

Binagbinaga Ining mga Panugda:

◼ Mag-abot sing husto sa oras sa mga miting para sa pag-alagad.

◼ Kon nagakaigo, hupti nga diutay ang mga grupo sa pagpanaksi.

◼ Likawi ang mga pag-angan-angan kon nagakadto sa teritoryo.

◼ Tuptupi ang teritoryo kon ang kalabanan nga tawo yara sa balay.

◼ Manghikot kon kaisa sing isahanon kon indi peligruso.

◼ Magduaw liwat sa pinakamalapit sa teritoryo sa pamalaybalay.

◼ Padayon nga masako sa pag-alagad kon ang iban sa grupo nagdugay sa isa ka ganhaan.

◼ Kon posible, depende sa sirkunstansia, magpabilin sa latagon sing sobra sa isa ka oras.