Pagpayunir—Para Bala Ini sa Imo?
1 “Indi ko mahunahuna nga may lain ako nga ginahimo. Wala na ako sing mahunahuna nga makahatag sing pareho nga kalipay.” Sin-o ang nagsiling sini? Ang isa sa ginatos ka libo ka Saksi ni Jehova nga naghimo sang bug-os tion nga ministeryo subong ila makalilipay nga karera sa kabuhi. Nabinagbinag mo na bala sing mapangamuyuon kon ang pagpayunir para sa imo? Bangod gindedikar naton sing bug-os ang aton kaugalingon kay Jehova, dapat gid naton binagbinagon kon paano kita makapakigbahin sing labi pa sa pagpalapnag sing maayong balita sang Ginharian. Ginahunahuna ina nga tulumuron, binagbinaga palihug ang pila ka pamangkot sang madamo tuhoy sa pagpayunir.
PAMANGKOT 1: “Nagasiling ang iban nga ang pagpayunir indi para sa tanan. Paano ko mahibaluan kon para ini sa akon?”
2 Ang sabat nasandig sa imo mga kahimtangan kag Makasulatanhon nga mga obligasyon. Ang kapagros ukon karon nga kahimtangan sa kabuhi ang wala nagatugot sa madamo nga makahinguyang sing 90 ka oras sa isa ka bulan sa ministeryo. Binagbinaga subong isa ka halimbawa ang madamong matutom nga mga kauturan nga babayi nga Cristianong mga asawa kag mga iloy. Masunson sila nagapakigbahin sa ministeryo sa masarangan nila suno sa ginatugot sang ila kahimtangan. Kon may higayon, nagaauxiliary payunir sila sing isa ka bulan ukon kapin pa kada tuig, nagaani sing mga kalipay nga resulta sang pagpasangkad sang ila pagpakigbahin sa pag-alagad. (Gal. 6:9) Walay sapayan nga wala ginatugot sang ila mga kahimtangan nga mag-alagad sila subong bug-os tion nga mga payunir sa karon, ginapasanyog nila ang espiritu sang pagpayunir kag isa sila ka pagpakamaayo sa kongregasyon subong makugi nga mga manugbantala sing maayong balita.
3 Sa pihak nga bahin, madamong kauturan nga lalaki kag babayi nga halos wala sing obligasyon ang nagapayunir paagi sa pagbag-o sang ila mga prioridad. Kamusta ka? Isa bala ikaw ka pamatan-on nga nakatapos na sang imo pag-eskwela? Isa bala ikaw ka asawa nga may bana nga makasarang sa pagbuhi sa pamilya? Ikaw bala minyo nga wala sing magagmay nga kabataan? Nagretiro ka na bala sa imo trabaho? Ang magpayunir ukon indi magpayunir isa ka personal nga desisyon. Ang pamangkot amo, Mahatagan mo bala sing bahin ang pagpayunir sa imo kabuhi?
4 Ginagamit ni Satanas ang kalibutanon nga sistema sang mga butang agod mapuno sing mga sablag ang aton kabuhi kag agod wilihon kita sa makagod nga dalanon sang kabuhi. Kon determinado kita nga mangin indi bahin sang kalibutan, buligan kita ni Jehova nga unahon pirme ang Ginharian kag lab-uton kag batunon ang tanan nga pribilehiyo sang teokratikong pag-alagad nga bukas sa aton. Kon mapasibu mo ang imo mga kahimtangan agod makaalagad ka subong payunir, ngaa indi mo ini paghimuon?
PAMANGKOT 2: Paano ko mapat-od nga masuportahan ko ang akon kaugalingon sa bug-os tion nga pag-alagad?”
5 Matuod nga sa madamong kadutaan ang ginakinahanglan nga inoras sa pagpamugon kada semana agod matigayon ang ginakabig nga mga kinahanglanon sa kabuhi labi pa nga naglawig sa sulod sang mga tinuig. Walay sapayan sina, madamo ang nagpayunir sa sulod na sang mga dekada, kag si Jehova padayon nga nagasakdag sa ila. Agod magmadinalag-on subong isa ka payunir, ang pagtuo kag espiritu sang pagsakripisyo sa kaugalingon kinahanglanon. (Mat. 17:20) Ang Salmo 34:10 nagapasalig sa aton nga ‘yadtong nagapangita kay Jehova indi makulangan sing bisan ano nga maayo.’ Ang bisan sin-o nga nagapayunir makasalig gid sing bug-os nga si Jehova magaaman sa iya. Ginahimo gid niya ina sa matutom nga mga payunir bisan diin! (Sal. 37:25) Sa pagkamatuod, nahisanto sa mga prinsipio sa 2 Tesalonica 3:8, 10, kag 1 Timoteo 5:8, ang mga payunir wala nagapaabot nga suportahan sila sang iban sa pinansial.
