Padayon nga Magbenepisyo sa Ang Lalantawan kag Magmata!
Karon nga gin-untat na ang suskripsion sa koreo sang mga magasin nga Lalantawan kag Magmata!, kinahanglan ang panikasog agod nga kita, kag ang mga ginabantalaan naton, indi magpalya sa pagbaton bisan sing isa lamang ka guwa.
Personal nga mga Kopya: Kon matapos na ang imo personal nga suskripsion, dugangi ang imo order sang magasin. Ang mga ginikanan dapat mag-order sing nagakaigo nga kadamuon sing magasin agod nga ang tagsa ka katapo sang pamilya may iya kaugalingon nga kopya. Sulati sing imo ngalan ang imo personal nga kopya agod nga indi ini matanyag sa latagon. Kon mag-abot na ang suplay nga mga magasin, ang mga utod nga nagatatap sini magapat-od nga ang kada guwa matigayon gilayon sa Kingdom Hall.
Mga Ruta Sang Magasin: Dapat tinguhaan sang mga manugbantala nga magtukod sing isa ka ruta sang magasin sa tanan nga interesado nga luyag makabaton sing kada guwa. Ang personal nga pagdul-ong sang magasin sa sini magahatag sing mga kahigayunan nga mapalambo ang ginpakita nga interes kag makasugod sing mga pagtuon sa Biblia.—Tan-awa Ang Aton Ministeryo sa Ginharian, Oktubre 1998, pahina 8.
Yadtong May Pinasahi nga mga Kinahanglanon: Kon ang isa ka tawo nagpakita sing matuod nga interes apang nagapuyo sa wala maasayn nga teritoryo, isa ini ka eksepsion nga puwede sia makabaton sing mga magasin paagi sa suskripsion sa koreo. Kon ang isa ka tawo nga nagapuyo sa teritoryo sang kongregasyon indi malab-ot sang isa ka ruta sang magasin apang interesado gid nga makabaton sing mga magasin, binagbinaga ini upod sa Komite sang Pag-alagad sa Kongregasyon. Kon aprobahan nila, maghimo sing suskripsion para sa interesado nga tawo. Ang kinaandan nga pormas para sa suskripsion (M-1 kag M-101) mahimo magamit sa sini nga katuyuan.
Makasalig kita nga padayon nga pakamaayuhon ni Jehova ang aton tanan nga panikasog nga ibantala ang Ginharian paagi sa Ang Lalantawan kag Magmata!