Nagabulig Ka Bala Agod Mangin Sibu ang Report?

¹ Madamo nga rekord sa Biblia ang nagalakip sang espesipiko nga mga kadamuon, nga nagabulig sa pagpaalinton sing maathag nga laragway kon ano ang natabo. Halimbawa, ginlutos ni Gideon ang kampo sang Midian upod sa 300 lamang ka lalaki. (Huk. 7:⁠7) Ginpatay sang anghel ni Jehova ang 185,000 ka soldado sang Asiria. (2 Hari 19:35) Sang Pentecostes 33 C.⁠E., mga 3,000 ang ginbawtismuhan, kag wala madugay pagkatapos sadto nagdugang ang kadamuon sang mga tumuluo tubtob sa 5,000. (Binu. 2:​41; 4:⁠4) Maathag gikan sa sini nga mga rekord nga nagpanikasog gid ang dumaan nga mga alagad sang Dios nga maghimo sing isa ka kompleto kag sibu nga rekord.

² Ginasugo kita karon sang organisasyon ni Jehova nga ireport ang aton hilikuton sa pag-alagad sa latagon kada bulan. Ang pagkooperar naton sing matutom sa sining kahimusan nagaamot agod mangin epektibo ang pagdumala sa pagbantala nga hilikuton. Ang report mahimo magpakita nga ang isa ka bahin sang ministeryo dapat hatagan sing igtalupangod ukon kinahanglan pa ang dugang nga mga manugpangabudlay sa isa ka duog. Sa kongregasyon, ang mga report sa pagbantala sa latagon nagabulig sa mga gulang nga mahibaluan ang mga may kahigayunan nga mapasangkad ang ila ministeryo subong man ang mga nagakinahanglan sing bulig. Kag ang mga report sa pag-uswag sang hilikuton sa pagbantala sang Ginharian nagapalig-on sa bug-os nga Cristianong paghiliutod. Ginahimo mo bala ang imo bahin agod mangin sibu ang report?

³ Ang Imo Personal nga Responsabilidad: Sa katapusan sang bulan, nabudlayan ka bala nga dumdumon ang imo nahimo sa ministeryo? Kon amo, ngaa indi mo dayon pag-irekord ang imo hinimuan sa kada guwa mo sa latagon? Ang iban nagagamit sang kalendaryo ukon lista-adlawan. Ang iban nagadala sang blangko nga pormas para sa report sa pag-alagad sa latagon. Sa katapusan sang bulan, ihatag dayon ang imo report sa manugtatap sa pagtinuon sa libro. Ukon, kon luyag mo, sarang mo ini mabutang sa kahon para sa report sa Kingdom Hall. Kon nalipat ka sa pagreport, pakig-anguti dayon ang manugtatap sa pagtinuon sa libro sa baylo nga maghulat ka nga palapitan niya. Ang maukod nga pagreport sang imo hilikuton nagapakita sang pagtahod sa kahimusan ni Jehova kag sang mahigugmaon nga konsiderasyon sa mga kauturan nga gin-asayn sa pagkolekta kag paglista sang mga report.​​—⁠Luc 16:10.

⁴ Ang Papel sang Manugtatap sa Pagtinuon sa Libro: Subong alisto kag mainulikdon nga manugbantay, interesado ang manugtatap sa pagtinuon sa libro sa hilikuton sang grupo sa bug-os nga bulan. (Hulu. 27:23) Nahibaluan niya kon bala ang tagsa ka manugbantala may regular, mabungahon, kag makalilipay nga pagpakigbahin kag maabtik sa pagbulig kon may isa nga wala makapakigbahin sa bug-os nga bulan. Ang makapalig-on nga mga pulong, praktikal nga panugda, ukon pagtanyag nga updan sia sa pag-alagad sa latagon amo lang sa masami ang kinahanglanon.

⁵ Sa katapusan sang bulan, ginapat-od sang manugtatap sa pagtinuon sa libro nga ang tanan sa grupo naghimo sang ila responsabilidad sa pagreport sang ila hilikuton agod ang sekretaryo makahulog sang sibu nga report sang kongregasyon sa sanga talatapan sa petsa seis sang masunod nga bulan. Samtang nagahilapit ang katapusan sang bulan, mas maayo kon pahanumdumon niya ang grupo kag mag-aman sing mga pormas para sa report sa ginahiwatan sang pagtinuon sa libro. Kon may malipaton sa pagreport sang ila hilikuton, makahatag sia sing nagakaigo nga mga pahanumdom kag pagpalig-on.

⁶ Ang paghatag naton gilayon sing mga report sa pag-alagad sa latagon nagabulig agod ang report nagapakita sing sibu kon ano ang nahimo sa latagon. Himuon mo bala ang imo bahin paagi sa pagreport gilayon sang imo hilikuton kada bulan?