Nakahanda Ka Bala Pirme?
1 Isa ka tumalagsahon nga hitabo ang natabo sang tuig 778 B.C.E. Sa palanan-awon, nakita ni manalagna Isaias “si Jehova, nga nagalingkod sa isa ka trono nga mataas kag nabayaw.” Nian nabatian ni Isaias ang mga serafin nga nagapatalupangod sang himaya ni Jehova, nga nagasiling: “Balaan, balaan, balaan si Jehova sang mga kasuldadusan.” Daw ano gid yadto ka makahalawhaw! Sa sadto nga kahimtangan, si Jehova nagpamangkot sing makahalangkat: “Sin-o ang ipadala ko, kag sin-o ang magakadto para sa amon?” Wala sing paathag nga ginahatag sa kon ano nga sahi sang hilikuton ukon kon bala ang isa nga nagaboluntaryo makapanginpulos sa sini. Apang, sa gilayon, si Isaias nagsabat: “Yari ako! Ipadala ako.”—Isa. 6:1, 3, 8.
2 Ang katawhan ni Jehova makilal-an paagi sa sini nga espiritu sang kahanda sa paghimo sang bisan ano nga iya ginasugo. (Sal. 110:3) Kag karon yara ang panawagan sa mga tawo nga nakahanda pirme. Handa ka bala sa pagsabat sa gilayon, subong ni Isaias?
3 Yara gihapon ang kinahanglanon para sa mga utod nga lalaki nga mag-alagad sa Bethel. Kinahanglan nga may yara sila daku gid nga handum nga unahon ang mga interes sang Ginharian kag handa sa paghimo sang bisan ano nga kinahanglanon agod masakdag ang bug-os kalibutan nga hilikuton sang pagbantala. (Mat. 6:33) Sa katunayan, ang pag-alagad subong isa ka katapo sang pamilya Bethel nagahatag sa isa sing pinasahi nga higayon agod maalagad si Jehova sing bug-os kalag. Ngaa?
4 Ang Hilikuton nga Ginahimo sa Bethel: Hunahunaa ang tanan nga pirme ginahimo sa tatlo ka pasilidad sang Bethel nga nahamtang sa Estados Unidos, sa Brooklyn, Patterson, kag Wallkill, New York. Ang 5,730 ka kauturan nga katapo sang pamilya Bethel sa sining tatlo ka lugar may pribilehiyo nga magpangabudlay sing suod sa pagbalhag sing mga Biblia kag mga literatura sa Biblia agod gamiton sa bug-os kalibutan nga latagon kag sa personal nga pagtuon. (Mat. 24:45) Halimbawa, sining nagligad nga tuig sang pag-alagad, 24,364,670 ka libro, 39,813,464 ka bukleta kag brosyur, 270,528,000 ka magasin, kag 1,271,041 ka audiocassette ang ginhimo kag ginpadala bilang resulta sang nagabuligay nga panikasog sang pamilya Bethel sa Estados Unidos. Diri sa Pilipinas, ang 360 ka katapo sang pamilya Bethel sa Quezon City wala lamang nagbuligay sa pagbalhag sing kapin sa 10,000,000 ka magasin sang nagligad nga tuig sang pag-alagad, kundi isa ka grupo sang kapin sa 60 sa translation department ang nagbadbad sing mga libro kag mga brosyur sa pito ka hambal agod makomposo ini nga mangin mga pahina kag mapadala sa sanga sang Japan para imprintahon. Sa bug-os nga kalibutan may yara kapin sa 1,900 ka manugbadbad kag ang mga literatura ginabalhag sa kapin sa 300 ka hambal. Madamong kinabubut-on nga boluntaryo ang ginakinahanglan sa pag-atipan sang pag-imprinta kag pagpadala sing mga literatura, pagpaninlo, pagmentinar, pagdigamo, pagpamalaklon, pag-atipan sa panglawas, kag madamong iban pa nga hilikuton sa Bethel.
