Gamita sing Matadlong ang Pulong sang Dios
1 Sang nagpanaksi sa isa ka opisyal, “gintikab ni Felipe ang iya baba kag, sumugod sa [isa ka] Kasulatan, ginpahayag niya sa iya ang maayong balita nahanungod kay Jesus.” (Binu. 8:35) ‘Gingamit sing matadlong [ni Felipe] ang pulong sang kamatuoran.’ (2 Tim. 2:15) Apang, napanilagan karon sang mga nagalakbay nga manugtatap nga ang madamo nga manugbantala talagsa lang nagagamit sing Biblia kon nagapanaksi. Ginagamit mo bala ang Biblia sa imo ministeryo?
2 Ang Pulong sang Dios amo ang ginhalinan sang tanan nga ginapatihan kag ginatudlo naton. (2 Tim. 3:16, 17) Amo ini ang nagabuyok sa mga tawo kay Jehova kag nagatudlo sa ila para sa kabuhi. Amo sina kon ngaa importante nga ginagamit naton ang Biblia sa aton ministeryo sa baylo nga ginapakighambal lamang ang mga topiko nga makawiwili sa aton. (Heb. 4:12) Bangod diutay lamang ang namang-an sa Biblia sang kalabanan nga mga tawo, dapat kita magbasa gikan sa sini agod ipakita sa ila ang praktikal nga panuytoy nga ginahatag sini kag ang palaabuton nga nagahulat sa katawhan.
3 Magbasa sing Direkta sa Biblia: Mahimo tilawan mo nga magpamalaybalay nga wala sing dala nga bag. Masulod mo sa isa ka manipis nga portfolio ang literatura nga luyag mo itanyag kag uyatan ukon ibulsa ang Biblia. Nian, kon nagapakigsugilanon sa isa ka tawo, sarang mo mapaguwa ang Biblia nga wala nagapahunahuna sa tawo nga ginasermonan mo sia. Magpuwesto ka nga sarang masundan sang nagapamati sa imo ang imo pagbasa sa Biblia. Ayhan mapabasa mo sa iya ang isa ka bersikulo sing mabaskog. Mas daku ang epekto kon makita niya kon ano ang ginasiling sang Biblia sa baylo nga mabatian lamang ini sa imo. Siempre pa, agod buligan sia nga mahangpan ang kahulugan sang teksto, ipadaku ang mga tinaga nga may ginapaalinton nga panghunahuna.
4 Presentasyon nga Nagagamit sing Isa ka Kasulatan: Sa tapos mapakilala ang kaugalingon, mahimo ka makasiling: “Ang mga tawo nagadangop sa nanuhaytuhay nga mga tiliman-an agod tuytuyan ang ila kabuhi. Ano sa banta mo ang labing maayo nga tiliman-an sang praktikal nga panuytoy? [Pasabta sia.] Ano naman ang masiling mo sa sini nga pinamulong? [Basaha ang Hulubaton 2:6, 7, kag pakomentuha sia.] Ang tawhanon nga kaalam makapahanusbo nga napamatud-an nga kulang, amo nga ang madamo nga tawo nadulaan sing paglaum. Apang, ang kaalam sang Dios pirme nga masaligan kag mapuslanon.” Nian ipakita ang publikasyon nga imo ginatanyag, kag ipatalupangod gikan sa sini ang isa ka halimbawa sang praktikal nga kaalam sang Dios.
5 Si Jesus naggamit sing mga Kasulatan agod buligan ang mga bunayag sing tagipusuon. (Luc. 24:32) Ginpamatud-an ni Pablo sa Kasulatan ang mga butang nga gintudlo niya. (Binu. 17:2, 3) Ang aton pagsalig kag kalipay sa ministeryo magadugang samtang labi pa kita nga nagalantip sa paggamit sing matadlong sang Pulong sang Dios.