Tipigi

Pagdumala sing Mainuswagon nga mga Pagtuon sa Biblia

Ini nga suplemento nagaunod sang panguna nga mga punto gikan sa serye sang artikulo nga pagdumala sing mainuswagon nga mga pagtuon sa Biblia sang Ang Aton Ministeryo sa Ginharian. Ginapalig-on ang tanan nga tipigan ini nga suplemento kag usisaon ini kon nagadumala sing mga pagtuon sa Biblia. Luwas pa, ang mga punto sa sini nga suplemento ipatalupangod sa tion sang mga miting para sa pag-alagad sa latagon, kag mahimo nga ipasad sa sini sang manugtatap sa pag-alagad ang iya pamulongpulong kon nagaduaw sa mga grupo sang pagtinuon sa libro.

Bahin 1: Ano ang Isa ka Pagtuon sa Biblia?

Kon regular kag sistematiko ka nga nagahinun-anon sa Biblia sa isa ka tawo, bisan sing malip-ot lamang, nga nagagamit sing Biblia kag sing ginapanugda nga mga publikasyon, nagadumala ikaw sing isa ka pagtuon sa Biblia. Ang pagtuon sarang mareport pagkatapos nga mahiwat ini sing duha ka beses sa tapos mapasundayag ang kahimusan sa pagtuon kag kon may patimaan nga magapadayon ang pagtuon.—⁠km 7/04 p. 1.

Ginapanugda nga mga Publikasyon

◼ Ano ang Ginapatuman Sang Dios sa Aton?

◼ Ang Ihibalo nga Nagadul-ong sa Kabuhi nga Walay Katapusan

◼ Simbaha ang Lamang Matuod nga Dios

◼ Ang Mahimo Ikaw Mangin Abyan Sang Dios! sarang magamit sa pagtuon sa mga tawo nga wala sing mataas nga edukasyon ukon mahinay magbasa.

Bahin 2: Paghanda sa Pagdumala Sang Pagtuon

Kinahanglan ipresentar naton ang impormasyon sa paagi nga matandog ang tagipusuon sang estudyante. Nagakinahanglan ini sing paghanda sing maayo sa kon ano ang kinahanglanon sang estudyante.—⁠km 8/04 p. 1.

Kon Paano Maghanda

◼ Usisaa sing makadali ang tig-ulo, mga subtitulo, kag mga laragway sa kapitulo ukon leksion.

◼ Hibalua ang mga sabat sa naimprinta nga mga pamangkot, nagakurit lamang sing yabi nga mga tinaga kag mga prase.

◼ Mamat-od kon diin sa mga teksto nga nasambit ang basahon sa tion sang pagtuon. Magnota sing malip-ot sa marhin sang ginatun-an nga publikasyon.

◼ Maghanda sing malip-ot nga repaso sa panguna nga mga punto.

Ipasibu ang Leksion

◼ Ipangamuyo ang estudyante kag ang iya mga kinahanglanon.

◼ Hunahunaa sing abanse ang mga punto nga mabudlay hangpon ukon batunon sang estudyante.

◼ Binagbinaga: Ano ang dapat niya mahangpan ukon panikasugan agod mag-uswag sa espirituwal? Paano ko malab-ot ang iya tagipusuon?

◼ Kon kinahanglanon, maghanda sing isa ka ilustrasyon, paathag, ukon mga pamangkot agod mabuligan ang estudyante nga mahangpan ang isa ka punto ukon teksto.

Bahin 3: Epektibo nga Paggamit Sang Kasulatan

Ang aton katuyuan sa pagdumala sing mga pagtuon sa Biblia amo ang ‘paghimo sing mga disipulo’ paagi sa pagbulig sa mga tawo nga mahangpan kag batunon ang mga panudlo sang Pulong sang Dios kag iaplikar nila ini. (Mat. 28:19, 20; 1 Tes. 2:13) Gani ang pagtuon dapat isentro sa Kasulatan.—⁠km 11/04 p. 8.

Itudlo ang Pulong Sang Dios

◼ Buligi ang estudyante sa pagpangita sang mga teksto sa iya Biblia.

◼ Pilia kag hinun-anuni ang mga teksto sa Biblia nga amo ang basehan sang aton Makasulatanhon nga mga pagpati.

◼ Maggamit sing mga pamangkot. Ang estudyante ang magpaathag sang mga teksto sa Biblia, sa baylo nga ikaw.

