Ang mga Payunir Nagahatag kag Nagabaton sing mga Pagpakamaayo

ANG pagpayunir daku pa ang bili sangsa madinalag-on nga sekular nga karera. Wala na sing butang nga mas makaalayaw pa sangsa pagbulig sa mga tawo nga makilala si Jehova kag ang iya kamatuoran.” Amo ina ang ginsiling sang isa ka Cristianong babayi nga nagpili sang pagpayunir​—⁠bug-os tion nga pagbantala sang Ginharian​—⁠subong iya karera. Pila ka iban pa nga mga karera ang makahatag sing amo sina nga kalipay?

Ang pagpayunir mataas nga tulumuron kag hamili nga pribilehiyo. Paano mapili sang isa ka indibiduwal ina nga pagkabuhi? Ano ang ginakinahanglan sa pagpabilin sing malawiglawig sa pagpayunir agod maani ang mga pagpakamaayo nga ginahatag sini?

Duha ka butang ang kinahanglanon. Una, nagakaigo nga mga kahimtangan. Madamo ang nagakabuhi sa mga kahimtangan nga maathag gid nga nagapaimposible sang pagpayunir. Kag ikaduha, nagakaigo nga espirituwal nga mga kalipikasyon kag panimuot. Siempre pa, nagatugot man ukon indi ang karon nga mga kahimtangan sa isa nga magpayunir, ang tanan makapangabudlay agod mapalambo ang hamtong nga Cristianong mga kinaiya.

Kon Ngaa ang Iban Nagapayunir

Ano ang mga kalipikasyon para makapayunir sing madinalag-on? Ti, ang mga ikasarang sa pagbantala kinahanglanon. Ang mga payunir dapat makahibalo kon paano itanyag ang maayong balita sa mga estranghero, duawon liwat ang mga interesado, kag dumalahan ang mga pagtuon sa Biblia sa puluy-an. Ang kakulang sini nga mga ikasarang makapaluya sa isa ka payunir. Walay sapayan, ang iban pa nga mga butang importante man.

Halimbawa, ang tanan nga nagahilabot sa aton pagsimba may kaangtanan sa aton relasyon kay Jehova kag sa iya organisasyon. Nagalakip ini sang pagpayunir. Ang isa ka lamharon nga payunir nga si Rado nagpaathag: “Para sa isa ka pamatan-on, wala na sing mas maayo pa sangsa dumdumon si Jehova kag maglakat sa dalan sang kamatuoran.” Huo, ang pagpayunir isa ka maayo nga paagi agod mapakita sang mga pamatan-on ang ila gugma kay Jehova kag pagkasuod sa iya.​—⁠Manugwali 12:⁠1.

Ang ihibalo kag paghangop kinahanglanon man. (Filipos 1:​9-11) Sa katunayan, mga gatong ini nga nagapaandar sang aton espirituwal nga makina. Ang regular nga personal nga pagtuon kinahanglanon agod malikawan ang makapoy sa espirituwal, nga nagadula sang aton kapagsik kag pagtuo. Sa pagkamatuod, ang ihibalo nga aton ginakuha indi lamang dapat magaapektar sang aton hunahuna kundi sang tagipusuon man. (Hulubaton 2:⁠2) Busa, dugang sa personal nga pagtuon, kinahanglan naton ang tion sa pagpangamuyo kag pagpamalandong agod ang ihibalo nga matigayon naton magatandog sang tagipusuon. Nian, kon ginatugot sang aton mga kahimtangan, luyag naton nga magpayunir.​—⁠Ipaanggid ang Esdras 7:⁠10.

Ang pagpayunir nagakinahanglan man sang espiritu sang pagsakripisyo sa kaugalingon. May mga plano na ang pamatan-on nga si Ron sa pagpayunir. Ginhulat na lamang niya ang nagakaigo nga mga kahimtangan agod makapayunir sia. Sing espesipiko, luyag niya ang isa ka trabaho nga magapahanugot sa iya nga magpayunir kag sa amo man nga tion maagom ang pila sa mga kasulhayan sa kabuhi. Sang ginsambit niya ini sa isa ka hamtong nga utod nga babayi, ang iya sabat nagtay-ug sa iya. Sia nagsiling: “Si Jehova nagapakamaayo sa mga buhat, indi sa mga saad.” Ang pamatan-on nakakita sing trabaho nga mas manubo ang suweldo nga naghatag sing tion para makapayunir. Ang pag-aplikar sa Mateo 6:​25-34 magabulig sa isa ka tawo nga makatibawas sa mas manubo nga kinitaan.

