Ang mga Pagpakamaayo sang Ministeryo nga Pagpayunir
“Ang pagpakamaayo ni Jehova—amo ina ang nagapamanggad, kag wala sia nagadugang sing kasakit sa sini.”—HULUBATON 10:22.
1, 2. (a) Paano ginpabutyag sang isa ka payunir ang iya mga balatyagon tuhoy sa bug-os tion nga ministeryo? (b) Ngaa ang mga payunir yara sa kahimtangan nga maagom sing labi pa ang mga kalipay sang paghimo sing disipulo?
“MAY daku pa bala nga kalipay sangsa makita ang imo ginatun-an nga mangin isa ka aktibo nga dumalayaw ni Jehova? Makalilipay kag makapabakod-sing-pagtuo nga makita kon daw ano ka gamhanan ang Pulong sang Dios sa pagpahulag sa mga tawo sa paghimo sing mga pagbalhin sa ila kabuhi agod pahamut-an si Jehova.” Amo sina ang ginsulat sang isa ka payunir nga taga-Canada nga nagaalagad sing bug-os tion sa sulod sang kapin sa 32 ka tuig. Nahanungod sa iya ministeryo nga pagpayunir, sia nagsiling: “Indi ko mahunahuna nga may iban pa nga ginahimo. Indi ko gid mahunahuna nga may butang pa nga makahatag sing amo sini nga kalipay.”
2 Nagaugyon ka bala nga daku ang kalipay sa pagpakigbahin nga buligan ang isa sa dalan padulong sa kabuhi? Sa pagkamatuod, indi lamang mga payunir ang nagaagom sini nga kalipay. Ang tanan nga alagad ni Jehova ginasugo nga “maghimo sing mga disipulo sa mga tawo,” kag ginapanikasugan nila nga himuon ini. (Mateo 28:19) Apang, bangod ang mga payunir sarang makahinguyang sing madamong oras sa ministeryo sa latagon, masunson nga yara sila sa kahimtangan nga makaagom sing mas daku nga kalipay sa paghimo sing disipulo. Apang ang pagpayunir may iban man nga mga padya. Makigsugilanon sa mga payunir, kag sugiran ka nila nga ang pagpayunir isa ka makalilipay nga paagi agod maagom ang ‘pagpakamaayo ni Jehova nga nagapamanggad.’—Hulubaton 10:22.
3. Ano ang mahimo nga magapapagsik sa aton samtang nagapadayon kita sa pag-alagad kay Jehova?
3 Sining karon lang, ang mga payunir gikan sa lainlain nga bahin sang kalibutan ginpangabay nga ilaragway ang mga pagpakamaayo nga naagom nila sa bug-os tion nga ministeryo. Binagbinagon naton ang ginsiling nila. Apang, indi maluyahan sing buot kon ang imo pag-alagad limitado bangod sang mapigaw nga panglawas, katigulangon, ukon iban pa nga mga kahimtangan. Dumduma, ang importante nga butang amo ang pag-alagad kay Jehova sing bug-os kalag, sa bisan ano man nga ikasarang. Walay sapayan, ang pagpamati sa mga komento sang pila ka payunir mahimo nga magapukaw sa imo kaluyag sa pagsulod sa sining makapaladya nga hilikuton kon mahimo pa lang.
Tudok nga mga Balatyagon Sang Kaayawan kag Kalipay
4, 5. (a) Ngaa ang pagpaambit sing maayong balita sa iban isa ka makapaladya nga eksperiensia? (b) Ano ang balatyagon sang mga payunir tuhoy sa pagpakigbahin sing bug-os tion sa ministeryo?
4 “Mas daku ang kalipay sa paghatag sangsa pagbaton,” siling ni Jesus. (Binuhatan 20:35) Huo, ang dimahamkunon nga paghatag may kaugalingon nga mga padya. (Hulubaton 11:25) Matuod ini ilabi na kon tuhoy sa pagpaambit sing maayong balita sa iban. Sa pagkamatuod, ano pa bala nga mas daku nga dulot ang sarang naton mahatag sa isa ka isigkatawo sangsa buligan sia nga makatigayon sing ihibalo sang Dios, nga nagadul-ong sa kabuhi nga walay katapusan?—Juan 17:3.