◼ Mangin simple. Indi pag-ipaathag ang tagsa ka aspekto sang teksto. Ilakip lamang ang makapaathag sa punto.

◼ Maghimo sing praktikal nga aplikasyon. Buligi ang estudyante kon paano niya iaplikar ang mga teksto sa Biblia.

Bahin 4: Paghanas sa mga Estudyante sa Paghanda

Madasig mag-uswag sa espirituwal ang isa ka estudyante kon nagabasa sia sang leksion sing abanse, nagamarka sang mga sabat, kag nagahunahuna kon paano ini ipabutyag sa iya kaugalingon nga mga tinaga. Gani, kon mangin regular na ang pagtuon, upda sia sa paghanda sang isa ka leksion kag ipakita kon paano ini himuon. Sa kalabanan nga estudyante, maayo nga ihanda ang bug-os nga kapitulo ukon leksion.—⁠km 12/04 p. 1.

Pagmarka kag Pagnota

◼ Ipaathag kon paano makita ang direkta nga mga sabat sa naimprinta nga mga pamangkot.

◼ Ipakita sa estudyante ang imo kopya nga ginatun-an nga ang ginmarkahan mo amo lamang ang yabi nga mga tinaga ukon mga prase.

◼ Buligi ang estudyante sa paghangop nga ang tagsa ka nabalikwat nga teksto nagasakdag sa isa ka punto sa parapo, kag ipakita sa iya kon paano himuon ang pagnota sing malip-ot sa marhin sang iya kopya nga ginatun-an.

Usisaa Sing Makadali kag Repasuha

◼ Ipakita sa estudyante kon paano usisaon ang mga tig-ulo sang kapitulo ukon leksion, mga subtitulo, kag mga ilustrasyon antes ang detalyado nga paghanda.

◼ Palig-una ang estudyante sa pagrepaso sa pangunang mga punto sa hingapusan sang paghanda.

Bahin 5: Pagbinagbinag Kon Daw Ano Kadamo nga Materyal ang Pagatuptupan

Ang kadamuon sang materyal nga binagbinagon magadepende sa ikasarang kag kahimtangan sang manunudlo kag sang estudyante.—⁠km 1/05 p. 1.

Magpatudok Sing Mapag-on nga Pagtuo

◼ Mas importante nga mahangpan sing maayo sang estudyante ang materyal sangsa matuptupan ang madamo nga materyal sa malip-ot nga tion.

◼ Maghinguyang sing kinahanglanon nga tion agod mabuligan ang estudyante nga mahangpan kag maaplikar ang iya natun-an.

◼ Maghinguyang sing supisyente nga tion agod mabinagbinag ang yabi nga mga teksto nga ginbasihan sang mga panudlo.

Likawi nga Mabuyo

◼ Kon madamo sing ginahambal ang estudyante tuhoy sa personal nga mga butang, puede ninyo hambalan ini pagkatapos sang pagtuon.

◼ Punggi ang paghambal sing madamo sa tion sang pagtuon. Limitehi ang pagsugid sang segundaryo nga mga punto kag mga eksperiensia agod indi maupangan ang pagtigayon sang estudyante sing sibu nga ihibalo sa panguna nga mga panudlo sang Biblia.

Bahin 6: Kon Mamangkot ang Estudyante

Kon regular na ang pagtuon sa Biblia, mas maayo nga binagbinagon ang mga panudlo sang Biblia sa organisado nga paagi sa baylo nga magsulusaylo. Mabuligan sini ang estudyante nga makapahamtang sing sadsaran sang sibu nga ihibalo kag mag-uswag sa espirituwal.—⁠km 2/05 p. 6.

Mangin Mahinantupon

◼ Ang pamangkot nga may kaangtanan sa ginatun-an mahimo nga sabton ora-mismo.

◼ Ang mga pamangkot nga wala sing labot sa ginatun-an ukon nagakinahanglan sing pagpanalawsaw mahimo binagbinagon sa iban nga tion. Mabuligon kon isulat ina nga mga pamangkot.

◼ Kon nabudlayan ang estudyante sa pagbaton sang isa ka panudlo, binagbinaga ang dugang nga materyal nga nagapaathag pa sing maayo sa sini nga panudlo.

◼ Kon indi gihapon kumbinsido ang estudyante, pabay-i anay ini kag magpadayon sa pagtuon.

