Makigbahin sing Bug-os sa Pagpangani

¹ Ang mga manalagna ni Jehova sang una kag subong man si Jesucristo mismo nagpamulong tuhoy sa hilikuton nga pagtipon. (Isa. 56:⁠8; Ezeq. 34:11; Juan 10:16) Ini nga hilikuton ginahimo karon kay ang maayong balita sang Ginharian ginabantala sa bug-os nga kalibutan. (Mat. 24:14) Ang kinatuhayan sa ulot sang mga nagaalagad sa Dios kag sang mga wala nagaalagad sa iya nangin tuman kaathag. (Mal. 3:18) Ano ang kahulugan sini para sa aton?

² Isa ka Personal nga Salabton: Makatuon kita gikan sa halimbawa ni Pablo, nga nangin masako gid sa pagpanguna sa Cristianong ministeryo. Ginkabig niya nga obligasyon nga magbantala agod ang tanan nga tawo may higayon nga makapamati sing maayong balita kag maluwas. Nagpahulag ini sa iya nga magpangabudlay sing walay untat tungod sa ila. (Roma 1:14-17) Bangod sang makatalagam nga kahimtangan nga nagaatubang sa katawhan karon, wala bala kita sing daku pa nga responsabilidad nga bantalaan ang mga tawo sa gintangdo sa aton nga teritoryo?​—⁠1 Cor. 9:16.

³ Tion Para sa Hilingagawon nga Pagpanghikot: Ang pagbantala nga hilikuton mahimo mapaanggid sa hilikuton nga pagpangita kag sa pagsalbar sa mga tawo nga yara sa katalagman. Ang mga tawo dapat pangitaon kag tabangan antes mangin ulihi ang tanan. Ang tion limitado lamang. Ang mga kabuhi nataya! Indi katingalahan nga ginlaygayan ni Jesus ang iya mga disipulo nga ‘makitluoy sa Agalon sang alanyon agod magpadala sing mga mamumugon sa iya alanyon.’​—⁠Mat. 9:38.

⁴ Bangod sang pagkahilingagawon sa karon, gindugangan sang madamong mamumugon sang Ginharian ang ila pagpakigbahin sa sining nagaluwas-kabuhi nga hilikuton. Ang tin-edyer nga si Hirohisa nagapuyo upod sa iya apat ka manghod sa isa ka puluy-an nga may nagasolo nga ginikanan. Ginbuligan niya ang iya pamilya sa pinansial paagi sa pagbugtaw sing alas tres sa aga sa pagpangdul-ong sing mga pamantalaan. Walay sapayan sini, luyag ni Hirohisa nga dugangan pa ang ginahimo niya sa ministeryo, gani nagregular payunir sia. May mga paagi bala nga makapakigbahin ka sing labi pa sa sining indi-na-maliwat nga hilikuton?

⁵ “Ang tion nga nabilin ginpalip-ot.” (1 Cor. 7:29) Gani, kabay nga himuon naton tanan ang aton masarangan sa pinakaimportante nga hilikuton nga ginahimo karon sa duta​—⁠ang pagbantala sing maayong balita sang Ginharian kag ang paghimo sing mga disipulo. Ginpaanggid ni Jesus ining ministeryo sa isa ka hilikuton sa pagpangani. (Mat. 9:35-38) Paagi sa pagpakigbahin naton sing bug-os sa pagpangani, ang mga bunga sang aton pagpangabudlay mahimo maglakip sang pagbulig sa isa nga mangin bahin sang dakung kadam-an sang mga sumilimba nga ginlaragway sa Bugna 7:​9, 10.