5 Sing dimakapakibot, ang mga nagapakigbahin sa ministeryo sing bug-os tion masunson nga nagakomento tuhoy sa kalipay kag kaayawan nga naagom nila gikan sa ila ministeryo. “Nahibaluan ko nga wala na sing iban pa nga hilikuton ang makahatag sa akon sing kaayawan nga matigayon paagi sa pagpaambit sing kamatuoran sa iban,” siling sang isa ka 64-anyos nga payunir nga taga-Britanya. Isa ka babaying balo nga taga-Zaire ang nagpabutyag kon ano ang kahulugan sa iya sang pagpayunir: “Ang payunir nga pag-alagad daku gid nga lugpay sa akon sa tapos magtaliwan ang akon pinalangga nga bana. Sa akon labi nga pagguwa sa latagon agod buligan ang iban, kubos nga nabatyagan ko ang kasubo. Nagtuo ako sa mga saad ni Jehova kag pirme ko ginahunahuna kon paano ko mabuligan ang akon mga ginatun-an sa paghimo sing mga pagbalhin sa ila kabuhi. Pagkatapos sang tagsa ka adlaw, nagatulog ako sing mahamuok, kag ang akon tagipusuon puno sing kalipay.”
6. Anong pinasahi nga kalipay ang naeksperiensiahan sang pila ka payunir?
6 Ang pila nga nagapayunir sa madamo na nga dekada may pinasahi nga kalipay nga makaalagad sa naligwin nga mga duog, nga nagatukod sing mga kongregasyon, nga nangin mga sirkito sang ulihi. Halimbawa, sa Abashiri, Hokkaido, (pinakanaaminhan nga pulo sang Japan), may isa ka utod nga babayi nga 33 ka tuig na nga nagapayunir. Nanugid sia nga sa iya nahaunang sirkito nga asambleya—para sa bug-os nga Hokkaido—70 lamang sadto ang nagtambong. Kag karon? May yara na 12 ka sirkito sa sina nga pulo, nga may kabug-usan nga kapin sa 12,000 ka manugbantala. Handurawa kon ano ka daku ang iya kalipay kon nagatambong sia sa mga asambleya kag mga kombension kaupod sang kadam-an sang mga masigkamanugbantala sing Ginharian sa sina nga pulo!
7, 8. Ano nga kalipay ang naagom sang kalabanan nga madugay na nga mga payunir?
7 Nalipay ang iban nga madugay na nga mga payunir nga makita ang mga estudyante sa Biblia nga nagpabawtismo kag nian nagatinguha nga malab-ot ang dugang pa nga mga pribilehiyo sa pag-alagad. Sa Japan isa ka utod nga babayi nga nag-alagad sa siam ka lainlain nga asaynment subong payunir kutob sang 1957 ang nagsaysay tuhoy sa pagpahamtang niya sing isa ka magasin nga Magmata! sa isa ka lamharon nga babayi nga nagatrabaho sa banko. Sa sulod sang siam ka bulan ang lamharon nga babayi nabawtismuhan. Sang ulihi namana sia, kag sila sang iya bana nangin mga espesyal payunir. Daku gid ang kalipay sang payunir nga utod nga babayi sang, sa iya ikatlo nga asaynment, ang iya kongregasyon ginduaw sang bag-ong manugtatap sang sirkito kag sang iya asawa—ang iya anay estudyante sa Biblia!
8 Indi katingalahan nga ang mga naghimo nga karera sang ministeryo nga pagpayunir nagatamod sini subong isa ka “hamili nga pribilehiyo nga dapat pakabahandion,” subong sang ginpabutyag sang isa ka payunir sa sulod sang 22 ka tuig!
Pamatuod Sang Pag-atipan ni Jehova
9. Subong Daku nga Manug-aman, ano ang ginasaad ni Jehova sa iya mga alagad, kag ano ang kahulugan sini para sa aton?
9 Si Jehova, ang Dakung Manug-aman, nagasaad nga sakdagon ang iya mga alagad, nagaatipan sa ila sa espirituwal kag sa materyal. Amo nga si Hari David sang una nakasiling: “Nangin pamatan-on ako, kag karon tigulang na, apang wala ako makakita nga ang bisan sin-o nga matarong ginpabayaan, ukon ang iya kaliwat nga nagapakilimos sing tinapay.” (Salmo 37:25) Sa pagkamatuod, ining garantiya sang Dios wala nagahilway sa aton sa obligasyon nga amanan sing materyal ang aton mga pamilya, ukon nagahatag sa aton sing kahilwayan nga magsalig sa kaalwan sang aton Cristianong mga kauturan. (1 Tesalonica 4:11, 12; 1 Timoteo 5:8) Apang, kon kinabubut-on kita nga nagahimo sing mga sakripisyo sa aton kabuhi agod maalagad sing labi pa si Jehova, indi gid niya kita pagpabayaan.—Mateo 6:33.