5 Agod mahimo ini tanan nga hilikuton, isa ka daku apang makaalayaw nga hilikuton sa espirituwal ang kinahanglan. Sa pagkahibalo nga ang aton tanan nga kusog kag enerhiya ginagamit sa pagsakdag sa hilikuton nga pagbantala kag pagtudlo nagaresulta sa daku nga kalipay. Ang pag-alagad sa Bethel nagabulig sa aton nga makilala ang organisasyon ni Jehova sing mas detalyado. Ginapahanumdom sa aton nga ginpalig-on sang salmista ang mga Israelinhon nga kilalahon sing maayo pa ang sentro sang teokratiko nga pagginahom sa duta sang panahon nila.—Sal. 48:12, 13.
6 Mga Pagpakamaayo sang Pag-alagad sa Bethel: Ano ang balatyagon sang mga nagaalagad sa Bethel sa ila mga pribilehiyo sa pag-alagad? Talupangda ang masunod nga mga komento gikan sa mas lamharon kag gulanggulang nga mga katapo sang pamilya Bethel. Ang isa ka katapo sang pamilya Bethel nga nag-alagad sing tatlo ka tuig sa Bethel nagkomento: “Ang akon kaangtanan kay Jehova nagbakod sa Bethel. Samtang nagadugay nga nagaalagad ako diri kag nagadamo ang akon nahibaluan kon paano ginapalakat ang Bethel, mas madamo pa ang ginatudlo sini sa akon tuhoy sa personalidad ni Jehova. Ang pag-alagad sa Bethel nangin kasanagan man para sa akon agod mahangpan nga ginagamit ni Jehova ang mga tawo—ang tanan nga sahi sang tawo. Kag indi kinahanglan nga mangin himpit ka agod mangin kalahamut-an sa iya.”
7 Ang isa ka pamatan-on nga lalaki naghinumdom: “Nadumduman ko nga nagpamensar ako, ‘Daw ano kaayo nga makasulod sa bag-ong kalibutan kag masugiran ang matutom nga mga tawo sang una nga nag-alagad ako sing madamo nga tinuig sa Bethel, sa baylo nga nagtinguha nga magmanggaranon sa kalibutan.’”
8 Ginpamalandungan sang isa ka pamatan-on nga lalaki ang paghanas nga nabaton niya: “Ang makilala ang akon kaugalingon kag mahibaluan ang dapat ko pauswagon kag nian palambuon ini nga mga kinaiya nangin isa ka daku nga pagpakamaayo. Ang pamatyag ko, maalagad ko na karon sing mas maayo si Jehova. Nasapwan ko nga nangin mas pasensioso ako, mas mapinugungon sa kaugalingon, kag ginapakita ang daku pa nga gugma.”
9 Ang isa ka utod nga babayi naghunahuna tuhoy sa mga pagpakamaayo sa iya tubtob sa karon: “Ang espirituwal nga mga programa diri nagtudlo sa akon sing dugang pa tuhoy kay Jehova kag kon paano ko sia mailog sing maayo pa sa hunahuna, balatyagon, kag buhat. Kag bangod ang paghanas nagapadayon, isa ini ka nagapadayon nga pagpakamaayo.”
10 Ang isa ka utod nga lalaki nga naghinguyang sing kabug-usan nga 59 ka tuig sa bug-os tion nga ministeryo, ang kapin sa 43 sini nga tinuig sa Bethel, nagsiling: “Ang Bethel indi kaangay sang isa ka monasteryo, subong sang mahimo nga ginahunahuna sang iban. Madamo kami sing mahimo bangod sang amon naandan nga pagkabuhi. . . . Nalipay ako sa akon ginahimo adlaw-adlaw. Ngaa? Bangod kon ginaalagad naton sing bug-os kalag si Jehova, nalipay kita sa paghibalo nga ‘ginhimo naton ang dapat naton himuon.’”—Luc. 17:10.
11 Ang isa pa ka utod nga lalaki, nga nag-alagad sa Bethel sa sulod sang 62 ka tuig, nagsiling: “Nagapati gid ako nga ang Bethel amo ang pinakamaayo nga duog sa duta antes sang pag-abot sang dutan-on nga Paraiso. Wala gid ako naghinulsol nga ginhimo ko ang bug-os tion nga pag-alagad nga akon tubtob-buhi nga karera. Daw ano nga kalipay nga masaksihan kag makigbahin sa daku nga pag-uswag sang dutan-on nga organisasyon ni Jehova! Determinasyon ko, sa bulig ni Jehova, nga padayon nga himuon ang Bethel nga akon puluy-an kag bug-os kalag nga magpangabudlay sa pagpauswag sang mga intereses sang Ginharian.”