6 Ginahimo sang bisan sin-o nga nagabinagbinag sa pagpayunir ang subong sa ginsiling ni Jesus: ‘Maglingkod anay kag bulubantaa ang kabilihanan.’ (Luc. 14:28) Pagpakita ini sing kaalam. Makighambal sa madinalag-on nga nagpayunir sa madamong tinuig. Mamangkot kon paano sila ginsakdag ni Jehova. Ang inyo manugtatap sa sirkito isa ka eksperiensiado nga payunir nga malipay sa paghatag sing mga panugda kon paano magmadinalag-on sa bug-os tion nga ministeryo.
7 Indi gid mabatyagan sang isa ka tawo ang pagkamaminatud-on sang saad ni Jesus sa Mateo 6:33 kon indi niya pag-itugyan ang iya kaugalingon kay Jehova. Ang isa ka matutom nga payunir nagsaysay: “Sang mag-abot kami sang akon kaupod sa bag-ong asaynment subong mga payunir, ang amon dala amo lamang ang diutay nga utan, isa ka putos nga margarina, kag wala sing kuwarta. Naubos namon ang pagkaon sa panihapon kag nagsiling, ‘Wala na kita sing makaon buwas.’ Ginpangamuyo namon ini, kag nagtulog. Pagkaaga nagduaw ang isa ka lokal nga Saksi kag nagpakilala sang iya kaugalingon, nga nagasiling, ‘Nangamuyo ako nga magpadala si Jehova sing mga payunir. Karon mahimo ako makaupod sa inyo sa halos bug-os nga adlaw, apang bangod nagapuyo ako sa uma, makigsalo ako sa inyo sa panyaga, gani nagbalon ako para sa aton tanan.’ Madamo ini nga karne sang baka kag utanon.” Indi katingalahan nga si Jesus nagpasalig sa aton nga ‘mag-untat kita sa pagkabalaka tuhoy sa aton mga kalag’! Nian nagdugang sia: “Sin-o sa inyo nga paagi sa pagkabalaka makadugang sing isa ka maniko sa kalabaon sang iya kabuhi?”—Mat. 6:25, 27.
8 Ang kalibutan sa palibot naton labi pa nga nangin materyalistiko. Labi kita nga ginaipit nga mag-ilog. Apang, bangod may mapainubuson nga apresasyon sa bug-os tion nga ministeryo, kontento na kita sa diutay nga materyal. (1 Tim. 6:8) Ang mga payunir nga nagahupot sang ila kabuhi nga simple kag mahim-ong may mas madamo nga tion sa pag-alagad kag makatigayon sing mas daku nga kalipay kag espirituwal nga kusog paagi sa pagtudlo sa iban sang kamatuoran. Bisan wala nagapanikasog nga mangabuhi sing asetiko (pagdingot sa kaugalingon), ang ila balanse nga pagtamod sa ila pangabuhi nagbulig sa ila nga matigayon ang mga pagpakamaayo sang pagpayunir.
9 Kon nahibaluan gid nimo nga nagakabuhi kita sa katapusan nga mga adlaw kag diutay na lang nga tion ang nabilin para sa sining malauton nga kalibutan, pahulagon ka sa espirituwal sa paghimo sing kinahanglanon nga mga sakripisyo agod mabantala ang maayong balita sa tanan nga higayon. Paagi sa pagtan-aw liwat sa imo pangabuhi kag paagi sa pagtugyan sini nga butang kay Jehova, marealisar mo nga sarang mo sia maalagad sing bug-os tion. Bisan pa dapat mo ipaiway ang materyal nga mga luyag agod makapayunir, matigayon mo ang bugana nga mga pagpakamaayo ni Jehova.—Sal. 145:16.
PAMANGKOT 3: “Subong tin-edyer, ngaa dapat ko binagbinagon ang pagpayunir subong isa ka pinili nga karera?”
10 Samtang ginatapos ang imo nabilin nga tinuig sa pag-eskwela, natural lang nga hunahunaon mo ang tuhoy sa palaabuton. Luyag mo ini nga mangin malig-on, makalilipay, kag makaalayaw. Mahimo ikaw buyukon sang mga guidance counselor sa eskwelahan nga tinguhaan ang mapilakan nga karera nga nagakinahanglan sing tinuig nga pagtuon sa kolehiyo. Ang imo nahanas sing maayo nga Cristianong konsiensia nagasiling sa imo nga dapat ka maghanda nga alagaron si Jehova sing bug-os kon mahimo. (Manugw. 12:1) Ayhan nagahunahuna ka man nga magminyo sa ulihi kag magpamilya. Ano ang himuon mo?