10, 11. Gikan sa eksperiensia, ano ang nahibaluan sang madamong payunir nahanungod sa ikasarang ni Jehova sa pag-aman?
10 Ang mga payunir gikan sa bug-os nga kalibutan nakahibalo gikan sa eksperiensia nga si Jehova nagaaman para sa mga nagatugyan sang ila kaugalingon sa iya matinatapon nga mga kamot. Binagbinaga ang halimbawa sang isa ka mag-asawa nga payunir nga nagsaylo sa isa ka diutay nga banwa diin mas daku ang pagkinahanglan sing mga manugbantala sang Ginharian. Pagligad sang pila ka bulan, nangin maiwat ang trabaho, kag ang ila sinuptan naubos. Nian may balayran sila nga $81 sa seguro sang salakyan. “Wala gid kami sing inugbayad sa sini,” paathag sang utod nga lalaki. “Nangamuyo kami sing hugot gid sadto nga gab-i.” Pagkadason nga adlaw, nakabaton sila sing kard gikan sa isa ka pamilya nga nagahimakas man sa pinansial. Ang pamilya nakabaton sing tax refund (kuwarta nga ginauli sang gobierno sa isa ka tawo bangod sang sobra nga ginbayad nga buhis), paathag sang kard, kag bangod sobra ini sangsa ginalauman nila, luyag nila ipaambit ang iban sini sa mag-asawa nga payunir. Ginlakip ang isa ka $81 nga tseke! “Indi ko gid malipatan yadto nga adlaw—nagpalanindog ang mga balahibo sa akon liog!” siling sang payunir nga utod nga lalaki. “Ginpasalamatan gid namon ang kaalwan sini nga pamilya.” Ginapabaloran man ni Jehova ini nga kalulo, nga kinaandan sa maalwan nga kinaiya nga ginapalig-on niya sa iya mga alagad.—Hulubaton 19:17; Hebreo 13:16.
11 Madamong payunir ang makasugid sing kaanggid nga mga eksperiensia. Pamangkuta sila, kag sugiran ka nila nga wala gid sila “ginpabayaan.” Ginahinumdom ang kapin sa 55 ka tuig nga pag-alagad sing bug-os tion, isa ka 72-anyos nga payunir ang nagsiling, “Wala gid ako pagpaslawa ni Jehova.”—Hebreo 13:5, 6.
“Isa ka Labing Maayo nga Paagi Agod Mangin Mas Malapit kay Jehova”
12. Ngaa ang hilikuton nga pagbantala sing maayong balita isa gid ka tumalagsahon nga pribilehiyo?
12 Ang pagpangabay ni Jehova sa aton nga iwali ang maayong balita tuhoy sa iya Ginharian nagahatag sa aton sing isa ka pribilehiyo. Ginatamod niya kita—walay sapayan nga dihimpit kita nga mga tawo—subong “mga masigkamanugpangabudlay” niya sa sining nagaluwas-kabuhi nga hilikuton. (1 Corinto 3:9; 1 Timoteo 4:16) Samtang ginabantala naton sa iban ang nahanungod sa Ginharian sang Dios, samtang ginawali naton ang pagdula sa kalautan, samtang ginapaathag naton sa mga tawo ang iya makatilingala nga gugma sa pag-aman sing gawad, samtang ginabuksan naton ang iya buhi nga Pulong kag ginatudlo ang hamili nga mga kaundan sini sa bunayag sing tagipusuon nga mga tawo, natural lamang nga mangin mas malapit kita sa aton Manunuga, si Jehova.—Salmo 145:11; Juan 3:16; Hebreo 4:12.
