Magpadayon sa Pagpamulong sang Pulong sang Dios nga May Kasidla

¹ Subong Cristianong mga ministro, nahibaluan naton nga indi tanan mamati sa aton pagbantala. (Mat. 10:14) Apang, wala naton ginatugutan ang negatibo nga mga reaksion nga mag-upang sa aton sa pagbantala sing maayong balita. (Hulu. 29:25) Ano ang makabulig sa aton agod padayon nga makapamulong sang pulong sang Dios nga may kasidla?

² Naapresyar ni apostol Pablo ang “labaw gid nga kabilihanan sang ihibalo tuhoy kay Cristo Jesus.” Nagpahulag ini sa iya nga magpamulong nga may “malig-on nga pagsalig.” (Fil. 3:⁠8; 1 Tes. 1:5) Bisan pa ginatamod sang iban nga mahuyang kag kabuangan ang iya ginabantala, nahibaluan niya nga amo ini “ang gahom sang Dios nga sa kaluwasan sa tagsatagsa nga may pagtuo.” (Roma 1:16) Busa, bisan pa ginapamatukan, nagpadayon sia sa “pagpamulong nga may kasidla paagi sa awtoridad ni Jehova.”—⁠Binu. 14:1-7; 20:18-21, 24.

³ Ang Aton Tuburan Sang Kusog: Nakapanaksi sing masidla si Pablo indi bangod sang iya kaugalingon nga kusog. Nagapamulong tuhoy sa ila nga duha ni Silas, si Pablo nagsulat: “Sa tapos kami mag-antos anay kag ginpasipalahan . . . sa Filipos, nagtipon kami sing kaisog paagi sa aton Dios agod mapamulong sa inyo ang maayong balita sang Dios nga may daku nga pagpanikasog.” (1 Tes. 2:⁠2; Binu. 16:12, 37) Dugang pa, samtang bilanggo sa Roma, nangabay si Pablo sa iban nga mangamuyo para sa iya agod nga makapadayon sia sa pagbantala sing maayong balita ‘nga may kasidla subong sang dapat niya ihambal.’ (Efe. 6:18-20) Paagi sa pagsalig kay Jehova sa baylo nga sa iya kaugalingon, nakapadayon si Pablo sa pagpamulong sang pulong sang Dios nga may kasidla.—⁠2 Cor. 4:⁠7; Fil. 4:⁠13.

⁴ Amo man karon. Ang isa ka utod nga lalaki nga nabudlayan gid sa pagpakilala nga isa sia ka Saksi ni Jehova kag sa pagpanaksi sing di-pormal sa iya ginatrabahuan, nangamuyo tuhoy sini kag nagsugod sa pagpanaksi. Ang isa niya ka katrabaho wala nagsapak sang primero sa iya panaksi, apang sang nabatian niya ang tuhoy sa pagkabanhaw nagtuon sia sa Biblia. Sugod sadto, ginakalitan pirme sang utod ang kahigayunan nga makabantala. Sa masunod niya nga gin-obrahan, nabuligan niya ang 34 ka tawo nga makapabawtismo sa sulod sang 14 ka tuig. Makasalig man kita nga palig-unon kita ni Jehova agod ‘makapadayon kita sa pagpamulong sang iya pulong nga may bug-os nga kasidla.’—⁠Binu. 4:⁠29.