12 Ginsambit sining mga katapo sang pamilya Bethel ang pila lamang sang madamo nga pagpakamaayo nga maagom mo kon nakahanda ka pirme sa pag-alagad sa Bethel. Apang kaangay sang pagbaton sa bisan ano man nga pribilehiyo sang pag-alagad, dapat mo anay lab-uton ang mga kalipikasyon. Ano ang pila sang mga kinahanglanon agod mangin katapo sang pamilya Bethel?
13 Mga Kinahanglanon para sa Pag-alagad sa Bethel: Ginapakita sang kaupod nga kahon ang sadsaran nga mga kinahanglanon para sa mga nagaaplay sa pag-alagad sa Bethel. Dugang pa, importante nga mangin handa sila sa pagpangabudlay sing lakas, kag indi mangin “mga mahigugmaon sang kalipayan.” (2 Tim. 3:4; 1 Cor. 13:11) Ang mga katapo sang pamilya Bethel dapat mangin espirituwal nga mga lalaki kag mga babayi nga nakapalambo sing maayo nga batasan sang personal nga pagtuon kag naghanas sang ila mga ikasarang sa paghantop sa ‘pagkilala sang husto kag sayop.’ (Heb. 5:14) Ang ila Cristianong pagkahamtong nakita na sa tanan nga bahin sang kabuhi, pati na sa ila pamayo, pamustura, kag pagpili sing musika kag kalingawan. Ang handa-sing-tagipusuon nga mga katapo sang pamilya Bethel nagaalagad diin man sila kinahanglanon. Ang mas lamharon nga mga katapo masami ginahatagan sang mga asaynment nga nagakinahanglan sing pisikal nga pagpangabudlay, pati na ang pag-imprinta, paghanda kag pagpadala sing mga literatura, pagmentinar, housekeeping, pagpanglimpio, pagpanglaba, kag pagluto sing pagkaon. (Hulu. 20:29) Apang, indi kaangay sang sekular nga trabaho, ang tagsa ka asaynment nagahatag sing daku nga kaayawan bangod sagrado ini nga pag-alagad nga nagahimaya kay Jehova.—Col. 3:23.
14 Ang pinakamalip-ot nga pagtener sadtong ginaagda sa pag-alagad sa Bethel amo ang isa ka tuig. Ginahanas sila agod mangin mabungahon nga mga manugpangabudlay. Ginalauman nga himuon nila ang Bethel nga ila puluy-an. Bangod sang gugma kay Jehova nga ginauna sang mga katapo sang pamilya Bethel ang hilikuton sa Ginharian sangsa personal nga mga interes, nga kalahamut-an kay Jehova.—Mat. 16:24.
15 Mga Kinahanglanon Karon: Bangod sang kinaugali sang hilikuton nga ginahimo sa Bethel sa Pilipinas, ang kinahanglan namon karon amo ilabi na ang soltero nga mga utod. Ginahatagan sing prioridad ang mga regular payunir, kay yara na sila sa bug-os tion nga hilikuton. Kon kaisa ginatawag ang mga dalaga kag mga mag-asawa nga nagaedad sing halin sa 19 tubtob 35 anyos nga may mga ikasarang nga kinahanglanon sa Bethel. Dugang pa, ang pila ka kauturan nga magulang diutay sa 35 kag may pinasahi nga mga ikasarang kag paghanas nga magamit sa Bethel ginapalig-on nga mag-aplay. Halimbawa, nagalakip ini sa mga doktor, enhinyero, registered nurse, ukon mekaniko sang salakyan, sa pagsambit sang pila lamang. Apang, wala namon ginapalig-on nga magkuha sing pinasahi nga edukasyon ukon paghanas ang mga indibiduwal sa pagdumdom nga mas daku ang ila kahigayunan nga tawgon sa Bethel. Yadtong nakabaton na sing pinasahi nga paghanas, ayhan antes magsulod sa kamatuoran, mahimo magsulat sing detalyado nga résumé kag ilakip ini sa Bethel Information Sheet kon ginapadala ini.