Mangin Mapainubuson

◼ Kon indi mo mahibaluan ang sabat sa pamangkot, indi magpadasudaso sa paghatag sang imo opinyon.

◼ Amat-amat nga tudlui ang estudyante sa pagpanalawsaw.

Bahin 7: Pagpangamuyo sa Pagtinuon

Agod mag-uswag sa espirituwal ang mga estudyante sa Biblia, kinahanglan gid ang pagpakamaayo ni Jehova. Sa amo, nagakaigo lamang nga buksan kag takpan sing pangamuyo ang isa ka regular nga pagtinuon.—⁠km 4/05 p. 8.

Kon San-o Sugdan ang Pangamuyo

◼ Sa mga relihioso nga tawo, mahimo mangamuyo sa una pa lang nga pagtuon.

◼ Sa iban, kinahanglan nga hantupon naton ang nagakaigo nga tion kon san-o sugdan ang pangamuyo.

◼ Mahimo mo magamit ang Salmo 25:4, 5 kag 1 Juan 5:14 sa pagpaathag kon ngaa dapat mangamuyo.

◼ Mahimo magamit ang Juan 15:16 agod ipahangop nga dapat kay Jehova lamang kita mangamuyo paagi kay Jesucristo.

Kon Ano ang Ilakip sa Pangamuyo

◼ Nagakaigo lang nga dayawon si Jehova subong Tuburan sang instruksion.

◼ Ipabutyag ang sinsero nga interes sa estudyante.

◼ Ipabutyag ang apresasyon sa organisasyon nga ginagamit ni Jehova.

◼ Pangabaya ang pagpakamaayo ni Jehova sa panikasog sang estudyante nga iaplikar ang iya natun-an.

Bahin 8: Pagtuytoy sa mga Estudyante Pasulod sa Organisasyon

Ang aton tulumuron sa pagdumala sing mga pagtuon sa Biblia indi lamang ang pagtudlo tuhoy sa doktrina kundi ang pagbulig man sa mga estudyante nga mangin bahin sang Cristianong kongregasyon. Maghinguyang sing pila ka minuto kada semana agod ipaambit ang pila ka punto tuhoy sa organisasyon ni Jehova.—⁠km 5/05 p. 1.

Mga Miting sa Kongregasyon

◼ Ipaathag ang tagsa ka miting sa kongregasyon. Agdaha sila sa pagtambong bisan sa una pa lang nga pagtuon.

◼ Ipaambit ang talalupangdon nga mga punto nga ginpresentar sa mga miting.

◼ Palambua ang interes sa pagtambong sa Memoryal, sa mga asambleya, kag sa pagduaw sang manugtatap sang sirkito.

◼ Gamita ang mga laragway sa aton mga publikasyon agod buligan sila nga mahanduraw kon ano ang mga nagakatabo sa mga miting.

◼ Palig-una sila nga basahon ang brosyur nga Mga Saksi ni Jehova—⁠Sin-o Sila? Ano ang Ila Ginapatihan?

Pagpasalida Sang mga Video Agod Mapabakod ang Apresasyon

◼ Jehovah’s Witnesses—⁠The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Bahin 9: Paghanda sa mga Estudyante nga Manaksi Sing Di-Pormal

Samtang nagasugod sa pagtuo ang mga estudyante sa Biblia sa ila natun-an, mapahulag sila nga ihambal ini.—⁠km 6/05 p. 1.

Palig-una Sila nga Manaksi

◼ Maagda bala nila ang ila mga abyan kag mga katapo sang pamilya nga mag-upod sa pagtuon?

◼ Interesado bala ang ila mga katrabaho, kabutho, ukon mga kakilala?

Hanasa Sila sa Pagpaambit Sang Ila mga Pagpati

◼ Sa pila ka pinili nga punto sa pagtuon, pamangkuta ang estudyante, “Paano mo gamiton ang Biblia agod ipaathag ining kamatuoran sa imo pamilya?”

◼ Dapat mahangpan sang estudyante nga kinahanglan nga mangin matinahuron kag mainayuhon kon nagapakighambal sa iban tuhoy sa Dios kag sa iya mga katuyuan.

◼ Mahimo magamit sang mga estudyante ang brosyur nga Mga Saksi ni Jehova—⁠Sin-o Sila? Ano ang Ila Ginapatihan? sa pagbulig sa ila mga abyan kag mga katapo sang pamilya nga mahangpan ang aton pasad sa Biblia nga mga pagpati kag mga hilikuton.

