Luyag Mo Bala Maghimo sing Kapin Pa?
1 Ginpaanggid ni Jesus ang Ginharian sa hamili nga mga bahandi. (Mat. 13:44-46) Ang hilikuton nga pagpalapnag sing balita tuhoy sa Ginharian isa man ka bilidhon nga bahandi. Ini nga ministeryo takus nga unahon sa aton kabuhi, bisan pa ang pagpakigbahin sing bug-os sa sini nagakinahanglan sing pila ka pagdingot sa kaugalingon. (Mat. 6:19-21) Luyag mo bala maghimo sing kapin pa sa pag-alagad sa Ginharian?
2 Binagbinaga Ining mga Kinahanglanon: Kinahanglan ang pila ka butang agod mapasangkad ang aton personal nga pagpakigbahin sa ministeryo: (1) mangin determinado nga unahon ang intereses sang Ginharian sa kabuhi (Mat. 6:33); (2) pagtuo kag pagsalig kay Jehova (2 Cor. 4:1, 7); (3) pagpangayo sang bulig sang Dios paagi sa sinsero kag mapinadayunon nga pangamuyo (Luc. 11:8-10); (4) paghunahuna kag pagpanghikot suno sa aton mga pangamuyo.—Sant. 2:14, 17.
3 Mga Paagi Agod Mapasangkad ang Aton Ministeryo: Kita tanan makatalana sing sadsaran nga tulumuron nga maghinguyang sing pila ka tion sing tayuyon sa ministeryo kada bulan. Apang nabinagbinag mo man bala nga himuslan ang tanan nga higayon nga makapanaksi sing di-pormal, panikasugan nga makahatag sing mas makahulugan nga mga presentasyon, pauswagon ang pagkaepektibo sang imo mga pagduaw liwat, kag tinguhaan nga makadumala sing mainuswagon nga mga pagtuon sing Biblia sa puluy-an? Mahimo bala ikaw makaauxiliary ukon makaregular payunir ukon makaalagad diin daku pa ang kinahanglanon? Kon ikaw isa ka bawtismado nga utod nga lalaki, matinguhaan mo bala nga mangin kalipikado subong isa ka ministeryal nga alagad ukon isa ka gulang? (1 Tim. 3:1, 10) Mapasangkad mo bala ang imo ministeryo paagi sa pag-aplay sa pag-alagad sa Bethel ukon sa Ministerial Training School?—Luc. 10:2.
4 Ang isa ka utod nga lalaki nga nagatrabaho anay sing bug-os nga tion kag nagahinguyang sing madamo nga tion sa hampang napalig-on nga magregular payunir. Nag-auxiliary payunir sia anay kag nian ginpasibu ang iya mga sirkunstansia agod makasulod sa bug-os tion nga ministeryo. Nag-eskwela sia sang ulihi sa Ministerial Training School, nga nakabulig sa paghanda sa iya para sa iya karon asaynment subong manugtatap sang sirkito. Nalipay gid sia nga naghulag sia sa pagpalig-on nga nabaton niya, kag nagasalig sia nga mas malipayon sia bangod sang desisyon niya nga maghimo sing kapin pa sa pag-alagad sa Ginharian.
5 Ginapakamaayo ni Jehova ang mga nagahimo sang ila kaugalingon nga handa nga gamiton. (Isa. 6:8) Indi pagtuguti ang bisan ano nga butang nga magpugong sa imo sa pagpasangkad sang imo ministeryo kag sa pag-agom sang daku pa nga kalipay kag kapagsik bangod sang paghimo sini.