16 Kon luyag mo mag-alagad sa Bethel, mahimo ka mangabay sing Bethel Information Sheet gikan sa sanga talatapan. Dapat ini sulatan kag ihatag sa komite sang pag-alagad sang kongregasyon agod mapadala sa sanga talatapan. Kon kinahanglan ang bulig sa Bethel, himuon ang pagpili gikan sa mga Information Sheet nga yara sa file kag ang Bethel Application ipadala sa mga utod nga mahimo nagakabagay sa kinahanglanon. Kon wala ka gin-agda pagligad sang isa ukon duha ka tuig, nagakaigo nga magsulat ka liwat kag bag-uhon liwat ang imo aplikasyon agod mahibaluan namon nga handa ka gihapon sa pagkadto sa Bethel. Indi tanan tawgon sa Bethel, gani kon indi ka matawag, nian padayuna ang imo pagpayunir sa imo asaynment, nagasalig nga nahibaluan ni Jehova kon diin mo mahimo ang pinakamaayo.
17 Ang pag-alagad kay Jehova nga nagapakig-upod sing suod sa madugay na nga mga alagad ni Jehova isa ka pinasahi nga pribilehiyo para sa mga nagapangabudlay sa Bethel. Ginaapresyar sang Nagadumala nga Hubon ang masinakripisyuhon-sa-kaugalingon nga espiritu sang tanan nga handa pirme sa pag-alagad sa mga kinahanglanon sang aton bug-os kalibutan nga paghiliutod.—Filip. 2:20-22; 2 Tim. 4:11.
18 Mga Pamatan-on—Maghanda Kamo Karon Para sa Pag-alagad sa Bethel: Ang paghanda para sa pag-alagad sa Bethel nagasugod antes pa malab-ot ang pinakabata nga kinahanglanon nga 19 anyos ang edad. Ano ang himuon sang mga pamatan-on agod makahanda sila para sa pag-alagad sa Bethel? Si Jesus nagsiling: “Sin-o sa inyo nga nagahandum sa pagtukod sing torre ang wala anay nagalingkod kag nagabulubanta sang gastos?” (Luc. 14:28) Sanglit ang paghanda kag pagplano kinahanglanon gid sa kadalag-an sang bisan ano man nga proyekto sa pagpatindog, daw ano gid ka importante nga talupangdon sing maayo sang mga pamatan-on kon paano sila nagatukod para sa ila palaabuton sa pag-alagad kay Jehova! Ang isa ka mabakod nga sadsaran dapat ipasad sing bata pa sa kabuhi agod malab-ot nila ang espirituwal nga mga tulumuron. Subong isa ka pamatan-on, paano mo ginapasad ang imo sadsaran? Kon luyag mo mag-alagad sa Bethel, makabulig sa imo ang pagbinagbinag sing maayo sang masunod.
19 ‘Hatagi sing Hulot’ Ining Pinasahi nga Pribilehiyo sang Pag-alagad: Subong sang narekord sa Mateo 19:12, ginpalig-on ni Jesus ang iya mga disipulo nga ‘hatagan sing hulot’ ang dalanon sang pagkadi-minyo. Ngaa? Indi bangod sa personal nga mga rason, kundi “bangod sa ginharian sang mga langit.” Ginpalig-on man ni Pablo ang dalanon nga ‘dalayon nga nagaalagad sa Ginuo nga walay tublag.’ (1 Cor. 7:32-35) Sing makapasubo, nawasi sang iban ang pribilehiyo nga makaalagad sa Bethel subong mga soltero bangod nagminyo sila sa bata pa nga edad. Ginapalig-on namon ang aton pamatan-on nga mga lalaki nga gamiton nila ang ila kusog sa paghimud-os nga makaalagad sing bug-os tion samtang hilway pa sila sa mga salabton sa pamilya. Nian, kon sa pagligad sang pila ka tion mamat-od sila sa pagminyo, mangin mas maayo sila nga mga bana bangod nakakuha sila sing mas madamo nga eksperiensia sa kabuhi kag sa Cristianong ministeryo. Pagkatapos makaalagad sing pila ka tuig sa Bethel, ang iban nagminyo kag padayon nga nag-alagad didto subong mag-asawa. Kon sila may iban pa nga mga pribilehiyo sa ulihi, subong nagalakbay nga manugtatap ukon misyonero, pat-od gid nga wala nila ginahinulsulan ang tion nga gingamit nila agod makaalagad sa Bethel.