11 Ang imo mga desisyon sa sini nga tion sang imo kabuhi mahimo magadihon sang imo bug-os nga palaabuton. Kon ikaw isa na ka dedikado, bawtismado nga Saksi ni Jehova, ginhatag mo ang imo bug-os kalag kay Jehova. (Heb. 10:7) Sa imo una nga higayon, tilawi nga mag-auxiliary payunir sa sulod sang isa ukon pila ka bulan. Paagi sa sini, matilawan mo ang mga kalipay kag mga responsabilidad sang pagregular payunir, kag ang imo panan-aw sa kon ano ang dapat mo himuon sa imo kabuhi pat-od gid nga mangin mas maathag. Kon amo, sa baylo nga magtrabaho sing bug-os tion pagkagradwar sa eskwela, ngaa indi nimo sugdan ang pagregular payunir? Ang iban nga ulihi na lang nagpayunir naghinulsol nga wala sila magpayunir sadto pa.
12 Subong isa ka pamatan-on, himusli ang imo mga kahigayunan nga mangin diminyo, kag agumon ang mga benepisyo nga mahatag sang bug-os tion nga hilikuton sa pagbantala. Kon handum mo nga magminyo sa pila ka adlaw, mangin mas maayo ang pundasyon sang imo pag-asawahay kon magregular payunir ka anay. Samtang nagahamtong ka sa pisikal kag espirituwal, mahimo nimo pilion ang pagpayunir subong imo karera upod sang imo tiayon nga may kaanggid man nga panghunahuna. Ang iban nga mga mag-asawa nga nagpayunir sing magkaupod nag-alagad sa sirkito ukon nangin mga misyonero. Isa gid ka makaalayaw nga dalanon sang pagkabuhi!
13 Bisan kon daw ano na ikaw kadugay nagpayunir, mapuslan mo ang imo edukasyon kag mabaton ang hamili nga paghanas nga indi mahatag sang iban pa nga hilikuton sa duta. Ang pagpayunir nagatudlo sing disiplina, personal nga organisasyon, kon paano makig-angot sa mga tawo, pagsalig kay Jehova, kag kon paano palambuon ang pagpailob kag pagkamainayuhon—mga kinaiya nga magasangkap sa imo sa dalagku pa nga mga katungdanan.
14 Ang kabuhi labi pa gid nga nangin wala sing kapat-uran para sa katawhan. Pila lamang ka butang ang tunay nga permanente, luwas sa ginsaad ni Jehova. Bangod ang imo palaabuton bukas sa imo, may maayo pa bala nga tion sangsa karon agod hunahunaon sing maayo kon ano ang himuon mo sa imo kabuhi sa ulihi nga tinuig? Tulutimbanga sing maayo ang pribilehiyo sa pagpayunir. Indi gid nimo paghinulsulan ang pagpili sa pagpayunir subong imo karera.
PAMANGKOT 4: “Indi bala isa ka dalayon nga pag-ipit ang paglab-ot sa oras? Paano na lang kon indi ko malab-ot ang akon oras?”
15 Sang ginsulatan mo ang aplikasyon sa pagregular payunir, mahimo nga ginsabat mo ang pamangkot (ginbadbad sa Hiligaynon): “Gin-organisar mo bala ang imo personal nga hilikuton agod malab-ot mo sing nagakaigo ang tuigan nga lalab-uton nga 1,000 ka oras?” Agod malab-ot ini, kinahanglan mo ang promedyo nga mga tatlo ka oras sa isa ka adlaw sa pag-alagad. Sing maathag, nagakinahanglan ini sing maayo nga pag-iskedyul kag pagdisiplina sa kaugalingon. Ang kalabanan nga mga payunir nakahimo sing praktikal, nagakaigo nga rutina sa sulod sang pila lang ka bulan.
16 Apang, ang Manugwali 9:11 matinuuron nga nagasiling, ‘Ang tion kag wala ginapaabot nga hitabo nagakahanabo sa aton tanan.’ Ang malubha nga balatian ukon iban pa wala ginapaabot nga mga kahimtangan mahimo mangin kabangdanan nga indi malab-ot sang payunir ang iya oras. Kon ang problema indi naman magadugay kag nagakatabo lamang sa maaga nga bahin sang tuig sa pag-alagad, ang pag-iskedyul sing dugang pa nga hilikuton mahimo nga amo lang ang kinahanglanon agod malab-ot ang kulang nga oras. Apang ano abi kon may nag-abot nga malubha nga problema pila na lang ka bulan ang nabilin sa tuig sang pag-alagad kag ang payunir indi na makalagas?