Bahin 10: Paghanas sa mga Estudyante Para sa Pamalaybalay nga Ministeryo

Kon napat-od sang mga gulang nga ang isa ka estudyante sa Biblia kalipikado na nga mangin isa ka di-bawtismado nga manugbantala, mahimo na sia makigbahin sa publiko nga pagbantala upod sa kongregasyon.—⁠km 7/05 p. 1.

Magkaupod nga Maghanda

◼ Ipakita sa bag-uhan nga manugbantala kon sa diin sia makasapo sing panugda nga mga presentasyon.

◼ Buligi sia sa pagpili sing isa ka simple nga introduksion nga praktikal sa inyo teritoryo.

◼ Palig-una sia nga gamiton ang Biblia sa iya ministeryo.

◼ Magkaupod nga mag-ensayo. Ipakita sa iya kon paano atubangon sing mataktikanhon ang kinaandan nga mga reaksion.

Magkaupod nga Nagabantala

◼ Papanilaga sia sa imo samtang ginapresentar mo ang ginhandaan ninyo nga duha.

◼ Mangin mapasibusibuon man sa personalidad kag mga ikasarang sang estudyante. Sa iban nga higayon, labing maayo kon magapakigbahin sia sing malip-ot lang sa presentasyon.

◼ Buligi ang bag-uhan nga manugbantala nga magpahamtang sing isa ka regular nga iskedyul sa pagpakigbahin sa ministeryo.

Bahin 11: Pagbulig sa Bag-uhan nga mga Manugbantala sa Pagduaw Liwat

Ang paghanda para sa pagduaw liwat nagasugod sa una nga pagpakigsugilanon. Palig-una ang mga estudyante nga mangin interesado gid sa mga tawo nga ila masugilanon. Hanasa sila sing amat-amat kon paano makumbinsi ang mga tagbalay sa pagpabutyag sang ila balatyagon kag hunahuna, sa pagpamati sa ila mga sabat, kag sa pagtalupangod sa mga butang nga ila ginakabalak-an.—⁠km 8/05 p. 1.

Paghanda sa Pagduaw Liwat

◼ Repasuha ang una nga pagduaw, kag buligi ang estudyante sa pagpili sing topiko nga makapaganyat sa tagbalay.

◼ Maghanda sing isa ka malip-ot nga presentasyon nga nagagamit sing isa ka teksto sa Biblia kag isa ka parapo sa publikasyon.

◼ Maghanda sing pamangkot sa paghinakop sang paghinun-anon.

Makugi sa Pagbalik sa mga Interesado

◼ Palig-una ang estudyante nga balikan gilayon ang mga interesado.

◼ Buligi ang estudyante nga mahangpan nga kinahanglanon gid ang pirme nga pagbalik agod masugilanon ang mga tawo nga wala pirme sa balay.

◼ Ipakita sa estudyante kon paano sia magkontrata sa pagbalik duaw, kag pahangpa sia nga dapat tumanon gid niya ang iya panaad nga magbalik.

Bahin 12: Pagbulig sa mga Estudyante nga Makasugod kag Makadumala Sing mga Pagtuon sa Biblia

Importante gid ang pag-ilog kay Jesus paagi sa pagpahamtang sing maayong halimbawa sa imo ministeryo. Samtang nagapanilag ang imo estudyante sa imo pagministeryo, mahangpan niya nga ang katuyuan sang pagduaw liwat amo ang pagsugod sing pagtuon sa Biblia.—⁠km 9/05 p. 1.

Pagtanyag sing Pagtuon sa Biblia

◼ Indi kinahanglan nga idetalye naton sa iya ang kahimusan sa pagtuon.

◼ Sa masami labing maayo kon ipasundayag ang pagtuon paagi sa paggamit sang isa ukon duha ka parapo sa ginatun-an nga publikasyon.

◼ Repasuha kag ensayuha ang isa sa mga panugda sa pagsugod sing mga pagtuon sa Biblia.—⁠km 8/05 p. 4; km 5/02 p. 6.

Hanasa ang mga Estudyante nga Mangin mga Manunudlo

◼ Palig-una ang mga estudyante nga magpalista sa Teokratikong Eskwelahan Para sa Ministeryo.

◼ Paupda ang bag-uhan nga mga manugbantala sa imo sa iban mo nga ginatun-an sa Biblia agod nga makapakigbahin sila bisan malip-ot lang.