13. Ano ang ginasiling sang iban nahanungod sa epekto sang ila ministeryo nga pagpayunir sa ila kaangtanan kay Jehova?
13 Ang mga payunir makahinguyang sing madamo nga tion kada bulan sa pagtuon kag sa pagtudlo tuhoy kay Jehova. Ano ang balatyagon nila nga nagaapektar ini sa ila kaangtanan sa Dios? “Ang pagpayunir isa ka labing maayo nga paagi agod mangin mas malapit kay Jehova,” sabat sang isa ka gulang sa Pransia nga kapin sa napulo ka tuig na nga nagapayunir. Isa pa ka payunir sa sinang pungsod, nga nakahinguyang sing 18 ka tuig sa bug-os tion nga ministeryo, ang nagsiling: “Ang pagpayunir nagatugot sa aton nga ‘tilawan kag tan-awon nga si Jehova maayo,’ nagatukod sing mas mabakod pa nga kaangtanan upod sa aton Manunuga adlaw-adlaw.” (Salmo 34:8) Isa ka utod nga babayi sa Britanya nga 30 ka tuig na nga nagapayunir ang may amo man nga balatyagon. “Ang magpatuytoy sa espiritu ni Jehova sa akon ministeryo labi nga nagpasuod sa akon sa iya,” siling niya. “Tunay ko nga nabatyagan nga sa madamong okasyon gintuytuyan ako sang espiritu ni Jehova pakadto sa isa ka partikular nga balay sa husto nga tion.”—Ipaanggid ang Binuhatan 16:6-10.
14. Paano nakabenepisyo ang mga payunir gikan sa paggamit sing Biblia kag sing pasad sa Biblia nga mga publikasyon sa adlaw-adlaw sa pagtudlo sa iban?
14 Nasapwan sang madamong payunir nga ang paggamit sing Biblia kag sing pasad sa Biblia nga mga publikasyon sa adlaw-adlaw sa pagpaathag kag sa pagtudlo sing Makasulatanhon nga kamatuoran nakabulig sa ila sa pagtubo sa ihibalo tuhoy sa Pulong sang Dios. Isa ka 85-anyos nga utod nga lalaki sa Espanya nga 31 ka tuig na nga nagapayunir ang nagpaathag: “Ang pagpayunir nakabulig sa akon nga matigayon ang madalom nga ihibalo tuhoy sa Biblia, ang ihibalo nga gingamit ko sa pagbulig sa madamong tawo nga makilala si Jehova kag ang iya mga katuyuan.” Isa ka utod nga babayi nga taga-Britanya nga 23 ka tuig na nga nagapayunir ang nagsiling: “Ang bug-os tion nga ministeryo nagbulig sa akon nga mapalambo ang daku nga gana para sa espirituwal nga pagkaon.” Ang pagpaathag sa iban sang “rason para sa paglaum nga yara sa inyo” sarang makapabakod sang imo mismo pagtuo nahanungod sa mga pagtuluuhan nga ginapakamahal mo. (1 Pedro 3:15) Ang isa ka payunir nga taga-Australia nagsiling: “Ang pagpayunir nagpauswag sang akon pagtuo samtang ginapabutyag ko ang akon kaugalingon sa iban.”
15. Ano ang handa nga himuon sang madamo agod makasulod sa ministeryo nga pagpayunir kag magpabilin sa sini, kag ngaa?
15 Sing maathag, ining payunir nga mga ministro kumbinsido nga napili nila ang isa ka porma sang pag-alagad nga nagadala sing dimaisip nga mga pagpakamaayo gikan kay Jehova. Indi katingalahan nga madamo ang handa sa paghimo sing mga pagbalhin sa ila kabuhi, bisan sa pagbiya sa isa ka sekular nga karera kag materyal nga mga manggad, agod magsulod sa ministeryo nga pagpayunir kag magpabilin sa sini!—Hulubaton 28:20.
Ang Imo Bala Tagipusuon Nalangkag sa Paghimo Sing Labi Pa?
16, 17. (a) Kon nagapalibog ka kon bala ang pagpayunir posible para sa imo, ano ang mahimo nga himuon mo? (b) Ano ang balatyagon sang pila nga indi makapayunir?
16 Pagkatapos mabinagbinag kon ano ang masiling sang mga payunir tuhoy sa mga pagpakamaayo sang ministeryo nga pagpayunir, ayhan nagapalibog ka kon bala ang pagpayunir praktikal para sa imo. Kon amo, ngaa indi makigsugilanon sa isa ka payunir nga nangin madinalag-on sa bug-os tion nga ministeryo? Ayhan makabulig man sa imo ang pagpakighambal sa isa sang mga gulang sa kongregasyon, isa nga nakakilala sa imo—sa imo panglawas, sa imo mga limitasyon, kag sa imo mga responsabilidad sa pamilya. (Hulubaton 15:22) Ang realistiko nga mga komento sang iban mahimo nga magabulig sa imo nga matulutimbang sing maayo kon bala posible para sa imo ang pagpayunir. (Ipaanggid ang Lucas 14:28.) Kon makapayunir ka, mangin daku gid ang imo mga pagpakamaayo.—Malaquias 3:10.
