Kon Paano Buligan ang Aton mga Ginatudluan sang Biblia nga Mag-uswag kag Magpabawtismo—Una nga Artikulo

1. Ano ang ginasiling sang 2 Corinto 3:1-3 nga nagapakita nga isa gid ka pribilehiyo nga mabuligan ang iban nga magpabawtismo? (Tan-awa ang piktyur sa kober.)

ANO ang nabatyagan mo sang nabawtismuhan ang nagatuon sang Biblia sa inyo kongregasyon? Sigurado gid nga nalipay ka. (Mat. 28:19) Kag kon ikaw ang nagtudlo sang Biblia sa iya, nagalumapaw pa gid ang imo kalipay! (1 Tes. 2:19, 20) Ang mga bag-o nga nabawtismuhan daw pareho sa maayo nga “mga sulat nga nagadayaw,” indi lang sa mga nagtudlo sang Biblia sa ila kundi sa bilog man nga kongregasyon.—Basaha ang 2 Corinto 3:1-3.

2. (a) Ano ang importante nga pamangkot nga dapat naton binagbinagon, kag ngaa? (b) Ano ang ginatawag nga Bible study? (Tan-awa ang footnote.)

² Nalipay gid kita nga sang nagligad nga apat ka tuig, mga 10,000,000 ka Bible studyb ang ginareport kada bulan sa bilog nga kalibutan. Kag sa amo gihapon nga mga tuig, sobra 280,000 ang ginabawtismuhan kada tuig bilang mga Saksi ni Jehova kag bag-o nga mga disipulo ni Jesucristo. Sa minilyon nga ginatudluan naton sang Biblia, paano naton mabuligan ang madamo sa ila nga magpabawtismo? Ginahatagan pa ni Jehova sang kahigayunan ang mga tawo nga mangin disipulo sang Cristo, gani dapat naton himuon ang aton bug-os nga masarangan nga buligan sila nga mag-uswag kag magpabawtismo. Malip-ot na lang ang tion nga nabilin!—1 Cor. 7:29a; 1 Ped. 4:7.

3. Ano ang binagbinagon naton sa sini nga artikulo parte sa pagtudlo naton sang Biblia sa iban?

³ Bangod importante gid nga tudluan ang mga tawo para mangin disipulo sila, ginpamangkot sang Nagadumala nga Hubon ang mga branch office kon ano ang dapat himuon para mabuligan naton ang aton mga ginatudluan sang Biblia nga mag-uswag kag magpabawtismo. Sa sini nga artikulo kag sa masunod pa gid, binagbinagon naton ang matun-an naton sa madugay na nga mga payunir, mga misyonero, kag mga manugtatap sang sirkito.c (Hulu. 11:14; 15:22) Ginpaathag nila kon ano ang puede himuon sang nagatudlo sang Biblia kag sang iya ginatudluan para mag-uswag gid ang nagatuon. Sa sini nga artikulo, binagbinagon naton ang lima ka butang nga dapat himuon sang aton ginatudluan sang Biblia para mag-uswag sia kag magpabawtismo.

HIMUA ANG INYO PAGTUON KADA SEMANA

4. Kon ang ginahimo naton nga pagtuon sang Biblia malip-ot lang kag nagatindog lang kita sa puertahan sang tagbalay, ano ang posible nga resulta sini?

⁴ Madamo sa aton mga kauturan ang nagatudlo sang Biblia sa iban sa malip-ot lang nga tion. Kon kaisa, nagatindog lang sila sa puertahan sang tagbalay kag posible nga indi sila makatuon kada semana. Maayo ini nga paagi para mangin interesado ang tagbalay sa Biblia, pero may dapat pa kita himuon para mapalig-on ang tagbalay nga magtuon sing regular. Ginapangayo sang iban nga kauturan ang contact number sang tagbalay, kag dayon nagatawag sila para istoryahan sing makadali ang Biblia ukon naga-text sila sang mga topiko sa Biblia. Mahimo nga maglawig ini nga paagi sa pila ka bulan. Pero magadedikar bala kag magapabawtismo ang aton ginatudluan kon malip-ot lang nga tion ang ginagamit niya sa pagtuon sang Biblia kag wala sia masyado nagapanikasog? Posible nga indi.

