Magbantala kag Magpanaksi sing Maid-id
1 Subong “lider kag kumandante,” ginhanda ni Jesus ang iya mga disipulo para sa masangkad nga pagbantala nga hilikuton nga yara sa unahan. (Isa. 55:4; Luc. 10:1-12; Binu. 1:8) Ginlaragway ni apostol Pedro ang ginsugo sa ila ni Jesus paagi sa sining mga pulong: “Ginsugo niya kami sa pagbantala sa mga tawo kag sa paghatag sing maid-id nga panaksi nga ini ang Isa nga gintangdo sang Dios nga mangin hukom sang mga buhi kag sang mga patay.” (Binu. 10:42) Ano ang nadalahig sa paghatag sing maid-id nga panaksi?
2 Madamo gid kita sing matun-an kon binagbinagon naton ang halimbawa ni apostol Pablo. Sang nakigkita sa tigulang nga mga lalaki sa kongregasyon sang Efeso, ginpahanumdom niya sila: “Wala ako mag-isol sa pagsugid sa inyo sang bisan ano man sa mga butang nga mapuslanon ukon sa pagtudlo sa inyo sa dayag kag sa pamalaybalay. Kundi nagpanaksi ako sing maid-id sa mga Judiyo kag sa mga Griego tuhoy sa paghinulsol sa Dios kag pagtuo sa aton Ginuong Jesus.” Walay sapayan nga nag-atubang sang mga pagtilaw, gintinguhaan ni Pablo nga mabantala ang maayong balita sa madamo gid nga tawo. Indi sia kontento nga ipaambit ang sadsaran lamang nga kamatuoran sa iya mga tagpalamati, kundi gintinguhaan niya nga ipaambit ang “tanan nga laygay sang Dios.” Agod mahimo ini, handa sia nga magpanikasog kag magsakripisyo. Nagsiling pa sia: “Wala ko pagkabiga ang akon kalag nga mahal sa akon kaugalingon, agod nga matapos ko ang akon dalaganon kag ang ministeryo nga akon nabaton kay Ginuong Jesus, sa pagpanaksi sing bug-os sa maayong balita sang di-bagay nga kaayo sang Dios.”—Binu. 20:20, 21, 24, 27.
3 Paano naton mailog karon ang halimbawa ni Pablo? (1 Cor. 11:1) Paagi sa pagpangita sing takus nga mga panimalay bisan pa nagaatubang kita sing mga pagtilaw, paagi sa pagdala sing maayong balita sa mga tawo sang tanan nga etniko nga grupo kag lenguahe, kag paagi sa makugi nga pagbulig sa mga interesado nga aton masapwan. (Mat. 10:12, 13) Nagakinahanglan ini sing tion, panikasog, kag gugma sa mga tawo.
4 Makaauxiliary Payunir Ka Bala? Ang bulan sang Marso, Abril, kag Mayo makahatag sing maayo nga kahigayunan sa imo nga makapanaksi sing maid-id paagi sa pag-auxiliary payunir. Daw ano ka makapalig-on sang nagligad nga tuig nga makita ang madamo nga naghimo sing pinasahi nga panikasog nga mag-auxiliary payunir!
5 Isa ka 80 anyos nga utod nga babayi ang napahulag sang pagpalig-on nga ginhatag sang organisasyon ni Jehova. Sia nagsulat: “Ginpukaw sini ang handum nga madugay na sa akon tagipusuon, kag nagbatyag ako nga dapat ako mag-auxiliary payunir bisan makaisa na lang.” Namat-od sia nga himuon ini sa Marso. “Una,” siling niya, “naglingkod ako kag ginbulubanta ang kabilihanan. Ginpakighambal ko ang akon plano sa akon anak nga babayi bangod kinahanglan ko ang iya bulig. Ginkibot niya ako sang mag-aplay man sia.” Nakahinguyang ang tigulang na nga utod nga babayi sing 52 ka oras sa sadto nga bulan. “Madamo nga beses nga nangamuyo ako sing kusog kay Jehova kon mabatyagan ko nga maubusan na ako sini. Sa katapusan sang bulan, nalipay gid ako kag naayawan, kag ginpasalamatan ko pirme si Jehova nga ginbuligan niya ako. Luyag ko nga tilawan ini liwat.” Ang makalilipay niya nga eksperiensia sarang makapalig-on sa iban nga luyag gid mag-auxiliary payunir walay sapayan sang malubha nga mga problema sa panglawas.