20 Indi Magpatublag sa Materyal nga mga Paghimud-os: Ang kada pamatan-on nagakaigo nga mamangkot: ‘Ang akon bala tulumuron pagkagradwar sa hayskul amo ang paghimud-os sing bug-os tion nga sekular nga karera ukon ang pag-alagad kay Jehova sing bug-os tion?’ Matuod, ang naulihi nga dalanon nagakinahanglan sing mga sakripisyo. Apang amo man ang paghimud-os sing sekular nga karera! Sa ulihi, diin nga dalanon ang matuod gid nga may madugay kag mapuslanon nga resulta? Si Jesus naghatag sing maathag nga sabat. Suno sa Mateo 6:19-21, sia nagsiling: “Mag-untat kamo sa pagtipon para sa inyo kaugalingon sing mga bahandi sa duta, diin ginaut-ot sang sapatsapat kag sang tuktok, kag diin ginakuha kag ginakawat sang mga kawatan. Sa baylo, magtipon kamo para sa inyo kaugalingon sing mga bahandi sa langit, diin indi maut-ot sang sapatsapat kag sang tuktok, kag indi makuha kag makawat sang mga kawatan. Kay kon diin ang imo bahandi, didto man ang imo tagipusuon.” Kabay nga ang aton tagipusuon indi gid magtuytoy sa aton nga himud-usan ang kalibutanon nga karera ukon ang materyal nga mga butang sa baylo sang bug-os kalag nga pag-alagad kay Jehova. Dapat naton tanan mahangpan nga ang lamang nga bahandi nga takus himud-usan amo ang maayo nga kaangtanan kay Jehova, agod mapahalipay naton ang iya tagipusuon. (Hulu. 27:11) Paagi sa pag-una kay Jehova sa aton kabuhi samtang bata pa, ginapakita naton kon diin ang aton ginapabaloran kag kon daw ano ka importante ang Ginharian sa aton. Dumduma, “ang pagpakamaayo ni Jehova—amo ina ang nagapamanggad, kag wala sia nagadugang sing kasakit sa sini.” (Hulu. 10:22) Ang mga pamatan-on may yara maayo gid nga kahigayunan nga ipakita kon diin ang ila tagipusuon paagi sa pagbalos sing mapuslanon nga butang kay Jehova tungod sa tanan nga ginhatag niya sa ila. Ang pag-alagad sa Bethel nagahatag sing amo sina katahom nga kahigayunan para sa mga kalipikado. Ang isa ka tikang padulong sa sini amo ang pagpayunir.
21 Ang mga Nagaalagad sa Bethel Dapat nga Matinlo sing Moral: Ang salmista namangkot: “Paano tinluan sang isa ka pamatan-on ang iya banas?” Sia nagsabat: “Paagi sa pagpabilin nga nagabantay suno sa pulong [ni Jehova].” (Sal. 119:9) Nagalakip ina sang paglikaw sa bisan ano nga butang nga may kaangtanan sa kagarukan sa moral sang sistema sang mga butang ni Satanas. Ang pornograpiya sa Internet, di-nagakaigo nga paggawi sa tuhay nga sekso, malaw-ay nga musika, malain nga kalingawan, kag pag-inom nga ubos sa legal nga edad amo ang pila lamang sang mga siod nga ginagamit ni Satanas agod indi malab-ot sang aton pamatan-on ang espirituwal nga mga tulumuron. Kinahanglan ang isa ka mabakod nga determinasyon agod mapamatukan ini nga mga taktika. Subong isa ka pamatan-on, kon ginahimo mo ang bisan diin sini nga mga butang, makighambal sa mga gulang sa inyo kongregasyon kag lubara ini nga mga problema antes ka mag-aplay para sa pag-alagad sa Bethel. Ang matinlo nga konsiensia importante gid agod makaalagad sing bug-os kay Jehova.—1 Tim. 1:5.
