Isa ka Mainit nga Pangabay nga Pamatian ang Nagapaandam nga mga Halimbawa para sa Aton Adlaw
Tanan kita sarang makapabakod sang aton determinasyon nga huptan ang aton integridad paagi sa pagpamati sa mga leksion nga matun-an gikan sa drama sang Biblia nga ginpakita sa video nga Warning Examples for Our Day. Antes ini tan-awon, palihug basaha ang Numeros kapitulo 25 kag ang may kaangtanan nga materyal sa Insight on the Scriptures, Tomo 2, pahina 419, parapo 3-5. Nian sabta ining mga pamangkot: Sin-o ang mga Moabinhon, kag ngaa ginsilingan ni Jehova si Moises nga indi makig-away sa ila? (Deut. 2:9) Paano nagpahito si Balaam nga gamiton ang mga Moabinhon agod malaglag ang pungsod sang Israel? Ngaa indi naton dapat pagkalipatan nga madamo nga mga Israelinhon ang napaslawan sa importante nga pagtilaw antes sang pagsulod nila sa Ginsaad nga Duta?—1 Cor. 10:11, 12.
Samtang ginatan-aw ang Warning Examples nga video, hunahunaa ang masunod nga apat ka bahin sang aton kabuhi nga dapat naton hatagan sing daku nga igtalupangod karon kon luyag naton nga mangin matutom kag kahamut-an sang Dios. (1) Panimuot: Paano nagpakita ang pila ka Israelinhon sing sayop nga panimuot kay Jehova kag sa iya mga kahimusan? Sa baylo, ano nga panimuot ang dapat naton tinguhaan nga ipakita? (2) Mga Kaupdanan: Ngaa indi luyag ni Jehova nga mangin abyan sang mga Israelinhon ang mga Moabinhon? (Ex. 34:12; Hulu. 13:20) Ngaa dapat naton pilion sing maalamon ang aton mga abyan? (3) Moral: Anong serioso nga sala ang nahimo sang mga 23,000 ka Israelinhon bangod sang malain nga mga pagpakig-upod? (1 Cor. 10:8) Sa karon, ano ang naghaylo sa pila ka katawhan sang Dios nga maghimo sing imoralidad, apang paano naton maamligan ang aton kaugalingon? (4) Pagsimba: Paano gintilawan ang mga Israelinhon tuhoy sa kaputli sang ila pagsimba? Anong malalangon nga sahi sang idolatriya ang sarang makasulay sa pila karon, apang paano naton ini malikawan?—Col. 3:5.
Sa drama, paano ginpakamaayo si Jamin bangod sang iya integridad sa moral? Paagi sa sini nga video, ano ang mainit nga ginapangabay sang Nagadumala nga Hubon sa tanan nga matuod nga mga Cristiano? Kon ulo ikaw sang pamilya, ngaa maalamon sa banta mo nga sulitsuliton tan-aw sang imo panimalay ini nga video?