5. Suno sa Lucas 14:27-33, ano ang ginsiling ni Jesus nga makabulig sa aton pagtudlo sang Biblia sa iban?

⁵ Naggamit si Jesus sang isa ka halimbawa para ipaathag kon ano ang dapat himuon sang isa ka tawo para mangin disipulo niya sia. Parte ini sa isa ka tawo nga gusto maghimo sang isa ka torre kag parte sa isa ka hari nga gusto magpakig-away sa isa pa ka hari. Nagsiling si Jesus nga dapat ‘anay magpungko ang isa ka tawo kag sumahon niya kon pila ang gastuhon niya’ para mapahuman ang torre, kag dapat ‘anay magpungko ang hari kag makigsapol sa iban’ para mabal-an niya kon bala masarangan sang iya mga soldado ang ginaplano nila nga himuon. (Basaha ang Lucas 14:27-33.) Kabalo man si Jesus nga dapat man anay binagbinagon sing maayo sang isa ka tawo kon ano ang mga dapat niya himuon para mangin disipulo niya sia. Gani dapat naton palig-unon ang aton mga ginatudluan sang Biblia nga himuon ang aton pagtuon kada semana. Paano?

6. Ano ang puede naton himuon para mag-uswag ang aton ginatudluan sang Biblia?

⁶ Tinguhai nga palawigon ang inyo ginahimo nga pagtuon sa puertahan sang tagbalay. Kon isa lang ka teksto ang ginabinagbinag mo sa kada pagduaw mo sa iya, dugangi ini. Kon daw naanad na sia sa inyo malawig nga pag-istoryahanay, hambala sia nga mas maayo nga magpungko kamo para mas makaistoryahanay kamo sing maayo parte sa Biblia. Depende sa iya isiling, mahangpan mo kon importante gid sa iya ang pagtuon sang Biblia. Para nga mas madasig sia nga makatuon, pamangkuta sia kon gusto niya magtuon sing duha ka beses kada semana. Kon nagatuon na kamo sing isa ukon duha ka beses kada semana, may dapat pa kamo himuon.

HANDAI ANG KADA PAGTUON

7. Ano ang himuon sang nagatudlo sang Biblia para makahanda sia sing maayo sa kada pagtuon?

⁷ Kon nagatudlo ka sang Biblia sa isa ka tawo, dapat ka maghanda sing maayo antes kamo magtuon. Basaha ang inyo pagatun-an kag ang mga teksto sa sini. Tandai ang importante nga mga punto. Binagbinaga ang tig-ulo sang inyo pagatun-an, ang mga subtitulo, ang mga pamangkot sang kada parapo, ang mga teksto nga may nakasulat nga “basaha,” ang mga piktyur, kag ang mga video nga makabulig nga mangin maathag ang topiko. Dayon hunahunaa kon paano mo ini mapaathag sing simple kag madali maintiendihan para maaplikar ini sang imo ginatudluan.—Neh. 8:8; Hulu. 15:28a.

8. Ano ang ginsiling ni apostol Pablo sa Colosas 1:9, 10 parte sa aton pagpangamuyo para sa aton ginatudluan sang Biblia?

⁸ Kon nagahanda ka, ipangamuyo kay Jehova ang imo ginatudluan kag ang iya mga kinahanglanon. Pangabaya si Jehova nga buligan ka nga matudlo ang Biblia para matandog ang tagipusuon sang imo ginatudluan. (Basaha ang Colosas 1:9, 10.) Hunahunaa kon ano nga mga punto ang mahimo nga mabudlayan sia nga maintiendihan ukon indi sia magkomporme. Tandai nga gusto mo sia buligan nga mag-uswag kag magpabawtismo.

9. Paano naton mabuligan ang aton ginatudluan nga maghanda sa iya pagtuon? Ipaathag.

⁹ Nagalaum kita nga paagi sa regular nga pagtuon sang Biblia, maapresyar sang aton ginatudluan ang ginahimo ni Jehova kag ni Jesus kag mapalig-on sia sa sini nga dugangan ang iya nabal-an. (Mat. 5:3, 6) Para madamo sing matun-an ang aton ginatudluan, dapat sia magpokus sa iya ginatun-an. Gani ipaathag sa iya nga importante gid nga handaan niya ang kada pagtuon paagi sa pagbasa sing abanse sang inyo pagatun-an kag paghunahuna kon paano niya ini iaplikar. Paano mo sia mabuligan nga maghanda? Handai ninyo nga magkaupod ang inyo pagatun-an kag ipakita sa iya kon paano ini himuon.d Tudlui sia kon paano makita ang sabat sa kada parapo, kag ipakita sa iya nga madumduman niya ini kon kuritan niya ukon markahan ang importante lang nga mga tinaga. Dayon pangabaya sia nga ipaathag sa iya kaugalingon nga mga tinaga ang iya sabat. Paagi sa sini, mabal-an mo kon nahangpan niya ang iya ginatun-an. Pero may puede ka pa ipanugda sa imo ginatudluan nga dapat niya himuon.