17 Kon umalagi ka lang nga nagmasakit sa pila ka bulan ukon tungod sa iban pa importante nga rason nga indi mo kontrolado wala mo malab-ot ang lalab-uton nga oras, sarang mo mapalapitan ang katapo sang Congregation Service Committee kag mapaathag ang problema. Kon sa banta sining mga gulang mahimo mo mapadayon ang imo pagpayunir nga wala na nagapalibog sa kulang nga oras, mahimo sila makadesisyon sing amo sina. Markahan sang sekretaryo ang Congregation’s Publisher Record card agod ipakita nga indi na kinahanglan nga pun-an mo ang kulang nga oras. Indi ini permiso nga indi mo na paghimuon ang imo katungdanan kundi, sa baylo, pinasahi ini nga konsiderasyon para sa imo mga kahimtangan.—Tan-awa ang Septiembre 1986 nga suplemento sang Ang Aton Ministeryo sa Ginharian, parapo 18.
18 Ang eksperiensiado nga mga payunir nagatipon sing reserba nga mga oras sa maaga nga bahin sang tuig sa pag-alagad. Ang ila prioridad amo ang ila pagpayunir, gani nakita nila kon kaisa nga kinahanglan kuhaon ang dikinahanglanon nga mga hilikuton. Kon ang payunir indi makalab-ot sang lalab-uton nga oras bangod sang mapigaw nga iskedyul ukon kakulang sing disiplina sa kaugalingon sa pagsunod sa sini, katungdanan niya nga pun-an ang kulang nga oras kag indi magpaabot sing pinasahi nga konsiderasyon.
19 May mga tion nga ang isa ka payunir makaeksperiensia sing dimalikawan nga pagbalhin sa iya mga kahimtangan. Ayhan indi niya mahimo malab-ot ang lalab-uton nga oras sa sulod sang malawig nga tion bangod sang problema sa kapagros, dugang nga responsabilidad sa pamilya, kag iban pa. Sa sini nga hitabo, mangin maalamon nga mangin manugbantala na lang sia liwat kag makigbahin kon san-o posible sa pag-auxiliary payunir. Wala sing regular nga probisyon sa pagtugot sa isa nga magpabilin sa listahan sang mga payunir kon ang iya mga kahimtangan wala na nagatugot sa iya nga malab-ot ang lalab-uton nga oras.
20 Ginalauman namon nga ang probisyon sa paghatag sing pinasahi nga konsiderasyon sa mga kalipikado magapalig-on sa madamo pa nga magpalista subong mga payunir nga indi kinahanglan nga magpalibog. Magapalig-on man ini sa mga nagaalagad na sing bug-os tion nga magpadayon sa pagpayunir. Luyag namon nga magmadinalag-on ang mga payunir sa ila bug-os tion nga pag-alagad.
PAMANGKOT 5: “Luyag ko nga may nahimo ako kag mangin malipayon sa paghimo sini. Mapahalipay bala ako sang pagpayunir?
21 Ang matuod nga kalipay nasandig sing daku sa suod, personal nga kaangtanan kay Jehova kag sa pagtuo nga ginaalagad naton sia sing matutom. Si Jesus nagbatas sa usok sang pag-antos “tungod sa kalipay nga ginbutang sa iya atubang.” (Heb. 12:2) Ang iya kalipay naghalin sa paghimo sang kabubut-on sang Dios. (Sal. 40:8) Sa karon nga sistema sang mga butang, maagom naton ang matuod nga kalipay kon ang kalabanan nga ginahimo naton may kaangtanan sa aton pagsimba kay Jehova. Ang espirituwal nga mga paghimud-os nagahatag sa aton sing katuyuan bangod sa aton tagipusuon nahibaluan naton nga husto ang ginahimo naton. Ang kalipay resulta sang paghatag, kag nahibaluan naton nga wala na sing mas maayo pa nga paagi sa paghatag sang aton kaugalingon sangsa pagtudlo sa iban kon paano matigayon ang kabuhi nga walay katapusan sa bag-ong kalibutan sang Dios.—Binu. 20:35.