Ang mapainubuson nga kahanda sa pagsunod sa maayo nga mga panugda makabulig sa aton sa pagsulod sa payunir nga pag-alagad. Sang bag-o pa lang sia mangin Cristiano, ginpalambo ni Hanna ang handum nga magpayunir. Apang wala sia magpayunir samtang nagasagod sang isa ka pamilya, kag nangin masako sia sang ulihi sa karera sa negosyo. Namati sa maayo nga laygay gikan sa alisto nga mga gulang, gintalikdan niya ang iya matahom nga sekular nga karera kag nagpayunir. Si Hanna nagaagom karon sing daku nga kalipay sa pagtuytoy sa iban nga magdedikar kag sa pagbulig sa mga di-akti⁠bo.

Ang pagpasalamat sa kon ano ang nahimo sang kamatuoran sa kabuhi sang isa mahimo man nga mangin pangpapagsik sa pagpayunir. Binagbinaga ang kaso sang napung-awan gid sing daku nga babayi nga ang pag-asawahay daw maguba na. Ini nga kahimtangan nagbalhin sing hinali sang natun-an niya ang kamatuoran sang Pulong sang Dios kag gin-aplikar ini. Nakunyag sa kon ano ang nahimo sang kamatuoran sa iya, namat-od sia nga ang labing maayo nga mapakita niya ang iya apresasyon amo ang magpayunir kag magbulig sa iban. Ginhimo niya ini, kag nagaagom sia karon sang mga pagpakamaayo sang madamong pagtuon sa Biblia kag malipayon nga pagkabuhi sang pamilya.

Ang Iban Makabulig

Ang mga payunir masunson nga nagapatubas sang iban pa nga mga payunir. Si Rado, nga ginsambit kaina, seis anyos sang ang duha ka payunir nagtuon sang Biblia upod sa iya mga ginikanan. Sang bata pa sia, pirme sia nagaupod sa sining bug-os tion nga mga manugbantala sa pagministeryo sa latagon. Si Rado mismo nangin regular payunir sa edad nga 17. Isa pa ka solterito, nga si Arno, ang ginpadaku sa isa ka Cristianong puluy-an apang nagluya sia sa espirituwal. Sang ulihi, ginpangabudlayan niya nga ipasag-uli ang iya espirituwal nga kusog, kag karon sia nagasiling: “Madamo nga pagpalig-on ang nabaton ko gikan sa mga payunir. Nakig-upod ako sa ila ilabi na kon bakasyon sa eskwelahan kag kon kaisa nagreport sing 60 ka oras sa isa ka bulan sa pag-alagad sa latagon. Pagkatapos sadto, ang tikang padulong sa pagregular payunir [nagakinahanglan sing 90 ka oras kada bulan] indi na mabudlay.” Ang pagpamalandong sa laygay sang 1 Corinto 7:​29-31 nga indi paggamiton ang kalibutan sing bug-os nakabulig gid sa sinang mga pamatan-on.

Ang espiritu sang pagpayunir mas mahapos manggamot sa isa ka puluy-an diin ginauna ang espirituwal nga mga interes kag ginapalig-on sang mga ginikanan ang ila mga kabataan nga magsulod sa bug-os tion nga ministeryo. Si Philo, nga nagdaku sa subong sina nga puluy-an, nagkomento: “Madamo ang naglaygay sa akon nga padayunon ko ang akon pag-eskwela, nga magtrabaho para sa malig-on nga palaabuton. Apang ginbuligan ako sang akon mga ginikanan sa paghimo sing mas maalamon nga pagpili. Ginsilingan nila ako nga kon luyag ko gid magtukod para sa palaabuton, dapat ko unahon ang pagpalambo sing kaangtanan upod kay Jehova.”

Nagpayunir man ang dalagita nga si Thamar bangod sa halimbawa kag mga panikasog sang iya mga ginikanan. Sia nagsiling: “Indi ko gid masiling kon san-o ko napalambo ang espirituwal nga pagtamod sa kabuhi, apang nahibaluan ko nga wala ako mabun-ag nga may amo sini. Ang kinabatasan sang akon mga ginikanan sa regular nga pagpakigbahin sa pag-alagad sa latagon kag pagtambong sa mga miting, subong man ang ila tudok nga gugma sa kamatuoran, daku gid ang nabulig sa akon nga mapalambo ang akon espirituwal nga panimuot.”

Pagpabilin sa Imo Desisyon

Kon makasulod na ang isa ka tawo sa pagpayunir, ang pagpabilin sa sini nagabulig sa iya nga maani ang bug-os nga benepisyo sinang maalamon nga desisyon. Madamong praktikal nga laygay ang mahatag tuhoy sa sina. Halimbawa, natun-an sang mga payunir nga iskedyulon ang ila oras agod mangin mapatubason kon mahimo. Apang, ang pinakaimportante nga rason amo gihapon ang kaangtanan sang isa ka indibiduwal kay Jehova kag sa Iya organisasyon.

