TULUN-AN NGA ARTIKULO 42
Kon Paano Buligan ang Aton mga Ginatudluan sang Biblia nga Mag-uswag kag Magpabawtismo—Ikaduha nga Artikulo
“Hatagi sang dalayon nga igtalupangod ang imo kaugalingon kag ang imo panudlo.”—1 TIM. 4:16.
AMBAHANON 77 Kapawa sa Madulom nga Kalibutan
ANG BINAGBINAGON SA SINI NGA ARTIKULOa
1. Kon ginatudluan naton ang mga tawo para mangin disipulo sila, ngaa makasiling kita nga ginabuligan man naton sila nga maluwas?
KON ginatudluan naton ang mga tawo para mangin disipulo sila, ginabuligan naton sila nga maluwas! Ngaa masiling naton ini? Suno sa Mateo 28:19, 20, si Jesus nagsugo: “Kadtui ninyo ang mga tawo . . . kag tudlui ninyo sila agod mangin disipulo ko. Bawtismuhi ninyo sila.” Ngaa importante gid nga magpabawtismo? Bangod kinahanglan ini para maluwas. Ang gusto magpabawtismo dapat magtuo nga nangin posible lang ang kaluwasan bangod napatay si Jesus para sa aton kag nabanhaw. Amo ini ang rason kon ngaa nagsiling si apostol Pedro sa iya mga kauturan: “Ang bawtismo [nagaluwas] karon sa inyo . . . paagi sa pagkabanhaw ni Jesucristo.” (1 Ped. 3:21) Gani kon magpabawtismo ang isa ka bag-o nga disipulo, may paglaum na sia nga maluwas.
2. Suno sa 2 Timoteo 4:1, 2, ano ang dapat naton himuon para matudluan naton ang iban?
2 Para matudluan naton ang iban nga mangin disipulo, dapat may ‘kalantip kita sa pagpanudlo.’ (Basaha ang 2 Timoteo 4:1, 2.) Ngaa? Bangod ginsugo kita ni Jesus: “Kadtui ninyo ang mga tawo . . . kag tudlui ninyo sila agod mangin disipulo ko.” Nagsiling si apostol Pablo nga dapat naton ini ‘himuon sing padayon, kay sa paghimo sini maluwas naton ang aton kaugalingon kag ang mga nagapamati sa aton.’ Gani naglaygay si Pablo: “Hatagi sang dalayon nga igtalupangod . . . ang [inyo] panudlo.” (1 Tim. 4:16) Bangod kinahanglan naton tudluan ang mga tawo para mangin disipulo sila, dapat maayo gid kita magtudlo.
3. Sa sini nga artikulo, ano ang binagbinagon naton parte sa pagtudlo sang Biblia sa iban?
3 Minilyon ka tawo sa bilog nga kalibutan ang ginatudluan naton sang mga kamatuoran sang Biblia. Gusto naton nga mabawtismuhan ang madamo sa ila. Ginsambit sa nagligad nga artikulo nga dapat naton mabal-an kon paano naton sila mabuligan nga magpabawtismo. Sa sini nga artikulo, binagbinagon naton ang lima pa ka butang nga dapat himuon sang nagatudlo sang Biblia para mabuligan niya ang iya ginatudluan nga mag-uswag kag magpabawtismo.
GAMITA ANG BIBLIA SA PAGTUDLO
Magpabulig sa manugbantala nga madamo na sang eksperiensia sa pagtudlo sa iban para epektibo mo nga magamit ang Biblia sa pagtudlo (Tan-awa ang parapo 4-6)f
4. Kon nagatudlo kita sang Biblia, ngaa indi dapat nga kita lang pirme ang nagahambal? (Tan-awa man ang footnote.)
4 Nanamian gid kita sa ginatudlo naton halin sa Pulong sang Dios. Gani mahimo daw indi kita mapunggan sa paghambal parte sa sini. Pero kon ang isa ka utod nagadumala sang Pagtinuon sa Ang Lalantawan, sang Pagtinuon sang Kongregasyon sa Biblia, ukon sang pagtuon sang Biblia sa puluy-an, indi dapat nga sia lang pirme ang nagahambal. Para epektibo nga magamit ang Biblia sa pagtudlo, dapat punggan niya ang iya kaugalingon kag indi niya pag-ipaathag ang tanan nga nabal-an niya parte sa isa ka teksto ukon topiko.b (Juan 16:12) Pamensara kon daw ano kadamo ang imo nabal-an sa Biblia sang nabawtismuhan ka kag kon daw ano ini kadamo subong. Posible nga ang panguna lang nga mga panudlo ang nahangpan mo sang nabawtismuhan ka. (Heb. 6:1) Nagdamo lang ang imo nabal-an pagkatapos sang madamo nga tinuig nga pagtuon, gani indi pag-ihambal ang tanan mo nga nabal-an sa imo ginatudluan sa isa lang ka pagtuon.
5. (a) Suno sa 1 Tesalonica 2:13, ano ang gusto naton nga mahangpan sang aton ginatudluan? (b) Paano naton mapalig-on ang aton ginatudluan nga ihambal ang parte sa iya mga natun-an?
