Ipagamit Mo Bala ang Imo Puluy-an?
1 Sang una nga siglo, madamo nga mga Cristiano ang nagpagamit sang ila mga puluy-an para sa mga miting sa kongregasyon. (1 Cor. 16:19; Col. 4:15; Filem. 1, 2) Sa pila ka kongregasyon karon, kulang ang mga tilipunan para sa grupo nga Pagtinuon Sang Kongregasyon sa Libro kag sa mga miting sa pag-alagad sa latagon. Mahimo ini magaresulta sa pila ka mga grupo sang pagtinuon sa libro nga may 30 ukon kapin pa nga tumalambong, nga mas sobra sangsa ginarekomendar nga kadamuon nga mga 15.
2 Isa ka Maayo nga Pribilehiyo: Nabinagbinag mo na bala nga ipagamit ang imo puluy-an para sa Pagtinuon Sang Kongregasyon sa Libro? Ang isa ka bastante sing kadakuon nga hulot nga matinlo, masanag, kag maaliwanay bagay gid sa sini. Sanglit ang pagtinuon sa libro isa ka miting sang kongregasyon kag bahin sang kahimusan ni Jehova nga tudluan ang iya katawhan, isa ka maayo nga pribilehiyo nga may pagtinuon sa libro sa inyo puluy-an. Madamo ang nagasiling nga nakabenepisyo sila sa espirituwal bangod ginpagamit nila ang ila puluy-an sa sini nga katuyuan.
3 Kon nagakabagay ang imo puluy-an, ipahibalo dayon ini sa mga gulang. Mahimo nga nagapangita sila sang dugang nga mga lokasyon. Kon indi posible nga mahiwat ang pagtinuon sa libro sa imo puluy-an, sarang bala ini mahiwatan sang miting sa pag-alagad sa latagon? Bisan pa nga indi ini kinahanglanon subong, nalipay ang mga gulang nga mahibaluan nga sarang magamit ang imo puluy-an. Basi matigayon mo ini nga pribilehiyo sa palaabuton.
4 Pagpakita Sing Maayong mga Batasan: Kon nagatipon sa pribado nga puluy-an, ang tanan nga tumalambong dapat mangin matinahuron sa propiedad sang tagbalay. Dapat pat-uron sang mga ginikanan nga ang ila mga kabataan yara lang sa duog nga ginatun-an, sa baylo nga magkadto sa pribado nga mga duog sang puluy-an. Ang konsiderasyon dapat man ipakita sa mga kaingod, nagahalong gid nga indi sila maperwisyo.—2 Cor. 6:3, 4; 1 Ped. 2:12.
5 Ginapalig-on kita sang Hebreo 13:16 nga dili malimot “sa paghimo sing maayo kag sa pagpaambit sang mga butang sa iban, kay sa amo nga mga halad nahamuot gid ang Dios.” Ang pagpagamit sang imo puluy-an para sa isa ka miting sa kongregasyon isa ka maayo nga paagi sa pagpaambit sing maayong mga butang sa iban kag sa ‘pagpadungog kay Jehova paagi sa imo bilidhon nga mga butang.’—Hulu. 3:9.