Bahin 3—Pagdumala sing Mainuswagon nga mga Pagtuon sa Biblia
Epektibo nga Paggamit sang Kasulatan
1 Ang aton katuyuan sa pagdumala sing mga pagtuon sa Biblia amo ang ‘paghimo sing mga disipulo’ paagi sa pagbulig sa mga tawo nga mahangpan kag batunon ang mga panudlo sang Pulong sang Dios kag iaplikar nila ini. (Mat. 28:19, 20; 1 Tes. 2:13) Gani ang pagtuon dapat isentro sa Kasulatan. Sa primero, mas maayo nga buligan ang mga estudyante sa pagpangita sang mga teksto sa ila mismo kopya sang Biblia. Apang, paano naton magamit ang Kasulatan agod mag-uswag sila sa espirituwal?
2 Pilia ang mga Teksto nga Basahon: Sa tion sang imo paghanda, binagbinaga kon paano ang tagsa ka teksto sa leksion naangot sa ginahinun-anunan, kag magpili kon ano nga teksto ang basahon sa tion sang pagtuon. Sa kabug-usan, mas maayo kon basahon ang mga teksto nga nagapakita sang aton Makasulatanhon nga mga pagpati. Ang mga teksto nga nagahatag lamang sang impormasyon mahimo nga indi na kinahanglan nga basahon. Talupangda ang mga kinahanglanon kag mga sirkunstansia sang kada estudyante.
3 Maggamit sing mga Pamangkot: Ang estudyante ang magpaathag sang mga teksto sa Biblia, sa baylo nga ikaw. Mapahulag mo sia sa paghimo sini paagi sa mataktikanhon nga paggamit sang mga pamangkot. Kon ang aplikasyon sang teksto maathag, mahimo mo sia mapamangkot kon paano ini nga teksto nagasakdag sa ginsiling sa parapo. Sa iban nga mga kaso, ang mas espesipiko ukon paagisod nga mga pamangkot mahimo nga kinahanglan agod makahinakop ang estudyante sing husto. Kon kinahanglan pa ang dugang nga paathag, himua ini sa tapos makasabat ang estudyante.
4 Mangin Simple: Ang lantip nga manugpana nagakinahanglan lamang sing isa ka baslay sa pag-igo sa iya puntariya. Sing kaanggid, ang lantip nga manunudlo wala nagahambal sing madamo sa pagpaathag sang isa punto. Sarang niya mapaambit ang impormasyon sing simple, maathag, kag sing sibu. Kon kaisa, kinahanglan mo nga magpanalawsaw sa Cristianong mga publikasyon agod mahangpan ang isa ka teksto kag mapaathag ini sing husto. (2 Tim. 2:15) Apang likawi nga ipaathag ang tagsa ka aspekto sang kada teksto sa inyo pagtuon. Ilakip lamang ang ginakinahanglan nga punto sa ginahinun-anunan.
5 Maghimo sing Praktikal nga Aplikasyon: Kon nagakaigo, buligi ang estudyante kon paano niya iaplikar ang mga teksto sang Biblia sa iya kabuhi. Halimbawa, kon ginabinagbinag ang Hebreo 10:24, 25 sa estudyante nga wala pa nagatambong sa Cristianong mga miting, mahimo mo hinun-anunan sa iya ang isa sa mga miting kag hagaron sia sa pagtambong. Apang indi sia pagpilita. Tuguti ang Pulong sang Dios nga magpahulag sa iya nga pahamut-an si Jehova.—Heb. 4:12.
6 Samtang nagahimo kita sing mga disipulo, kabay nga ‘palig-unon naton ang pagkamasinulundon paagi sa pagtuo’ paagi sa paggamit naton sing epektibo sang Kasulatan.—Roma 16:26.
[Mga Pamangkot sa Pagtinuon]
1. Ngaa dapat naton ipadaku ang Kasulatan kon nagadumala sing mga pagtuon sa Biblia?
2. Paano kita makapili kon ano nga teksto sa Biblia ang basahon kag hinun-anunan?
3. Ano ang kapuslanan sang paggamit sing mga pamangkot, kag paano naton ini himuon?
4. Daw ano kalawig ang ginakinahanglan nga pagpaathag sa mga teksto nga aton ginabasa?
5, 6. Paano naton mabuligan ang mga estudyante sa pag-aplikar sang Pulong sang Dios sa ila kabuhi, apang ano ang dapat naton likawan?