22 Tun-i nga Makigbagay sa Iban: Ang isa ka importante nga kinahanglanon agod magmadinalag-on ang pag-alagad sa Bethel amo ang pagtuon nga makigbagay sa iban. Ang pamilya Bethel sa Pilipinas ginatapuan sang ginatos ka kauturan gikan sa tanan nga sahi sang pangabuhi. Samtang ining pagkananuhaytuhay sing personalidad nagadugang sa espirituwal nga katahom sang Bethel, kon kaisa mangin hangkat man ini. Kon ginabinagbinag mo ang pag-alagad sa Bethel, nagakaigo nga pamangkuton mo ang imo kaugalingon: ‘Madali bala ako maakig kon indi mag-ugyon ang iban sa akon opinyon? Nahapusan bala ang iban makigbagay sa akon?’ Kon kinahanglan mo nga mag-uswag sa sini nga mga bahin, tinguhai na ini karon. Magabulig ini sa imo agod makapasibu sing mas mahapos sa pagpangabuhi kag sa pagpangabudlay upod sa mga katapo sang pamilya Bethel.
23 Pangabudlayi sing lakas nga mangin espirituwal nga tawo paagi sa pagpalambo sing suod nga kaangtanan kay Jehova. Maghimo sing isa ka maayo nga programa sang personal nga pagtuon, nga nagalakip sang pagbasa sing Biblia adlaw-adlaw. Mangin aktibo sa pagsugid sing maayong balita sa iban. Paagi sa paghimo sini nga mga butang, mapadayag mo ang imo espirituwal nga pag-uswag. (1 Tim. 4:15) Daw ano ka makalilipay nga palaabuton ang nagahulat sa mga nagahanda karon para sa karera sang bug-os tion nga pag-alagad!
24 Mga Ginikanan, Hanasa ang Inyo mga Anak: Ano ang himuon sang mga ginikanan agod palig-unon ang ila mga anak nga himud-usan ang bug-os tion nga ministeryo? Si Jesus nagsiling: “Ang tagsatagsa nga natudluan sing himpit mangin subong sang iya manunudlo.” (Luc. 6:40) Ang estudyante nga nahanas sing maayo natural lang nga magapabanaag sang maayong mga kinaiya sang iya dedikado nga manunudlo. Dapat dumdumon sang Cristianong mga ginikanan ini nga prinsipio samtang nagapangabudlay sila sing lakas sa paghanas sa ila mga anak nga “ang tulumuron [nila] amo ang diosnon nga debosyon.” (1 Tim. 4:7) Sanglit may huyog ang mga anak nga ipabanaag ang panimuot sang ila mga ginikanan sa espirituwal nga mga butang, nagakaigo nga pamangkuton sang mga ginikanan ang ila kaugalingon: ‘Personal bala namon nga ginapakabahandi ang hilikuton nga ginahimo sa Bethel sa pagpauswag sang mga interes sang matuod nga pagsimba kay Jehova? Nakita bala namon ang pagpakamaayo ni Jehova sa kahimusan sa Bethel? Nagapati bala kami nga ang kabuhi nga nagaalagad kay Jehova amo ang labing maayo nga karera nga mapili sang amon mga anak? Ginapalig-on bala namon ang bug-os tion nga pag-alagad paagi sa hambal kag halimbawa?’ Ang aton mismo tinagipusuon nga apresasyon sa pag-alagad sa Bethel kag sa hilikuton nga ginahimo didto magabulig sa aton nga mapatudok ang amo man nga apresasyon sa aton mga anak.
25 Sanday Elcana kag Ana may tudok nga apresasyon sa matuod nga pagsimba. Nagpahamtang sila sing talalupangdon nga halimbawa para sa Cristianong mga ginikanan karon. Sa dumaan nga Israel, ang Israelinhon nga mga lalaki lamang ang ginakinahanglan nga “mag-atubang sa matuod nga Ginuo, si Jehova” sing tatlo ka beses sa isa ka tuig sa tabernakulo. Walay sapayan sina, si Elcana naglakbay sing mga 30 kilometros, ayhan nagalakat lamang, upod sa iya bug-os nga pamilya “tuig-tuig” agod maghalad sa sining sentro sang pagsimba kay Jehova. (Ex. 23:17; 1 Sam. 1:3, 4, 9, 19; 2:19) Maathag gid nga luyag sini nga ulo sang pamilya nga ang iya bug-os nga pamilya mangin interesado man sa espirituwal nga mga butang kaangay niya.
