Pamangkot

◼ Sin-o ang may salabton sa pagtinlo sang Kingdom Hall?

Ang Kingdom Hall nga matinlo kag matahom nagapabanaag sing maayo sa mensahe nga aton ginabantala. (Ipaanggid ang 1 Pedro 2:⁠12.) Ang paghupot sa tilipunan nga mahipid kag matinlo kinahanglanon, kag ang tanan mahimo makapakigbahin sa pag-atipan sa sini. Indi kita dapat magpaabot nga pila lamang ka tawo ang magapas-an sang bug-os nga lulan. Sa masami, ang pagtinlo ginahimo suno sa mga grupo sang Pagtinuon Sang Kongregasyon sa Libro, samtang nagapanguna ang konduktor sang pagtuon ukon ang iya kabulig. Sa tilipunan diin kapin sa isa ka kongregasyon ang nagatipon, ang mga gulang magaorganisar sang mga butang agod ang tanan nga kongregasyon makapakigbahin sa pag-atipan sa sini.

Paano naton matatap sing labing maayo ini nga salabton? Ang Kingdom Hall dapat tinluan suno sa isa ka regular nga iskedyul. Dapat may mga suplay kag mga gamit sa pagpaninlo. Ang listahan sang mga butang nga kinahanglanon dapat ipahibalo sa bulletin board nga mahimo matan-aw sang mga manugpangabudlay para sa panuytoy. Ayhan may yara duha ka lainlain nga listahan, ang isa para sa indi tanto ka id-id nga pagpaninlo pagkatapos sang tagsa ka miting kag ang isa pa para sa mas maid-id nga semanal nga pagpaninlo. Ang konduktor sang pagtinuon sa libro dapat mag-iskedyul sing maid-id nga pagpaninlo sa adlaw kag oras nga kombeniente sa tanan nga natangduan. Dapat man talupangdon sing regular ang ugsaran, mga bulak, kag mga tanom. Ang mga bangketa kag ang paradahan sang salakyan dapat huptan nga wala sing sagbot. Kada tuig ang general cleaning dapat himuon, ayhan antes sang Memoryal. Mahimo ini maglakip sang pagtinlo sa mga bintana, dingding, kag kurtina.

Siempre pa, mahimo naton tanan mapamag-an ang lulan paagi sa indi paghaboy sang chewing gum ukon sagbot sa sulod ukon sa guwa sang tilipunan. Mahimo naton tinluan ang kasilyas sa kada paggamit sini, nagabilin sini nga matinlo para sa masunod nga magagamit. Mag-andam nga indi makabuka sing gamit ukon makaguba sing muwebles. Talupangda ang mantsa sa salog, guba nga mga siya, problema sa tubo sang tubig, napundi nga mga bombilya, kag iban pa, kag ireport ini gilayon sa utod nga natangduan sa pagtatap sa Kingdom Hall.

Mangin handa kita tanan sa paghimo sang aton bahin. Nagabulig ini agod mangin matahom ang balay sang pagsimba kag nagapakilala sa aton subong matinlo nga katawhan nga nagapadungog kay Jehova nga Dios.​—⁠1 Ped. 1:⁠16.