May kaangtanan sa sini amo ang mapangamuyuon nga panimuot. “Sang nagsulod ako sa kamatuoran, luyag ko gid magpayunir,” siling ni Cor. Apang, luyag sang iya amay nga makatapos sia anay sang isa ka kurso sa Ag­ri­cul­tural Univer­sity. Pagkatapos sadto, nagpayunir si Cor. Sang ulihi, nangasawa sia, kag ang iya asawa nagbuylog sa iya sa payunir nga hilikuton. Sang magmabdos ang iya asawa, may posibilidad nga basi biyaan niya ang payunir nga hilikuton. “Pirme ko ginpangamuyo kay Jehova kag ginsugid sa iya ang handum sang akon tagipusuon nga magpadayon sa pagpayunir,” siling ni Cor. Sang ulihi nakakita si Cor sing obra nga nagpaposible sa iya nga magpayunir samtang ginabuhi ang isa ka pamilya.

Ang pagkakontento sa materyal nga mga kinahanglanon isa pa ka butang nga masunson nagabulig sa isa ka tawo sa pagpabilin sa payunir nga ministeryo. Si apostol Pablo nagsulat: “Panginluwas kamo sa gugma sa kuwarta, kag magkontento sang yara sa inyo. Kay sia nagsiling: ‘Indi ko ikaw nga mas-a ­pagpalugaw-an ukon pagpatumbayaan ko ikaw.’ ” (Hebreo 13:⁠5) Ang pagkakontento sa karon nga mga butang nagbulig kay Harry kag kay Irene nga magpadayon sa pagpayunir. Si Irene, nga isa ka bulag, walo ka tuig na nga payunir. “Wala gid namon pagtamda ang amon pinansial nga kahimtangan subong problema,” siling niya. “Gintinguhaan lang namon nga indi mabug-atan sang dikinahanglanon sa pinansial. Pirme namon ginaisip ang bili. Ang amon pangabuhi pirme lamang nga simple, bisan pa tuman ka makalilipay, kag dagaya ini sa mga pagpakamaayo.”

Madamong Kalipay kag Pagpakamaayo

Nagabalikid sa siam ka tuig nga pagpayunir, si Thamar nagsiling: “Nagasuod ka sing labi kay Jehova, subong nga daw ginakaptan gid niya ang imo kamot.” (Salmo 73:23) Nagasulod man sa hunahuna ang pila ka pagtilaw. “Ang akon mismo mga pagkadihimpit lakip ang iya sang iban pirme nagatublag sa akon,” dugang ni Thamar. “Isa pa, ginatan-aw ko ang mga kauturan nga lalaki kag babayi nga nagpili sang mas makapaladya sa materyal nga pangabuhi, kag ang ila pinili daw mas makagalanyat samtang ako nagapaulan kag nagapatugnaw sa pagpamalaybalay. Apang sa kaidadalman sang akon tagipusuon, indi ko gid luyag makigbayluhanay. Ano pa luwas sa pagpayunir ang makahatag sing daku nga kalipay, daku nga espirituwal nga kaayawan, kag daku nga pagpakamaayo?” Pakabahandion mo gid bala ang kaanggid nga mga kalipay kag mga pagpakamaayo?

Bangod ang mga payunir nagahinguyang sing madamo nga tion sa Cristianong ministeryo, yara sila sa posisyon sa pagbulig sa pila ka indibiduwal nga makatigayon sing ihibalo sa kamatuoran sang Biblia. Sanday Harry kag Irene, nga ginsambit kaina, nagsiling: “Madamong pribilehiyo ang matigayon sa organisasyon ni Jehova, apang ang pagbulig sa isa ka bag-ong interesado sa pag-uswag tubtob sa punto nga mangin alagad ni Jehova amo ang pinakadaku sa tanan.”

Ang isa pa ka payunir nagpabutyag sing maayo sini sang nagsiling sia: “Ang mga pinamulong sang Hulubaton 10:22 napamatud-an nga matuod sa akon kaso: ‘Ang pagpakamaayo ni Jehova​—⁠amo ina ang nagapamanggad, kag wala sia nagadugang sing kasubo sa sini.’ Sa liwat kag liwat, ini nga kasulatan natuman sa akon sa mga tinuig nga nagaalagad ako kay Jehova.”

Mga ginikanan, ginapatudok bala ninyo sa inyo mga kabataan ang handum sa pagpayunir? Mga payunir, ginapanikasugan bala ninyo nga pukawon ini nga handum sa iban? Mga gulang, ginasakdag bala ninyo ang mga payunir sa inyo kongregasyon kag nagabulig sa pagpalig-on sang espiritu sa pagpayunir sa iban? Kabay nga madamo pa nga katawhan ni Jehova ang mapahulag sa paglab-ot sang bugana nga mga pagpakamaayo samtang nagapayunir sila.