Bag-o nga Kahimusan Para sa mga Librarya sa Kingdom Hall
Sa sulod sang madamo na nga tinuig, ang mga kongregasyon sa bug-os nga duta nakabenepisyo sa paggamit sang ila librarya sa Kingdom Hall, nga ginatawag anay nga librarya sang Teokratikong Eskwelahan Para sa Ministeryo. Sang nagligad, ginhunahuna nga kinahanglan may kaugalingon nga librarya ang tagsa ka kongregasyon. Apang, bangod madamo nga mga Kingdom Hall ang ginagamit na sang kapin sa isa ka kongregasyon, nga ang iban sini dumuluong sing hambal nga mga kongregasyon, daw mas maayo nga may isa lang ka kompleto nga librarya sa tagsa ka grupo nga tuhay sing lenguahe sa kada Kingdom Hall. Sa mga Kingdom Hall nga sobra sa isa ang awditoryum, ang kada awditoryum dapat may librarya sa tagsa ka grupo nga tuhay sing lenguahe nga nagatipon sa sini.
Ginapaabot nga ini nga kahimusan makabulig sa pagkinot sang duog kag gasto. Dugang pa, ang pagtingob sing librarya sang duha ukon kapin pa nga kongregasyon magaresulta sa mas maayo pa nga mga librarya. Samtang ginatingob ini, ang sobra nga mga kopya sang libro sarang matago kag magamit sa ulihi kon may bag-o nga mga Kingdom Hall nga tukuron. Kon ang Kingdom Hall may kompyuter nga nagagamit sing Watchtower Library sa CD-ROM, mapuslanon gid ini nga kagamitan.
Sa kada librarya sang Kingdom Hall, ang isa ka utod nga lalaki, mas maayo kon isa sang mga manugtatap sang Teokratikong Eskwelahan Para sa Ministeryo, amo ang mangin librarian. Dapat niya idugang ang nagakaigo nga mga publikasyon, ginamarkahan sing mahipid ang panghapin sa sulod bilang tanda nga para ini sa librarya sang Kingdom Hall. Sa di-magkubos kis-a sa isa ka tuig, dapat usisaon niya ang librarya kon wala sing nadula kag pat-uron nga maayo ang kahimtangan sang mga publikasyon. Ang mga publikasyon sa sining mga librarya indi dapat pagdalhon sa guwa sang Kingdom Hall.
Ginaapresyar gid sang tanan nga nagapakig-upod sa kongregasyon ang librarya sa Kingdom Hall. Kabay nga ipakita naton nga ginapabaloran naton ini nga kahimusan paagi sa pag-atipan sini kag paggamit sini sa pagpanalawsaw sing “ihibalo mismo sang Dios.”—Hulu. 2:5.