Pagtuon sa Tagna ni Daniel
1 Sugod sa semana sang Abril 17, tun-an naton ang Binagbinaga ang Tagna ni Daniel! sa Pagtinuon Sang Kongregasyon sa Libro. Madamo na ang nakabasa sining makawiwili nga libro, apang may kahigayunan kita karon nga maagom ang mga benepisyo paagi sa pagbinagbinag sang isa ka grupo sa materyal. Ang tanan nga manugbantala, interesado, kag kabataan ginaagda, huo ginapalig-on sa pagtambong kada semana para sa sining maid-id nga pagtuon sa tulun-an sang Daniel sa Biblia.—Deut. 31:12, 13.
2 Iskedyul sa Pagtinuon kag mga Instruksion: Ang kompleto nga iskedyul sa pagtuon sa libro nga Tagna ni Daniel ginahatag sa sini nga guwa sang Ang Aton Ministeryo sa Ginharian. Pat-ura nga magtago sing isa ka kopya sa imo libro nga ginatun-an. Ginapakita sang iskedyul ang kapitulo kag mga parapo gikan sa libro subong man ang mga bersikulo gikan sa Daniel nga binagbinagon sa sesyon kada semana. Ginapaathag sang mga footnote kon paano kag kon san-o ang pila ka materyal sa libro binagbinagon. Pagkatapos sang tagsa ka semanal nga pagtinuon, ang konduktor ginapalig-on nga repasuhon upod sa grupo ang espesipiko nga mga bersikulo gikan sa Daniel nga ginlista sa iskedyul para sa sina nga semana. Kon may tion pa, ang mga bersikulo mahimo basahon kag komentuhan. Ang pila ka bersikulo tuptupan halin sa isa ka semana pakadto sa masunod bangod sang nagapadayon nga pagbinagbinag sa aplikasyon sini.
3 Maghanda Para sa Isa ka Maid-id nga Pagtuon: Ginhimo ang panikasog agod may nagakaigo nga tion kada semana para sa indi padalidali nga pagbinagbinag sa gintangdo nga materyal. Ang apat ka leksion daw malip-ot lamang. Gani, pagkatapos sang pagtinuon para sa semana sang Hunyo 5, mahimo ilakip sang konduktor ang isa ka repaso sa Daniel 2:1-40. Para sa semana sang Hunyo 26, mahimo niya repasuhon ang Daniel 3:1-30. Ang semana sang Septiembre 4 dapat maglakip sang maid-id nga pagbinagbinag sa mga ilustrasyon kag mga kasulatan sa pahina 139. Ang tsart sa pahina 188 kag 189 dapat binagbinagon sa pagtinuon para sa semana sang Oktubre 2.
4 Maghanda sing maayo sa pagtuon kada semana, kag magkalipay sa pagpakigbahin sa sini. Apresyaha ang imo pribilehiyo sa pagpakig-upod sa kitaon nga organisasyon ni Jehova kag sa pagbenepisyo gikan sa paghantop kag paghangop nga gin-aman sang iya matutom nga mga hinaplas. (Dan. 12:3, 4) Mainayuhon nga palig-una ang iban sa pagtambong sing tayuyon sa pagtinuon sa libro. Kabay nga hatagan naton tanan sing igtalupangod ang matagnaon nga pulong sang Dios subong sang ginpahayag sa makahalawhaw nga tulun-an sang Daniel.—Heb. 10:23-25; 2 Ped. 1:19.