17 Apang, kamusta naman ang madamong matutom nga manugbantala sang Ginharian nga indi makapayunir, walay sapayan nga luyag gid nila nga makahimo sing labi pa sa ministeryo? Binagbinaga, halimbawa, ang balatyagon sang isa ka Cristianong utod nga babayi nga nagahimakas agod mabuhi sing isahanon ang iya apat ka kabataan. “Nahanusbo gid ako,” siling niya, “bangod regular payunir ako anay, apang karon, bangod sang akon mga kahimtangan, indi ako makaguwa sa latagon sing subong sang ginahimo ko anay.” Palangga gid sining utod ang iya kabataan kag luyag niya nga amanan sila. Sa amo man nga tion, luyag niya nga makahimo sing labi pa sa pagbantala nga hilikuton. “Luyag ko ang ministeryo,” paathag niya. Amo man sini ang balatyagon sang iban pa debotado nga mga Cristiano nga ang ila gugma sa Dios nagapahulag sa ila nga luyag mag-alagad kay Jehova ‘upod sang ila bug-os nga tagipusuon.’—Salmo 86:12.
18. (a) Ano ang ginapaabot ni Jehova gikan sa aton? (b) Ngaa indi kita dapat maluyahan sing buot kon ang mga sirkunstansia nagalatid sang sarang naton mahimo?
18 Dumduma nga ang ginapaabot ni Jehova sa aton amo ang bug-os kalag nga pag-alagad. Ang kasangkaron sini mahimo nga magalainlain sa mga indibiduwal. Ang iban sarang makapasibu sang ila mga hilikuton agod makaalagad subong mga regular payunir. Ang madamo pa nagaauxiliary payunir sing panalagsa ukon sing tayuyon, nga nagahinguyang sing 60 ka oras kada bulan sa ministeryo. Apang, ang kalabanan nga katawhan ni Jehova nagapakigbahin sa pagbantala kag pagtudlo nga hilikuton sing bug-os kalag subong mga manugbantala sang kongregasyon. Gani kon ang mapigaw nga panglawas, katigulangon, mga responsabilidad sa pamilya, ukon iban pa nga mga sirkunstansia nagalatid sa imo, indi maluyahan sing buot. Tubtob ginahimo mo ang imo bug-os nga masarangan, ang imo pag-alagad hamili sa mga mata sang Dios, subong sang mga nagaalagad sing bug-os tion!
Ang Tanan Sarang Makapakita Sing Espiritu Sang Pagpayunir
19. Ano ang espiritu sang pagpayunir?
19 Bisan pa indi ka makapayunir, sarang mo mapakita ang espiritu sang pagpayunir. Ano ang espiritu sang pagpayunir? Ang Agosto 1988 nga guwa sang Ang Aton Ministeryo sa Ginharian nagsiling: “Mahimo ini ipaathag subong pagtigayon sing positibo nga panimuot sa sugo nga magbantala kag maghimo sing mga disipulo, nga nakapamat-od sing bug-os nga magpakita sing gugma kag pag-ulikid sa katawhan, nga nagasakripisyo sa kaugalingon, nagakalipay sa pagsunod sing suod sa Agalon, kag nahamuot sa espirituwal, indi sa materyal, nga mga butang.” Paano mo mapakita ang espiritu sang pagpayunir?
20. Paano mapakita sang mga ginikanan ang espiritu sang pagpayunir?
20 Kon isa ikaw ka ginikanan nga may magagmay nga kabataan, bug-os tagipusuon nga marekomendar mo sa ila ang isa ka karera subong mga payunir. Ang imo positibo nga panimuot sa ministeryo mahimo nga magpatudok sa ila sang kinahanglanon nga himuon ang pag-alagad kay Jehova subong ang labing importante nga butang sa ila kabuhi. Mahimo nimo maagda ang mga payunir kag nagalakbay nga mga manugtatap kag ang ila mga asawa sa imo balay agod makabenepisyo ang imo kabataan gikan sa mga halimbawa sadtong nakasapo sing kalipay sa bug-os tion nga ministeryo. (Ipaanggid ang Hebreo 13:7.) Bisan sa nabahinbahin sa relihion nga mga puluy-an, ang tumuluo nga mga ginikanan, paagi sa hambal kag paagi sa halimbawa, makabulig sa ila kabataan nga himuon ang bug-os tion nga ministeryo nga tulumuron sa kabuhi.—2 Timoteo 1:5; 3:15.