6 Isa ka utod nga lalaki nga wala ginapaabot nga madulaan sing trabaho ang naghimulos sang kahigayunan kag nag-auxiliary payunir. Samtang nagaligad ang inadlaw, nadugangan pa gid ang iya kakugi sa pagbantala, kag sang matapos ang bulan, may bag-o sia nga pagtuon sa Biblia. Nagahunahuna tuhoy sa iya eksperiensia, sia nagsiling: “Maayo gid nga bulan!” Nalipay gid sia bangod sang panuytoy kag bulig ni Jehova! Huo, ginbubo ni Jehova ang bugana nga pagpakamaayo sa iya bangod sang dugang niya nga panikasog sa ministeryo, kag amo man sini ang himuon ni Jehova sa imo.—Mal. 3:10.
7 Para sa madamo, indi mahapos ang mag-auxiliary payunir. Apang, walay sapayan sang mga responsabilidad sa sekular kag pamilya kag subong man sang personal nga mga problema, madamo nga kauturan ang nakahimo sini. Ang maid-id nga pagpanaksi masami nagalakip sa pagsakripisyo sang aton hamili nga tion kag enerhiya, apang indi matumbasan ang mga pagpakamaayo sini.—Hulu. 10:22.
8 Maayo nga mga bulan ang Marso, Abril, kag Mayo para mag-auxiliary payunir. May lima ka Sabado kag Domingo sa Marso kag lima ka Sabado sa Mayo. Bakasyon man ini nga mga bulan para sa mga nagaeskwela. Posible sa nagatrabaho nga mag-auxiliary payunir kon himuslan nila ang ekstra nga Sabado kag Domingo kag ang mga piesta opisyal kag magpangabudlay sa pila ka gab-i. Agod makaiskedyul sing 50 ka oras sa ministeryo sa Marso, Abril, ukon Mayo, sarang mo bala magamit ang isa sa ginpanugda nga mga iskedyul sa pag-auxiliary payunir nga ginlakip sa sini nga artikulo? Hambali ang imo iskedyul upod sa iban; pat-od nga ang iban mapalig-on nga updan ikaw sa ministeryo. Kon indi ka makaauxiliary payunir, maghimo sing espesipiko nga tulumuron para sa sining mga bulan, kag sakdaga yadtong makapayunir. Magplano na karon agod makabantala pa sing dugang sa Marso, Abril, kag Mayo.
9 Ipakita ang Apresasyon sa Memoryal: Kada tuig kon panahon sang memoryal, ang pagpasalamat sa gawad nagpahulag sa linibo nga ‘magbakal sing tion’ agod mag-auxiliary payunir. (Efe. 5:15, 16) Sang nagligad nga tuig diri sa Pilipinas, may 9,515 ka auxiliary payunir sang Marso, 15,458 sang Abril, kag 12,652 sang Mayo. Sa tagsa sining tatlo ka bulan may promedyo ini nga 12,542. Mas mataas gid ini kon ipaanggid sa promedyo nga kadamuon nga 1,691 nga nag-auxiliary payunir sang nagligad nga mga bulan sang tuig sang pag-alagad. Ining panahon sang Memoryal karon isa pa ka maayo nga oportunidad agod mapakita naton ang sinsero nga pagpasalamat sa halad gawad ni Cristo paagi sa pagpakigbahin sing dugang pa sa ministeryo sa latagon.