TUDLUI SIA NGA MAMATI KAG MANGAMUYO KAY JEHOVA KADA ADLAW

10. Ngaa importante ang pagbasa sing Biblia kada adlaw, kag ano ang dapat himuon sang isa para makabenepisyo gid sia sa iya pagbasa sing Biblia?

¹⁰ Para mag-uswag ang nagatuon sang Biblia, dapat may himuon pa gid sia kada adlaw magluwas sa ginahimo ninyo nga pagtuon kada semana. Dapat sia mamati kag mangamuyo kay Jehova. Makapamati sia sa Dios paagi sa pagbasa sing Biblia kada adlaw. (Jos. 1:8; Sal. 1:1-3) Tudlui sia kon paano gamiton ang “Iskedyul sa Pagbasa sing Biblia” nga makita sa jw.org.e Puede ini ma-print. Pero para makabenepisyo sia sa iya pagbasa sing Biblia, palig-una sia nga pamalandungan kon ano ang ginatudlo sang Biblia parte kay Jehova kag kon paano niya ini maaplikar sa iya kabuhi.—Binu. 17:11; Sant. 1:25.

11. Paano makatuon ang isa kon paano mangamuyo, kag ngaa dapat mangamuyo sia pirme kay Jehova?

¹¹ Palig-una ang imo ginatudluan sang Biblia nga mangamuyo kay Jehova kada adlaw. Mangamuyo sing tinagipusuon sa umpisa kag pagkatapos sang inyo pagtuon, kag sambita sia sa imo mga pangamuyo. Paagi sa pagpamati sa imo mga pangamuyo, matun-an niya nga mangamuyo sing tinagipusuon kag mapalig-on sia sa sini nga mangamuyo kay Jehova nga Dios sa ngalan ni Jesucristo. (Mat. 6:9; Juan 15:16) Ang pagbasa sing Biblia kada adlaw kag pagpangamuyo kay Jehova makabulig gid sa imo ginatudluan nga mangin suod sa Dios. (Sant. 4:8) Kon himuon niya ini kada adlaw, magabulig ini sa iya nga magdedikar kag magpabawtismo. Ano pa gid ang makabulig sa iya?

BULIGI SIA NGA MANGIN SUOD KAY JEHOVA

12. Paano naton mabuligan ang aton ginatudluan sang Biblia nga mangin suod kay Jehova?

¹² Gusto naton nga ang aton ginatudluan sang Biblia makatuon parte kay Jehova. Pero dapat man ini magpalig-on sa iya nga iaplikar ang iya mga natun-an. Maayo gid magtudlo si Jesus, gani nanamian gid ang mga tawo magpamati sa iya. Pero ginpalig-on pa gid sila ni Jesus nga iaplikar ang iya mga gintudlo, gani nagsunod sila sa iya. (Luc. 24:15, 27, 32) Dapat mahangpan sang imo ginatudluan sang Biblia nga si Jehova matuod gid, kag puede sia mangin suod sa Iya. Dapat man niya mahangpan nga puede niya mangin Amay, Dios, kag Abyan si Jehova. (Sal. 25:4, 5) Samtang nagatuon kamo, ipatalupangod sa iya ang dalayawon nga mga kinaiya sang aton Dios. (Ex. 34:5, 6; 1 Ped. 5:6, 7) Bisan ano pa nga topiko ang inyo ginabinagbinag, ipatalupangod ang mga kinaiya ni Jehova. Buligi sia nga mahangpan nga si Jehova mahigugmaon, mainayuhon, kag maluluy-on. Nagsiling si Jesus nga “ang nahauna kag pinakaimportante nga sugo” amo ang ‘higugmaon si Jehova nga Dios.’ (Mat. 22:37, 38) Gani buligi ang imo ginatudluan sang Biblia nga higugmaon si Jehova.

