Ang Gugma Nagapahulag sa Aton sa Pagbantala
1 Subong mga Saksi ni Jehova, kilala gid kita subong makugi nga mga manugbantala sang mensahe sang Ginharian. (Mat. 24:14) Kapin sa anom ka milyon ang aktibo sa bug-os nga kalibutan; ang mga bag-uhan ginadugang kon magbuylog sila sa aton sa pagbantala. Ang mga numero ginalista pasad sa pagpakigbahin sa sining hilikuton.
2 Ano ang nagapahulag sa aton agod magboluntaryo sa sining makahalangkat nga hilikuton? Wala kita ginapilit, ginaganyat sang materyal nga daug, ukon ginatanyagan sing pinasahi nga mga kadungganan. Sa primero, madamo sa aton ang ginakulbaan bangod nagabatyag kita nga indi kalipikado, kag ang reaksion sang publiko masunson nga indi maayo. (Mat. 24:9) Indi mahangpan sang kalabanan nga tagpanilag kon ano ang nagapahulag sa aton. May mabaskog gid nga rason agod magpadayon kita.
3 Ang Gahom Sang Gugma: Ginpakilala ni Jesus ang labing daku sa tanan nga sugo sang nagsiling sia nga ‘dapat naton higugmaon si Jehova sa bug-os naton nga tagipusuon, kalag, hunahuna, kag kusog.’ (Mar. 12:30) Ang aton gugma kay Jehova nanggamot sa tudok gid nga apresasyon sa kon sin-o kag kon ano sia—ang Soberano nga Manuggahom, ang Manunuga sang tanan nga butang, nga ‘takus sa pagbaton sang himaya, dungog, kag gahom.’ (Bug. 4:11) Ang iya dalayawon nga mga kinaiya indi matupungan.—Ex. 34:6, 7.
4 Ang pagkilala kag paghigugma kay Jehova nagapahulag sa aton nga ipaiwag ang aton kapawa sa atubangan sang mga tawo. (Mat. 5:16) Ang aton kapawa nagaiwag kon ginadayaw naton sia sa publiko, ginahambal ang tuhoy sa iya makatilingala nga mga binuhatan, kag ginapalapnag ang mensahe tuhoy sa iya Ginharian. Kaangay gid sa anghel sa tungatunga sang langit, “may maayong balita nga dayon [kita] nga ibantala subong masadya nga balita . . . sa tagsa ka pungsod kag tribo kag hambal kag katawhan.” (Bug. 14:6) Ang aton gugma amo ang puwersa sa likod sang hilikuton nga pagbantala sa bug-os nga kalibutan.
5 Ginatamod sang kalibutan ang aton pagbantala subong “kabuangan” nga indi dapat pagsapakon. (1 Cor. 1:18) Ginahimo ang lapnag nga mga panikasog agod punggan ang aton hilikuton. Ang aton mainunungon nga gugma nagapabakod sa aton nga magpahayag, subong sang ginhimo sang mga apostoles: “Indi kami mahimo nga mag-untat sa paghambal nahanungod sa mga butang nga amon nakita kag nabatian. . . . Dapat namon tumanon ang Dios subong manuggahom sa baylo sang mga tawo.” (Binu. 4:20; 5:29) Ang hilikuton nga pagbantala padayon nga nagasangkad sa tanan nga bahin sang duta walay sapayan sang pagpamatok.
6 Ang aton gugma kay Jehova kaangay sang nagadabdab nga kalayo nga nagatiklod sa aton nga ibantala sing lapnag ang iya pagkahalangdon. (Jer. 20:9; 1 Ped. 2:9) Padayon naton nga “ipahayag sa katawhan ang iya mga pagpakig-angot . . . kay naghimo sia sing dalayawon nga mga butang”!—Isa. 12:4, 5.