21. (a) Paano kita tanan makahatag sing suporta sa mga nagapayunir? (b) Ano ang sarang mahimo sang mga gulang sa pagpalig-on sa mga payunir?
21 Sa kongregasyon, sarang naton mahatag ang bug-os tagipusuon nga suporta sa mga makasarang sa pagpayunir. Halimbawa, makapanikasog ka bala nga updan ang isa ka payunir sa ministeryo, labi na sa mga tion nga ang payunir mahimo nga nagapangabudlay sing isahanon lamang? Masapwan mo gid nga may yara “pagbayluhanay sing pagpalig-on.” (Roma 1:11, 12) Kon ikaw isa ka gulang, labi pa ang imo mahimo agod mapalig-on ang mga payunir. Kon magsapol ang hubon sang mga gulang, dapat nila binagbinagon sing regular ang mga kinahanglanon sang mga payunir. Kon ang isa ka payunir ginaluyahan sing buot ukon may pila ka kabudlayan, indi dayon ipanugda nga mag-untat na lang sia sa pagpayunir. Bisan pa nga ini nga panugda mahimo nga kinahanglanon sa pila ka hitabo, indi pagkalimti nga ang pagpayunir isa ka hamili nga pribilehiyo nga mahimo nga ginapakabahandi gid sang bug-os tion nga alagad. Ang diutay nga pagpalig-on kag praktikal nga laygay ukon bulig mahimo nga amo lamang ang kinahanglanon. Ang sanga talatapan sang Sosiedad sa Espanya nagsulat: “Kon ang mga gulang nagapalig-on sing pagpayunir, nagasuporta sa mga payunir sa ministeryo sa latagon, kag nagaduaw sa ila sing tayuyon, ang mga payunir magakalipay sing labi, magabatyag nga mapuslanon, kag maluyag sa pagpadayon walay sapayan sang mga sablag nga mahimo mag-utwas.”
22. Sa sining ital-ital nga tion sang tawhanon nga maragtas, ano ang dapat naton determinado nga himuon?
22 Nagakabuhi kita sa ital-ital nga panag-on sang tawhanon nga maragtas. Si Jehova naghatag sa aton sing nagaluwas-kabuhi nga hilikuton. (Roma 10:13, 14) Nagapakigbahin man kita sa sining hilikuton sing bug-os tion subong mga payunir ukon indi, ipakita naton ang espiritu sang pagpayunir. Tigayunon naton ang balatyagon sang pagkahilingagawon kag espiritu sang pagsakripisyo sa kaugalingon. Mangin determinado kita nga ihatag kay Jehova ang ginapangabay niya sa aton—ang bug-os kalag nga pag-alagad. Kag dumdumon naton nga kon ihatag naton ang aton bug-os nga masarangan, kaangay man ini sa diutay nga mga sensilyo sang babaying balo ukon sang malahalon nga lana ni Maria, ang aton pag-alagad bug-os kalag, kag ginapakabahandi ni Jehova ang aton bug-os kalag nga pag-alagad!
Madumduman Mo Bala?
◻ Ngaa ang bug-os tion nga ministeryo nagahatag sing balatyagon nga naayawan kag kalipay?
◻ Gikan sa eksperiensia, ano ang nahibaluan sang madamong payunir nahanungod sa ikasarang ni Jehova sa pagtatap sa iya mga alagad?
◻ Ang mga payunir nagabatyag nga ang ila ministeryo may yara anong epekto sa ila kaangtanan kay Jehova?
◻ Paano mo mapakita ang espiritu sang pagpayunir?
[Kapsion sa pahina 23]
Ang mga payunir makatigayon sing daku nga kalipay gikan sa paghimo sing disipulo
[Kapsion sa pahina 23]
Ang imo kabataan makabenepisyo gikan sa pagpakig-upod sa bug-os tion nga mga manugbantala sang Ginharian
[Kapsion sa pahina 23]
Sarang mapalig-on sang mga gulang ang mga payunir sa ministeryo sa latagon