22 Ang payunir nga ginbalikwat sa unang parapo nagpaathag sini sa sining paagi: “May daku pa bala nga kalipay sangsa makita ang isa nga gintun-an mo nga mangin aktibo nga dumalayaw ni Jehova? Makalilipay kag makapabakod sing pagtuo makita kon daw ano ka gamhanan ang Pulong sang Dios sa pagpahulag sa mga tawo sa paghimo sing mga pagbag-o sa ila kabuhi agod mapahamut-an si Jehova.” (Tan-awa ang Oktubre 15, 1997, Lalantawan, pahina 18-23.) Gani, ano ang nagahatag sa imo sing kalipay? Kon, sa baylo sang umalagi nga kalipay nga ginatanyag sang kalibutan, ginapabilihan mo ang permanente, mapuslanon nga mga panikasog, ang pagpayunir magahatag sa imo sing makalilipay nga balatyagon sang pagkamayhinimuan nga magapahalipay gid sa imo.
PAMANGKOT 6: “Kon indi ini kinahanglanon para sa kabuhi nga walay katapusan, indi bala ako ang magadesisyon kon mapayunir ako ukon indi?”
23 Matuod, ikaw ang magadesisyon kon bala magapayunir ka. Si Jehova lamang ang makahukom sang imo personal nga mga kahimtangan sa kabuhi. (Roma 14:4) Makatarunganon niya nga ginapaabot sa imo nga alagaron mo sia sa imo bug-os nga tagipusuon, kalag, hunahuna, kag kusog. (Mar. 12:30; Gal. 6:4, 5) Ginahigugma niya ang malipayon nga nagahatag, ang isa nga nagaalagad sa iya sing malipayon, indi sing may aligutgot ukon pagpilit. (2 Cor. 9:7; Col. 3:23) Ang imo rason kon ngaa nagaalagad ka sing bug-os tion amo nga ginahigugma mo si Jehova kag ang mga tawo sa teritoryo. (Mat. 9:36-38; Mar. 12:30, 31) Kon amo sini ang imo balatyagon, nian nagakaigo nga imo binagbinagon sing hanuot ang pagpayunir.
24 Ginalauman namon nga ang ginbalay diri magabulig sa inyo sa pagtulutimbang sang inyo handum nga magpayunir. Mapasibu mo bala ang imo mga kahimtangan agod makaregular payunir? Nalista sa ubos ang isa ka kalendaryo nga natig-uluhan “Ang Akon Semanal nga Iskedyul sa Pagpayunir.” Tan-awa kon may mapili ka nga praktikal nga iskedyul para sa imo nga magapahanugot sa imo nga makapromedyo sing mga 23 ka oras kada semana sa ministeryo. Nian, magtuo ka kag magsalig sing bug-os kay Jehova. Paagi sa bulig niya magamadinalag-on ka! Nanaad sia: “Iula ko sa inyo ang pagpakamaayo sa bagay nga wala na sing masudlan.”—Mal. 3:10.
25 Gani mamangkot kita, “Pagpayunir—para bala ini sa imo?” Kon makasiling ka sing “Huo,” magtalana sing petsa agod makasugod sa gilayon sa pagregular payunir kag makasalig ka nga pakamaayuhon ikaw ni Jehova sing malipayon nga kabuhi!
[Tsart sa pahina 6]
Ang Akon Semanal nga Iskedyul sa Pagpayunir
LUNES Pag-alagad sa latgon sa aga
MARTES Pag-alagad sa latgon sa aga
MIERKOLES Pag-alagad sa latgon sa aga
HUEBES Pag-alagad sa latgon sa aga
BIERNES Pag-alagad sa latgon sa aga
SABADO Pag-alagad sa latgon sa aga
DOMINGO Pag-alagad sa latgon sa aga
LUNES Pag-alagad sa latgon sa hapon
MARTES Pag-alagad sa latgon sa hapon
MIERKOLES Pag-alagad sa latgon sa hapon
HUEBES Pag-alagad sa latgon sa hapon
BIERNES Pag-alagad sa latgon sa hapon
SABADO Pag-alagad sa latgon sa hapon
DOMINGO Pag-alagad sa latgon sa hapon
LUNES Pag-alagad sa latgon sa gab-i
MARTES Pag-alagad sa latgon sa gab-i
MIERKOLES Pag-alagad sa latgon sa gab-i
HUEBES Pag-alagad sa latgon sa gab-i
BIERNES Pag-alagad sa latgon sa gab-i
SABADO Pag-alagad sa latgon sa gab-i
DOMINGO Pag-alagad sa latgon sa gab-i
Maggamit sing lapis sa pagrekord sang imo iskedyul para sa kada adlaw sang semana.
Mag-iskedyul sing kabug-usan nga mga 23 ka oras kada semana sa pag-alagad sa latagon.
Kabug-usan nga oras kada semana nga naiskedyul____________________