Nagabantala Ka Bala sing Masidla?
1 Walay sapayan nga gindakop kag ginpahog sang mga manugpamatok, sanday Pedro kag Juan nagpadayon sa pagbantala sing masidla sang mensahe sang Ginharian. (Binu. 4:17, 21, 31) Ano ang buot silingon karon sa aton sang pagbantala sing masidla?
2 Magpanaksi sing Masidla: Ang tinaga nga may kaanggid sing kahulugan sa “masidla” amo ang “maisog,” nga nagakahulugan sing “wala gid kahadlok, mapag-on sing buot, kag mabakod.” Para sa matuod nga mga Cristiano, ang masidla nga pagbantala nagakahulugan sing walay kahadlok nga paghambal kon may nagakaigo nga higayon agod mapaambit ang maayong balita sa iban. (Binu. 4:20; 1 Ped. 3:15) Nagakahulugan ini nga wala naton ginakahuya ang maayong balita. (Sal. 119:46; Roma 1:16; 2 Tim. 1:8) Sa amo, ang kasidla isa ka kinaiya nga kinahanglanon agod matuman ang ginsugo sa aton nga ibantala ang maayong balita sang Ginharian sa sining tion sang katapusan. Nagapahulag ini sa aton nga ipaambit ang maayong balita sa mga tawo bisan diin man sila mahimo masalapuan.—Binu. 4:29; 1 Cor. 9:23.
3 Kasidla sa Eskwelahan: Mabudlay bala magbantala sa imo mga kabutho bangod sang huyog nga mangin mahadlukon ukon mahuluy-on? Kon kaisa indi ini mahapos, sa katunayan, makahalangkat gid ini. Apang, si Jehova magapabakod sa imo kon mangamuyo ka sing kasidla agod makabantala sa iban. (Sal. 138:3) Ang kasidla magabulig sa imo agod mapakilala mo ang imo kaugalingon subong isa sang mga Saksi ni Jehova kag agod mabatas ang pag-uliga. Subong resulta, ang mga magapamati sa imo mahimo maluwas bangod sang imo pagbantala sa eskwelahan.—1 Tim. 4:16.
4 Kasidla sa Trabaho: Kilala ka bala subong isa sang mga Saksi ni Jehova sa trabaho? Ang lamang nga paagi agod mapalab-utan sing maayong balita ang imo mga kaupdanan sa trabaho mahimo nga paagi sa imo pagbantala sa ila. Ang imo kasidla magabulig man sa imo nga tugutan ka nga magbakasyon agod makatambong sa Cristianong mga miting kag mga kombension.
5 Kasidla Kon Ginatilawan: Ang pagtipon sing kasidla importante gid kon nagaatubang sing pagpamatok. (1 Tes. 2:1, 2) Nagabulig ini sa aton nga makapanguyapot sing hugot sa aton pagtuo kon kita ginapahog, ginayaguta, ukon direkta nga ginahingabot. (Filip. 1:27, 28) Nagapalig-on ini sa aton nga makatindog sing malig-on kon ginaipit nga ikompromiso ang pagsunod naton sa mga talaksan sang aton Dios, si Jehova. Nagapabakod ini sa aton nga mahuptan ang aton pagkamahidaiton kon ang iban nagapakigbais.—Roma 12:18.
6 Bisan ano man nga mga kabudlayan ang personal naton nga ginaatubang, kabay nga mapinadayunon naton nga ibantala sing masidla ang maayong balita.—Efe. 6:18-20.