Ang mga Pagpakamaayo sang Pagpayunir
1, 2. Ano nga mga pagpakamaayo ang naangot sing suod sa pagpayunir, kag ngaa?
1 “Nahibaluan ko nga wala na sing iban nga hilikuton ang makahatag sa akon sing kaayawan sangsa pagpaambit sing kamatuoran sa iban,” siling sang isa ka payunir. Ang isa pa nagsiling: “Kada tapos sang adlaw, mahamuok ang akon pagtulog, kag puno sing kalipay ang akon tagipusuon.” Ining mga payunir nagapautwas sang ginabatyag sang mga kauturan bisan diin nga nakatilaw sang mga pagpakamaayo sang pagpayunir.—Hulu. 10:22.
2 Ang pagbulig sa iban nga makatigayon sang nagaluwas kabuhi nga ihibalo sa Pulong sang Dios nagadala sing matuod nga kalipay. (Binu. 20:35; 1 Tes. 2:19, 20) “Makakulunyag kag makapalig-on sing pagtuo nga makita kon daw ano ka gamhanan ang Pulong sang Dios sa pagpahulag sa mga tawo nga bag-uhon ang ila kabuhi,” sulat sang madugay na nga payunir. Huo, paagi sa pagboluntaryo nila nga buligan ang mga tawo kag sa pagdumala sang mga pagtuon sa Biblia, matigayon sang mga payunir ang mga pagpakamaayo kaangay sini.
3, 4. Paano ang pagpayunir nagatudlo sa isa nga magsandig kay Jehova, kag paano ini nagabulig sa isa nga magtubo sa espirituwal?
3 Pagsandig kay Jehova: Ang pagsandig adlaw-adlaw sa espiritu sang Dios samtang nagapakigbahin sila sa ministeryo nagabulig sa mga payunir nga palambuon ang “bunga sang espiritu” kag nangin pangamlig nila. (Gal. 5:16, 22, 23) Dugang pa, bangod pirme nila ginagamit ang Pulong sang Dios, masami nga lantip sila sa paggamit sang mga Kasulatan agod pangapinan ang kamatuoran kag palig-unon ang iban. (2 Tim. 2:15) Ang isa ka utod nga nangin payunir sing mga dinekada nagkomento: “Nabuligan ako sang pagpayunir nga makatigayon sing madalom nga ihibalo sa Biblia, isa ka ihibalo nga nagamit ko sa pagbulig sa madamo nga tawo nga makilala si Jehova kag ang iya mga katuyuan.” Daw ano ka makapaladya!
4 Ang mga regular payunir dapat man magsandig kay Jehova sa madamo nga paagi. Ang ila pagtuo napalig-on samtang makita nila kon paano niya ginapakamaayo ang ila mga panikasog sa pag-aman sang ila materyal nga mga kinahanglanon. Ang 72-anyos nga regular payunir sa sulod sang 55 ka tuig nagsiling: “Wala gid ako ginpabay-an ni Jehova.” Dugang pa, paagi sa paghupot sang ila kabuhi nga simple, ang mga payunir nagaamlig sang ila kaugalingon sa madamo nga kahuol sa kabuhi. Naganyat ka bala sa sini?—Mat. 6:22; Heb. 13:5, 6.
5. Paano ang pagpayunir nagabulig sa isa nga mangin suod kay Jehova?
5 Pagsuod sa Dios: Ang aton kaangtanan kay Jehova isa ka hamili gid nga butang. (Sal. 63:3) Kon makig-ambit kita sing bug-os sa ministeryo bangod sang gugma kay Jehova, ini nga kaangtanan nagasuod pa gid. (Sant. 4:8) Ang isa ka payunir sa sulod sing kapin na sa 18 ka tuig nagsiling: “Ang pagpayunir nagatugot sa aton nga ‘matilawan kag matan-aw nga si Jehova maayo,’ nga nagatukod sang isa ka mas malig-on nga kaangtanan sa aton Manunuga sa adlaw-adlaw.”—Sal. 34:8.
6. Ano dapat ang tigayunon sang mga payunir, kag sin-o pa magluwas sa mga payunir ang nakabenepisyo?
6 Dugang pa sa kinahanglanon nga mga kahimtangan, ang mga payunir dapat mabakod sa pagtuo, may matuod nga gugma sa Dios kag sa isigkatawo, kag handa magsakripisyo. (Mat. 16:24; 17:20; 22:37-39) Apang, subong sang ginapamatud-an sang malipayon nga mga nawong sang mga payunir bisan diin, ang mga pagpakamaayo sang pagpayunir nagalabaw sa mga sakripisyo. (Mal. 3:10) Ini nga mga pagpakamaayo wala lamang napatuhoy sa mga payunir, kundi ang ila mga pamilya kag kongregasyon nakabenepisyo man sing daku gikan sa maayo nga espiritu nga ginapakita sang mga payunir.—Filip. 4:23.