10 Samtang nagahilapit ang Abril 16, binagbinaga kon ano ang kahulugan sang Memoryal sa imo. Hunahunaa ang mga hitabo nga nagdul-ong sa kamatayon ni Cristo kag ang mga butang nga iya gid ginakabalak-an. Pamalandungi man ang kalipay nga ginpahamtang sa atubangan ni Jesus kag kon paano ini nakabulig sa iya nga mabatas yadtong mga pagpaantos. Hunahunaa ang iya karon posisyon subong Ulo sang kongregasyon, nga nagadumala sang hilikuton sa pagbantala kag paghimo sing disipulo. (1 Cor. 11:3; Heb. 12:2; Bug. 14:14-16) Nian ipakita ang imo pagpasalamat sa tanan nga nahimo ni Cristo paagi sa pagpakigbahin sing bug-os sa pagbantala tubtob ginapahanugot sang imo kahimtangan.
11 Palig-una ang Iban nga Mangin Maid-id: Kon mag-auxiliary payunir ang mga gulang kag ministeryal nga mga alagad, mapalig-on gid nila ang iban. Kon nagapakig-upod sa mga manugbantala sa ministeryo sa latagon kag kon nagahimo sing mga pagduaw subong manugbantay, may kahigayunan sila nga buligan ang iban sa pagpakigbahin sing bug-os sa sining pinasahi nga hilikuton. Kabay nga ipangamuyo naton tanan ining pinasahi nga hilikuton, sa amo nagapabakod sang aton nahiusa nga mga panikasog sa pagpanaksi sing maid-id.
12 Samtang nagapangabudlay sing nahiusa ang mga gulang kag ministeryal nga mga alagad sa mga kahimusan sang kongregasyon para sa dugang nga hilikuton sa bulan sang Marso, Abril, kag Mayo, dapat maghimo sing nagakaigo nga mga kahimusan ang manugtatap sa pag-alagad agod mapahituhog ang hilikuton sa pagbantala. Dapat organisahon niya ang mga teritoryo, adlaw, kag tion sa pag-alagad sa latagon nga kombeniente sa kalabanan nga mga manugbantala kag ipahibalo ini sing regular sa Miting sa Serbisyo. Sarang makahimo sing mga kahimusan nga magguwa sa latagon sing pila ka beses sa nagkalainlain nga oras sa isa ka adlaw, agod mahatagan sing kahigayunan ang tanan sa kongregasyon nga makapakigbahin sa pila ka porma sang pagpanaksi. Mahimo ini maglakip sa pagpangabudlay sa duog sang negosyo, pagpanaksi sa dalan, pamalaybalay, mga pagduaw liwat, kag pagpanaksi paagi sa telepono. Dugang pa, dapat may bastante nga suplay sang literatura, mga magasin, kag teritoryo nga magamit sa sining mga bulan.
13 Ang tanyag sa Marso amo ang Ihibalo nga libro, upod ang tulumuron nga magsugod sing mga pagtuon sa Biblia. Ang maayo nga mga panugda sa pagtanyag sing Ihibalo nga libro nagguwa sa suplemento sang Mayo 2002 nga Ang Aton Ministeryo sa Ginharian. Ang tanyag sa Abril amo ang mga magasin nga Ang Lalantawan kag Magmata! Tinguhai nga gamiton ang ginapanugda nga mga presentasyon sa “Kon Ano ang Isiling Tuhoy sa mga Magasin.” Ang tanan dapat maghanda sing maayo agod makapanaksi sing maid-id.
14 Malipayon gid kita nga nagapanghikot sa idalom sang panuytoy sang Ulo sang kongregasyon, si Cristo Jesus, kag sa pribilehiyo nga masugid ang maayong balita sa iban! Samtang nagahilapit ang bulan sang Marso kag Abril, panikasugan naton liwat nga himuon ini nga labing mabungahon nga mga bulan samtang ginasunod naton ang sugo ni Cristo nga magbantala kag magpanaksi sing maid-id.
[Kahon sa pahina 4]
Nagkalainlain nga Iskedyul sa Pag-auxiliary Payunir sa Marso, Abril, kag Mayo 2003
Adlaw Oras
Lunes 1 2 — — 2 —
Martes 1 — 3 — — —
Mierkoles 1 2 — 5 — —
Huebes 1 — 3 — — —
Biernes 1 2 — — — —
Sabado 5 4 3 5 6 7
Domingo 2 2 3 2 2 3
Marso 56 56 54 55 50 50
Abril 50 50 51 53 — —
Nagakaigo bala ang isa sining mga iskedyul sa imo?