13. Maghatag sing halimbawa kon paano naton mabuligan ang aton ginatudluan nga makatuon parte sa dalayawon nga mga kinaiya ni Jehova.

¹³ Isugid sa imo ginatudluan kon ngaa palangga mo si Jehova. Kon himuon mo ini, mahangpan niya nga dapat man niya palanggaon si Jehova bilang iya Abyan. (Sal. 73:28) Halimbawa, may nakita ka bala sa inyo ginatun-an ukon sa isa ka teksto nga nagasugid parte sa gugma, kaalam, katarungan, ukon gahom ni Jehova? Nagpalig-on bala ini sa imo nga mangin suod pa gid sa iya? Isugid ini sa imo ginatudluan sang Biblia nga isa ini sa mga rason kon ngaa palangga mo ang aton Amay sa langit. Pero may dapat pa gid himuon ang aton ginatudluan para mapalig-on sia nga magpabawtismo.

PALIG-UNA SIA NGA MAGTAMBONG SA MGA MITING SANG KONGREGASYON

14. Suno sa Hebreo 10:24, 25, ano ang mabulig sang mga miting sang kongregasyon sa aton ginatudluan sang Biblia?

¹⁴ Gusto naton tanan nga ang aton ginatudluan sang Biblia magpabawtismo. Makabulig kita sa ila kon palig-unon naton sila nga magtambong sa mga miting sang kongregasyon. Suno sa mga kauturan nga madamo sang nabuligan, mas madasig mag-uswag ang mga ginatudluan sang Biblia kon magtambong sila dayon sa mga miting. (Sal. 111:1) Ang pila sa ila nagapaathag sa ila mga ginatudluan nga madamo sila sang mabal-an sa mga miting nga indi nila matun-an sa ila pagtuon kada semana. Basaha ang Hebreo 10:24, 25 sa imo ginatudluan sang Biblia, kag ipaathag sa iya ang mga benepisyo kon magtambong sia sa mga miting. Ipatan-aw sa iya ang video nga Ano ang Ginahimo sa Kingdom Hall?f Buligi sia nga pabaloran ang pagtambong sa mga miting kada semana.

15. Ano ang puede naton himuon para mapalig-on ang aton ginatudluan nga pirme magtambong sa mga miting?

¹⁵ Ano ang puede mo nga himuon kon wala pa nakatambong sa miting ang imo ginatudluan sang Biblia ukon talagsa lang sia nagatambong? Iistorya dayon sa iya ang mga natun-an mo sa miting. Ipabatyag sa iya nga nalipay ka sa imo mga natun-an. Kon himuon mo ini, mapalig-on gid sia nga magtambong. Hatagi sia sang Lalantawan ukon Workbook Para sa Miting nga pagatun-an sa miting sang kongregasyon. Ipakita sa iya kon ano ang binagbinagon sa masunod nga miting, kag pamangkuta sia kon diin sa mga topiko nga pagatun-an ang gusto niya nga mabal-an. Sigurado gid nga sa una niya nga pagtambong sa miting, mas maayo ang iya makita kag mabatian kon ipaanggid sa mga pagtilipon sang iban nga relihion nga natambungan niya. (1 Cor. 14:24, 25) Makilala niya ang mga tawo nga may maayo nga mga kinaiya nga puede niya ilugon kag makabulig sa iya nga mag-uswag kag magpabawtismo.

16. Paano naton mabuligan ang aton ginatudluan sang Biblia nga mag-uswag kag magpabawtismo, kag ano ang binagbinagon naton sa masunod nga artikulo?

¹⁶ Paano naton mabuligan ang aton ginatudluan sang Biblia nga mag-uswag kag magpabawtismo? Buligan naton sia nga mahangpan nga importante gid ang pagtuon paagi sa pagpalig-on sa iya nga magtuon kada semana kag handaan ang kada pagtuon. Palig-unon man naton sia nga mamati kag mangamuyo kay Jehova kada adlaw kag mangin suod sa Iya. Kag palig-unon naton sia nga magtambong sa mga miting sang kongregasyon. (Tan-awa ang kahon nga “Ang Dapat Himuon sang Ginatudluan sang Biblia Para Mag-uswag Sia kag Magpabawtismo.”) Pero may lima pa ka butang nga puede himuon sang mga nagatudlo sang Biblia para mabuligan nila ang ila mga ginatudluan nga mag-uswag kag magpabawtismo. Binagbinagon ini sa masunod nga artikulo.