Ano ang Makabulig sa Aton sa Pagtindog nga Malig-on sa Pagtuo?
1 Sugod sang nakig-upod kita sa organisasyon ni Jehova, ang aton espirituwal nga pag-uswag nangin tuburan sang kalipay para sa aton! Apang, agod magpabilin nga ‘nakapanggamot, natukod, kag napalig-on sa pagtuo,’ ang dalayon nga pagtubo sa espirituwal kinahanglanon. (Col. 2:6, 7) Samtang ang kalabanan nag-uswag sa espirituwal, ang pila naanod palayo bangod sang indi ‘pagtindog nga malig-on sa pagtuo.’ (1 Cor. 16:13) Sarang naton mapunggan nga mahanabo ini sa aton. Paano?
2 Dalayon nga Espirituwal nga Hilikuton: Magtukod sing maayong espirituwal nga rutina sa sulod sang organisasyon ni Jehova. Ang aton espirituwal nga mga kinahanglanon ginaatipan diri sing bugana. Ang mga miting sa kongregasyon, mga asambleya, kag mga kombension nagapapagsik sa aton padulong sa daku pa nga espirituwal nga pagtubo kag pagkalig-on, basta pirme kita nagatambong sa pag-ani sing mga benepisyo. (Heb. 10:24, 25) Ang regular nga batasan sa pagbasa sing Biblia, sing mga magasin nga Lalantawan kag Magmata!, kag sing mga libro nga nagabinagbinag sang matig-a nga pagkaon sang Pulong sang Dios nagaresulta sa madalom kag malig-on nga pagpanggamot naton sa espirituwal. (Heb. 5:14) Ang pagpahamtang sing personal espirituwal nga mga tulumuron kag ang maukod nga pagpangabudlay agod malab-ot ini magahatag man sing dayon nga mga benepisyo.—Filip. 3:16.
3 Bulig Gikan sa mga Hamtong: Tinguhai nga pasangkaron ang pagpakig-upod sa mga hamtong sa espirituwal sa kongregasyon. Kilalaha ang mga gulang, kay sila amo ang una nga makapabakod sa aton. (1 Tes. 2:11, 12) Batuna ang bisan ano man nga laygay ukon mga panugda nga ihatag nila. (Efe. 4:11-16) Ang ministeryal nga mga alagad interesado man sa pagbulig sa iban nga mangin malig-on sa pagtuo, gani mangayo sing pagpalig-on sa sining mga kauturan.
4 Nagakinahanglan ka bala sing bulig sa ministeryo? Makighambal sa mga gulang, kag mangayo sing bulig. Ayhan sarang ikaw malakip sa programa nga Pioneers Assist Others (Mga Payunir Nagabulig sa Iban). Ikaw bala bag-ong bawtismado? Ang pagtuon sa Aton Ministeryo nga libro kag ang pagpadapat kon ano ang kaundan sini nagapalig-on sang pag-uswag padulong sa espirituwal nga pagkahamtong. Ikaw bala isa ka ginikanan? Padayon nga palig-una ang espirituwalidad sang imo mga anak.—Efe. 6:4.
5 Bangod nakapanggamot kag malig-on sa pagtuo, may yara kita suod nga kaangtanan kay Jehova kag mainit nga pagpakig-upod sa aton mga kauturan. Nagabulig ini sa aton nga pamatukan ang mga pagsalakay ni Satanas, kag nagapabakod sang aton paglaum sa isa ka walay katapusan nga palaabuton.—1 Ped. 5:9, 10.