Padunggan Naton Tanan si Jehova kag ang Iya Anak
Kon Paano ang Tanan nga Magatambong sa Memoryal sa Abril 8 Makabenepisyo sing Bug-os
1 Sin-o karon ang pinasahi nga ginapadunggan? Yadtong ang ila mga binuhatan ginahangad sang kalibutan. Apang, sa kalabanan nga hitabo, ang ila mga binuhatan nalipatan sang ulihi. Apang kamusta naman ang mga binuhatan nga nakabulig gid sa tanan nga katawhan? Ang pinakadaku sa sini talupangdon gid naton samtang ginasaulog naton ang Panihapon sang Ginuo sa pagtunod sang adlaw sa Abril 8, 2001.
2 Sin-o ang takus sang labing mataas nga kadungganan? Ang Biblia nagasabat: “Takus ka, Jehova, . . . sa pagbaton sang himaya kag dungog kag gahom, kay ikaw ang nagtuga sang tanan nga butang.” (Bug. 4:11) Subong Manunuga, si Jehova amo ang Soberano nga Manuggahom sang uniberso. Ang iya katakus nga padunggan indi gid madula!—1 Tim. 1:17.
3 Si Jesucristo, ang Anak sang Dios, naghimo sing dungganon nga mga binuhatan nga magadala sing walay katapusan nga mga pagpakamaayo sa katawhan. Gin-ilog niya sing himpit ang iya Amay. (Juan 5:19) Ang iya walay kasawayan nga pagkamatinumanon kag matutom nga pag-alagad naghimo sa iya nga “takus . . . sa pagbaton sang gahom kag manggad kag kaalam kag kusog kag dungog kag himaya kag pagpakamaayo.” (Bug. 5:12) Ginpadunggan sia sang iya Amay paagi sa pagpalingkod sa iya subong Hari. (Sal. 2:6-8) Tuhoy sa aton, may kahigayunan kita nga padunggan ang Amay kag ang Anak samtang ginasaulog naton ang Panihapon sang Ginuo sa Abril 8, 2001.
4 Sing makapasubo, diutay lamang sa maragtas sang tawo ang nagpadungog kay Jehova kag sa iya Anak subong sang nagakadapat. Kon kaisa, bisan ang katawhan anay sang Dios, ang mga Israelinhon, pakulahaw lamang nga nag-alagad kay Jehova. Hayag gid ini nga indi pagtahod. (Mal. 1:6) Ang nagakaigo nga pagtahod nagakinahanglan sing matutom nga pagtuman pasad sa gugma kag pagpasalamat sa tanan nga ginhimo ni Jehova kag sang iya Anak sa aton. Ang pagpakita sing amo sini nga pagpadungog kag pagtahod nagakahulugan nga magpakita kita sing diosnon nga kahadlok kag pagtahod, nga nagakilala kay Jehova kag kay Jesus sa tanan naton nga dalanon. Ang Cristianong kongregasyon nagapanikasog nga tudluan kag buligan ang iban nga himuon man ini.
5 Isa ka Pinasahi nga Okasyon sa Pagpakita Sing Pagpadungog: Ang pagsaulog sang Memoryal amo ang labing importante nga pagtinipon sang katawhan ni Jehova kada tuig. Ang tanan nga luyag mag-alagad kag magpadungog kay Jehova dapat magtambong. (Luc. 22:19) Ginalauman namon nga wala labot sa 6 ka milyon ka aktibo nga mga Saksi, ang mga interesado magadugang sang tumalambong tubtob sa kapin sa 14 ka milyon. Daw ano kaayo nga higayon agod padunggan ang aton langitnon nga Amay! Samtang ang selebrasyon nasentro kay Jesus, ang kadungganan kag pagtahod nga ginapakita sa ginhimo niya nagahimaya sa Amay, nga nagpadala sa iya.—Juan 5:23.
6 Ano ang aton himuon agod suportahan ining pinasahi nga okasyon? Mahimo naton buligan ang bag-ong mga interesado nga makabenepisyo sing bug-os. Palig-una sila sa pagtambong, kag kon kinahanglanon, sugata sila. Ipaathag ang katuyuan sang diskurso. Ipakilala sila sa iban. Ang ila makita kag mabatian mahimo magpahulag sa ila nga tinguhaan nga magbuylog sa aton sa pagpadungog kay Jehova.
7 Indi pagpakadiutaya ang epekto sang programa. Isa ka estudyante sa unibersidad ang may amo sini nga reaksion: “Madamong beses na ako nagatambong sa Pagpangalawat sa amon simbahan, apang lain gid ini. Nakita ko nga amo gid ini ang ginasiling sang Biblia, kag sa banta ko kamo ang may kamatuoran.” Nagsugod sia sa pagtambong sa mga miting sing regular kag sang ulihi nagpabawtismo sia.
8 Buligi ang mga Bag-uhan sa Pag-uswag: Talupangda ang mga bag-uhan nga nagatambong sa Memoryal, kag duawa sila sa gilayon pagkatapos agod repasuhon ang makarepresko nga mga butang nga ila nabatian kag napanilagan. Sugiri sila sang iban pa nga mga miting, diin madugangan nila ang ila ihibalo sa Biblia. Ang pagrepaso sa kapitulo 17 sang Ihibalo nga libro, “Pagsapo Sing Kalig-unan sa Tunga Sang Katawhan Sang Dios,” magapakita sa ila sang madamong espirituwal nga aman nga ginahatag sang kongregasyon, nga mahapos nila matigayon. Maghimo sing kahimusan nga matan-aw nila ang bag-ong video nga Our Whole Association of Brothers agod makita nila mismo ang paghiusa, kalipay, kag kakugi sang katawhan ni Jehova!
9 Importante nga mahibaluan sang mga interesado kon paano nila personal nga mapakita ang pagpadungog kag pagtahod kay Jehova. Ipaathag nga ang tinagipusuon nga pangamuyo nagapahamuot kay Jehova kag isa ini ka dalayon nga tuburan sang espirituwal nga karepreskuhan. (1 Juan 5:14) Paagi sa paggamit sang leksion 8 tubtob 12 sang Ginapatuman nga brosyur, ilaragway ang sahi sang paggawi nga nagapadungog kay Jehova. Paagi sa pagpaathag sang ginasiling sang bag-ong Jehovah’s Witnesses nga brosyur, sa pahina 30-1, palig-una ang mga bag-uhan nga hunahunaon ang posibilidad nga padunggan si Jehova paagi sa pagpakigbahin sa pagbantala nga hilikuton.
10 Ang apresasyon sa halad ni Jesus kag sa aton pribilehiyo sa pag-alagad subong mga disipulo niya nagapadungog sa Amay kag nagadala sing mga pagpakamaayo sa iban. Si Jesus nagsaad: “Kon ang bisan sin-o mag-alagad sa akon, padunggan sia sang Amay.”—Juan 12:26.