26 Si Ana interesado man sa matuod nga pagsimba kaangay sang iya bana. Nabatyagan gid niya ang iya obligasyon nga mag-amot agod suportahan ang matuod nga pagsimba sa tabernakulo. Nanaad si Ana nga kon hatagan sia ni Jehova sing anak nga lalaki, paalagaron niya sia sa tabernakulo. (1 Sam. 1:11) Ginhatagan sang Mosaikong Kasuguan ang bana sing kinamatarong nga himuon nga walay pulos ang di-nagakaigo nga panaad sang iya asawa. (Num. 30:6-8) Apang, maathag nga ugyon si Elcana sa panaad ni Ana, kag ginpakita nga ginasuportahan man niya ina nga pagpadayag sing matuod nga pagsimba!—1 Sam. 1:22, 23.
27 Ang ila anak bala nga si Samuel naapektuhan sing mapuslanon bangod sang apresasyon kag maayo nga espiritu nga ginpakita sang iya mga ginikanan? Huo, sa pagkamatuod. Sang bata pa, gin-atipan ni Samuel sing kinabubut-on kag sing matutom ang mga hilikuton nga gintangdo sa iya kag ginhanas sia para sa dugang pa nga ginapakabahandi nga mga pribilehiyo sa pag-alagad sa Dios. Ang interes nga ginpakita nanday Elcana kag Ana sa pag-alagad ni Samuel sa tabernakulo wala natapos sang ginahimo na niya ang iya mga katungdanan didto. Padayon nila nga ginduaw sia sing tayuyon agod palig-unon kag sakdagon samtang nagaalagad sia sing bug-os tion.—1 Sam. 2:18, 19.
28 Daw ano ka talalupangdon gid nga halimbawa ang ginpahamtang nanday Elcana kag Ana para sa Cristianong mga ginikanan karon! Kon mabatian sang aton mga anak ang aton tinagipusuon nga apresasyon para sa pribilehiyo sang pag-alagad sa Bethel kag makita ang espiritu sang pagsakripisyo sa kaugalingon nga ginapakita naton sa pagpauswag sang mga intereses sang Ginharian, mapalambo man nila ang tagipusuon nga nahuyog sa pag-alagad sa iban. Madamo nga ginikanan ang madinalag-on nga nagpatudok sining maayo gid nga huyog sa ila mga anak. Ang isa ka siete anyos nga bata nga babayi nagsulat: “Kon magdaku ako, luyag ko magkadto sa Bethel, kag luyag ko himuon didto ang pila ka butang. (1) Magmakinilya sang mga magasin nga Lalantawan kag Magmata!, (2) magtrabaho sa inyo art section, (3) magpamiod sing bayo. Handa ko nga himuon ang bisan diin man sini.” Daw ano ka makalilipay nga makita ining kinabubut-on nga espiritu nga nagalambo sa tagipusuon sang aton mga anak!
29 Mga pamatan-on, dumduma nga “ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:17) Padayon nga himud-usi ang espirituwal nga mga tulumuron, pati na ang pinasahi nga pribilehiyo sang pag-alagad sa Bethel. Mga ginikanan, iluga ang halimbawa sang mga matutom sang nagligad nga nagpalig-on sa ila mga anak nga palambuon ang diosnon nga debosyon. (2 Ped. 3:11) Kag kabay nga himuon naton tanan ang aton bahin agod buligan ang aton mga pamatan-on nga maalagad ang aton Daku nga Manunuga sing bug-os gid kon posible, kay “nagasaad ini sing kabuhi karon kag sa palaabuton.”—1 Tim. 4:8; Manugw. 12:1.
[Kahon sa pahina 4]
Sadsaran nga mga Kinahanglanon para sa Pag-alagad sa Bethel
● Mga isa ka tuig nga nabawtismuhan
● Espirituwal nga tawo nga may tudok nga gugma kay Jehova kag sa iya organisasyon
● Mapagros sa espirituwal, mental, emosyonal, kag pisikal
● Mas maayo kon payunir
● Banwahanon ukon legal nga pumuluyo sang Pilipinas
● 19-35 anyos ang edad