Maghiusa sing Tingob

¹ Daw ano kasunson ka nga nagadayaw sa malantipon nga desinyo sang lawas sang tawo? (Sal. 139:14) Ang kada bahin sang lawas nagapanghikot sing nahiusa sa iban nga bahin. Ginapaanggid sang Pulong sang Dios ang Cristianong kongregasyon sa isa ka nahiusa sing maayo nga lawas. Sa idalom sang Ulo nga si Cristo, ang tanan nga katapo sang kongregasyon “naangot sing sibu kag nagabuligay paagi sa tagsa ka lutalutahan nga nagahatag sang kon ano ang kinahanglanon.” (Efe. 4:​16a) Busa, ginagamit ni Jehova ang iya nahiusa nga katawhan sa paghimo sing makatilingala nga mga butang.

² Ang mga katapo sang unang-siglo nga kongregasyon nanghikot “nga may paghiusa” sa pagtatap sa espirituwal kag materyal nga mga kinahanglanon sang tagsatagsa. (Binu. 2:​44-​47) Upod ang pagsakdag ni Jehova, nahiusa nga gin-atubang nila kag ginlandas ang mapintas nga paghingabot. (Binu. 4:​24-​31) Ginbantala nila ang mensahe sang Ginharian bisan diin sila makadto, kag ginpahayag ang maayong balita sa mga bahin sang kalibutan nga nakilal-an sadto nga tion. (Col. 1:​23) Sa modernong tion, nahiusa nga ginahimo sang Cristianong kongregasyon ang amo man nga mga butang sa mas daku pa nga kasangkaron. Anong mga butang ang nagapaposible sa sini nga paghiusa?

³ Ginhiusa sang Panudlo sang Dios: Sa bug-os nga globo, ginahiusa kita sang aton pagsimba. Paano ini nangin posible? Ginakilala naton ang kitaon nga palaagyan ni Jehova sa pag-aman sing espirituwal nga “pagkaon sa nagakaigo nga tion.” (Mat. 24:45) Ginapabaloran man naton ang “dulot nga mga lalaki” nga ginhatag niya subong mga manunudlo sa kongregasyon. Samtang mapainubuson nga ginabaton naton ang mga aman ni Jehova sa pagpakaon sa aton sa espirituwal, nagatubo ang aton paghangop sa Pulong sang Dios kag ginapukaw ang aton handum nga ilugon si Jesus subong mga disipulo niya. Dapat kita magpadayon sa pagtuon sa Pulong sang Dios, kag manikasog sing hanuot agod ‘makadangat sa paghiusa sa pagtuo.’ (Efe. 4:​8, 11-​13) Nagaamot ka bala sa aton espirituwal nga paghiusa paagi sa pagbasa sing Biblia adlaw-adlaw?

⁴ Ginhiusa sang Cristianong Paghiliupod: Ang gugma amo ang nagapasuod sa aton sa Cristianong mga miting. Sa sining mga miting, ‘ginabinagbinag naton ang isa kag isa.’ (Heb. 10:24, 25) Nagalakip ini sing indi lamang pagtulok sa nagguwa nga panagway kundi pagkilala gid sing suod sa aton mga kauturan, nagatamod sa ila kaangay sang pagtamod ni Jehova sa ila, subong bilidhon. (Hag. 2:7, footnote sa Ingles.) Samtang nagapamati kita sa ila mga pagpahayag sang pagtuo, nagadalom pa ang aton gugma sa ila kag nagabakod ang aton paghiusa. Kilala ka bala subong isa nga tayuyon nga nagatambong sa mga miting sang kongregasyon?

⁵ Mga Masigkamanugpangabudlay sa Latagon: Ang pagbantala sing maayong balita upod sa mga masigkatumuluo nagahiusa sa aton sa paghimo sing kabubut-on sang Dios. Ginapakabahandi gid ni Pablo ang iya “mga masigkamanugpangabudlay para sa ginharian sang Dios.” (Col. 4:​11) Ang pagpaambit sing mga eksperiensia kag pagbulig sa isa kag isa samtang yara sa ministeryo nagabulig sa aton sa pagtuman sang aton Cristianong tulumanon kag nagapabakod sang aton higot sang paghiusa.​—Col. 3:14.

⁶ Nagapahiusa nga Impluwensia sang Balaan nga Espiritu: Samtang maukod kita nga nagahimo sang iya kabubut-on, ginahatagan kita ni Jehova sang iya espiritu. Nagabulig ini sa aton sa pagpaiway sang mga di-paghangpanay kag sa pagpuyo sing tingob nga nahiusa. (Sal. 133:1) Nagapahulag ini sa aton nga “tipigan ang pagkaisa sa espiritu sa nagahiusa nga higot sang paghidait.” (Efe. 4:3) Ang tagsatagsa sa aton makabulig sa paghiusa sang katawhan sang Dios paagi sa pagpadayag sing mga bunga sang espiritu sa aton pagpakig-angot sa isa kag isa.​—Gal. 5:​22, 23.

⁷ Ang pag-alagad sing tingob nga nahiusa sa idalom sang pagkaulo ni Cristo “nagapatubo sa lawas agod nga maglig-on ini sa gugma.” (Efe. 4:​16b) Dugang pa, ginahimaya sini si Jehova, “ang Dios nga nagahatag sing paghidait.”​—Roma 16:​20.