Ipasundayag ang Espiritu sang Pagpayunir
1. Paano mo ipaathag ang espiritu sang pagpayunir?
1 Makapayunir man sila karon ukon indi, sarang mapakita sang tanan nga manugbantala sang Ginharian ang espiritu sang pagpayunir. Luyag gid nila tumanon ang sugo nga magbantala kag maghimo sing disipulo. (Mat. 28:19, 20; Binu. 18:5) Nagaulikid sila sa mga tawo kag nagasakripisyo agod matuman ang ila ministeryo. (Mat. 9:36; Binu. 20:24) Handa ang mga alagad ni Jehova nga himuon ang bisan ano agod mabuligan ang iban nga makatuon sang kamatuoran. (1 Cor. 9:19-23) Binagbinagon naton ang halimbawa sang isa nga nagpakita sinang espiritu, si Felipe nga ebanghelisador.
2. Paano mailog sang mga gulang kag sang mga ministeryal nga alagad ang kakugi ni Felipe sa ministeryo?
2 Pagbantala kag Pagtudlo: May mabug-at nga responsabilidad si Felipe sa unang-siglo nga kongregasyon. (Binu. 6:1-6) Apang, makugi gihapon sia sa pagbantala sang maayong balita. (Binu. 8:40) Busa karon, samtang nagaatipan sang gin-asayn sa ila nga mga hilikuton, sarang mapakita sang mga gulang kag sang mga ministeryal nga alagad ang espiritu sang pagpayunir paagi sa mapagsik nga pagpanguna sa ministeryo. Nagalig-on gid sini ang espiritu sang kongregasyon!—Roma 12:11.
3. Paano naton mapakita ang espiritu sang pagpayunir kon may mga kabudlayan kita?
3 Sang mapatay si Esteban, madamo nga mga disipulo ang nabudlayan bangod sang mga paghingabot. Apang si Felipe nagpadayon sa pagbantala, kag may daku sia nga bahin sa pagbukas sing hilikuton sa tunga sang mga Samaritano. (Binu. 8:1, 4-6, 12, 14-17) Sarang naton mailog ang iya halimbawa paagi sa padayon nga pagbantala sang maayong balita bisan may kabudlayan kag paagi sa pagbantala sing walay pinilian sa tanan naton nga masumalang.—Juan 4:9.
4. Ano nga halimbawa ang ginpahamtang ni Felipe subong manunudlo?
4 Ang kalantip ni Felipe subong manunudlo sang Pulong sang Dios sarang makita sa kasaysayan sang pagkumbertir sa Etiopianhon nga eunuco. (Binu. 8:26-38) Ang pagpalambo sing ikasarang sa paggamit sing Biblia kag sa ‘pagpangatarungan gikan sa Kasulatan’ isa pa ka paagi agod nga mapakita naton ang espiritu sang pagpayunir. (Binu. 17:2, 3) Kaangay ni Felipe, ginatinguhaan naton nga ipakig-ambit ang maayong balita bisan diin man masapwan ang mga tawo kag sa tagsa ka nagakaigo nga okasyon.
5. Ano ang makabulig sa Cristianong mga ginikanan nga mapatudok sa ila kabataan ang espiritu sang pagpayunir?
5 Pamilya kag Kongregasyon: Maayo gid ang epekto sang panimuot kag halimbawa ni Felipe sa iya mga anak nga babayi. (Binu. 21:9) Sing kaanggid, ang Cristianong mga ginikanan nga nagasentro sang ila kabuhi sa mga interes sang Ginharian nagapalig-on sa ila kabataan nga himuon man ini. Bisan kapoy sa masako nga hilikuton sa bug-os nga semana, ang isa ka ginikanan nga nagabantala sing mapagsik sa iban sarang makabilin sing mapinadayunon nga impresyon sa tagipusuon sang isa ka bata.—Hulu. 22:6.
6. Paano naton mapakita ang apresasyon sa mga payunir sa aton kongregasyon?
6 Nangin maabiabihon si Felipe kanday Pablo kag Lucas, mga matutom nga mga Cristiano nga nangabudlay sing lakas sa pag-alagad kay Jehova. (Binu. 21:8, 10) Paano naton mapakita ang aton apresasyon kag suporta sa mga makugi subong? Ayhan makaupod kita sa mga payunir sa aga ukon hapon diin diutay lamang ang nagagua sa ministeryo. (Fil. 2:4) Sarang man naton sila maagda sa aton puluy-an para sa makapalig-on nga paghambalanay. Ano man ang aton kahimtangan, kabay nga tanan kita manikasog nga ipasundayag ang espiritu sang pagpayunir.