“Higugmaa Ninyo ang Ginuo, Tanan Kamo nga Balaan Niya”
Ang Kamatayon ni Jesus Pagasaulugon sa Abril 4
1 Sang nagligad nga pila ka tuig, sang ang Ukraine yara sa idalom sang paggahom sang Komunista, ginbantayan sing maayo sang mga awtoridad ang mga kauturan—ilabi na kon nagapalapit ang petsa sang Panihapon sang Ginuo—bangod naglaum sila nga madiskobrehan nila ang ila duog tilipunan. Problema ini pirme, bangod nahibaluan sang awtoridad ang petsa sang pagsaulog. Ano ang mahimo sang mga kauturan? Ang puluy-an sang isa ka utod nga babayi may nagabaha nga basement. Bangod wala ginapaabot sang mga awtoridad nga ang mga tawo magatipon didto, naghimo sing salog ang mga kauturan sa ibabaw sang tagatuhod nga tubig. Bisan pa kinahanglan nga magpungko sila sa salog nga nagaduko kay malapit na ini sa kisame, wala sing nagtublag sa ila samtang malipayon nga ginsaulog sang kongregasyon ang Memoryal.
2 Ang determinasyon sang mga kauturan naton sa Ukraine nga tumanon ang sugo nga saulugon ang kamatayon ni Jesus isa ka pinasahi gid nga pagpasundayag sang ila gugma sa Dios. (Luc. 22:19; 1 Juan 5:3) Kon nagaatubang kita sing mga balagbag sa aton kabuhi, kabay nga mapalig-on kita sini nga mga halimbawa kag mangin determinado sa pagtambong sa pagsaulog sang Panihapon sang Ginuo sa Abril 4. Paagi sa paghimo sini, ginapakita naton nga nagaugyon kita sa panimuot sang salmista nga nag-amba: “Higugmaa ninyo ang GINUO, tanan kamo nga balaan niya.”—Sal. 31:23.
3 Buligi ang Iban nga Maglambo ang Gugma Nila sa Dios: Ang gugma sa Dios magapahulag man sa aton nga agdahon ang iban nga tambungan ang pagsaulog kaupod naton. Ang suplemento sang Pebrero nga Ang Aton Ministeryo sa Ginharian nagapalig-on sa kada isa sa aton nga maghimo sing listahan sang ginaplano naton nga agdahon sa Memoryal. Ginapanikasugan mo gid bala nga maagda ang tagsa ka tawo nga yara sa imo listahan? Ipaathag sing maayo sa ila ang importansia sini nga okasyon. Ang mainabyanon nga pagpahanumdom sang adlaw kag oras sang Memoryal kag, kon kinahanglanon, ang pagtanyag nga sugaton sila mahimo makapalig-on sa ila nga magtambong.
4 Sa duog tilipunan para sa Memoryal, panikasugi gid nga tamyawon yadtong nagbaton sang aton pangagda, kag pabatyaga sila nga ginaabiabi. Paano mo sila mabuligan nga maglambo ang ila gugma kay Jehova? Sabta ang ila mga pamangkot. Mangin alisto sa pagtanyag sing pagtuon sa Biblia kon nagakaigo. Agdaha sila nga magtambong sa aton mga miting sa kongregasyon kada semana. Ilabi na nga talupangdon sang mga gulang ang mga di-aktibo nga mga Cristiano nga nagtambong. Sarang sila makahimo sing kahimusan nga duawon sila kag palig-unon nga magpanghikot liwat, ayhan nagapadaku sang mga punto nga ginpresentar sa pamulongpulong sa Memoryal.—Roma 5:6-8.
5 Pagpadalom Sang Aton Gugma kay Jehova: Ang pagpamalandong sa dulot sang halad sarang makapadalom sang aton gugma kay Jehova kag sa iya Anak. (2 Cor. 5:14, 15) Ang isa ka madugay na nga nagatambong sa Memoryal nagsiling: “Pirme namon ginapaabot ang Memoryal. Nangin espesyal pa gid ini kada tuig. Madumduman ko pa nga nagatindog ako sa punerarya 20 ka tuig na ang nakaligad, nga nagatan-aw sa akon pinalangga nga amay kag nagapasalamat gid sa gawad. Nangin ihibalo lamang ini sadto. Ti, nahibaluan ko ang tanan nga kasulatan kag kon paano ini ipaathag! Apang sang nabatyagan ko lamang ang daku nga epekto sang kamatayon nga nalipay gid ako sa sarang mahimo sa aton sining hamili nga gawad.”—Juan 5:28, 29.
6 Samtang nagapalapit ang petsa sang memoryal sini nga tuig, magpain sing tion nga ihanda ang imo tagipusuon para sa okasyon. (2 Cron. 19:3) Pamalandungi ang pinasahi nga pagbasa sing Biblia sa Memoryal, nga makita sa Pag-usisa sa Kasulatan sa Adlaw-adlaw—2004 kag sa 2004 Calendar. Ang pila nagarepaso sang kapitulo 112-16 sang Pinakabantog nga Tawo nga libro sa tion sang pagtinuon sang pamilya. Ang iban nagapanalawsaw sing dugang nga nagagamit sing mga bulig sa pagtuon nga gin-aman paagi sa matutom kag mainandamon nga ulipon nga klase. (Mat. 24:45-47) Sarang naton tanan malakip sa aton hanuot nga mga pangamuyo ang dulot nga gawad. (Sal. 50:14, 23) Huo, sa panahon sining Memoryal, kabay nga padayon naton nga pamalandungan ang gugma ni Jehova sa aton kag mangita kita sing paagi nga ipakita ang aton gugma sa iya.—Mar. 12:30; 1 Juan 4:10.