5 Gusto naton nga mahangpan sang aton ginatudluan nga ang iya mga ginatun-an naghalin sa Pulong sang Dios. (Basaha ang 1 Tesalonica 2:13.) Paano naton ini himuon? Palig-una ang imo ginatudluan nga ihambal ang iya mga natun-an. Imbes nga ikaw lang pirme ang magpaathag sa iya sang mga teksto, pangabaya sia nga ipaathag sa imo ang iban nga teksto. Buligi sia nga iaplikar ang iya mga natun-an. Maggamit sang mga pamangkot nga magapalig-on sa iya nga isugid ang iya ginahunahuna kag ginabatyag parte sa teksto nga iya ginbasa. (Luc. 10:25-28) Halimbawa, pamangkuta sia: “Ano nga kinaiya ni Jehova ang matun-an mo sa sini nga teksto?” “Ano sa banta mo ang benepisyo sa imo kay nabal-an mo na subong ini nga mga kamatuoran sa Biblia?” “Ano ang masiling mo sa imo natun-an?” (Hulu. 20:5) Indi ang kadamuon sang iya nabal-an ang pinakaimportante, kundi kon bala ginapabaloran niya kag ginaaplikar ang iya mga natun-an.
6. Ngaa mas maayo nga hagaron naton sa aton ginatudluan ang mga manugbantala nga madamo na sang eksperiensia sa pagtudlo sa iban?
6 Ginahagad mo bala sa imo ginatudluan sang Biblia ang mga manugbantala nga madamo na sang eksperiensia sa pagtudlo sa iban? Puede mo sila pamangkuton kon ano ang masiling nila sa imo paagi sang pagtudlo sa iban kag kon bala epektibo mo nga ginagamit ang Biblia. Dapat mangin mapainubuson ka kon gusto mo nga mag-uswag sa imo paagi sang pagtudlo sa iban. (Ipaanggid ang Binuhatan 18:24-26.) Dayon pamangkuta ang imo ginhagad kon bala sa banta niya nahangpan sang imo ginatudluan ang iya ginatun-an. Puede mo sia pangabayon nga sia lang anay ang magdumala sang pagtuon kon indi mo mabalikan ang imo ginatudluan sing isa ka semana ukon sing mas malawig pa. Kon himuon mo ini, mangin regular ang pagtuon sang imo ginatudluan kag mabatyagan niya nga importante gid ini. Indi pagpamensara nga ikaw lang gid ang dapat magtudlo sa imo ginatudluan. Gusto mo nga mabuligan gid sia para padayon sia nga mag-uswag sa pagtuon sang kamatuoran.
IPAKITA NGA GINAPABALORAN MO ANG IMO GINATUDLO KAG NAGAPATI KA GID SA SINI
Sugiri ang imo ginatudluan sang parte sa mga eksperiensia sang mga kauturan nga makabulig sa iya nga sundon ang mga prinsipio sa Biblia (Tan-awa ang parapo 7-9)g
7. Ano ang makabulig sa aton ginatudluan para pabaloran niya ang iya mga natun-an?
7 Dapat makita sang imo ginatudluan nga ginapabaloran mo ang mga kamatuoran sa Biblia kag nagapati ka gid sa sini. (1 Tes. 1:5) Makabulig ini sa iya nga pabaloran man ang iya mga natun-an. Puede mo sia sugiran kon paano ka nabuligan sang mga prinsipio sa Biblia. Paagi sa sini, mahangpan niya nga makabulig man sa iya ang mga laygay sang Biblia.
8. Ano pa ang puede mo himuon para buligan ang imo ginatudluan sang Biblia, kag ano ang benepisyo sini sa iya?
8 Sa inyo pagtuon, sugiri ang imo ginatudluan sang mga eksperiensia sang mga kauturan nga may pareho sa iya nga mga problema kag kon ano ang nakabulig sa ila. Puede mo paupdon sa inyo pagtuon ang isa ka utod sa inyo kongregasyon nga may eksperiensia nga makabulig sa imo ginatudluan. Makakita ka man sang makapalig-on nga mga eksperiensia sa jw.org sa mga artikulo kag mga video nga “Ang Biblia Nagapabag-o sang Kabuhi.”c Makabulig ini sa imo ginatudluan nga mahangpan nga makabenepisyo gid sia kon sundon niya ang mga prinsipio sa Biblia.
9. Paano mo mapalig-on ang imo ginatudluan nga isugid sa iya pamilya kag mga abyan ang iya mga natun-an?
9 Nagatuon man bala sang Biblia ang bana ukon asawa sang imo ginatudluan? Kon wala pa, hagara sia nga mag-upod sa inyo pagtuon. Palig-una ang imo ginatudluan nga isugid sa iya pamilya kag mga abyan ang iya mga natun-an. (Juan 1:40-45) Paano mo sia mapalig-on? Puede mo sia pamangkuton: “Paano mo mapaathag sa imo pamilya ini nga kamatuoran nga ginatudlo sang Biblia?” ukon “Ano nga teksto ang gamiton mo para ipaathag ini sa imo abyan?” Kon himuon mo ini, ginahanas mo ang imo ginatudluan nga magtudlo man sa iban. Sa ulihi, makaupod na sia sa kongregasyon sa pagbantala kon kalipikado na sia nga mangin indi bawtismado nga manugbantala. Puede mo pamangkuton ang imo ginatudluan kon may kilala sia nga gusto man magtuon sang Biblia. Kontaka dayon ini nga tawo kag hambala sia nga puede mo sia buligan nga magtuon sang Biblia. Ipalantaw sa iya ang video nga Paano Ginahimo ang Pagtuon sa Biblia?d
PALIG-UNA ANG IMO GINATUDLUAN NGA MANGIN SUOD SA MGA KAUTURAN
Palig-una ang imo ginatudluan nga mangin suod sa mga kauturan sa kongregasyon (Tan-awa ang parapo 10-11)h
10. Paano naton mailog ang halimbawa ni Pablo nga ginsambit sa 1 Tesalonica 2:7, 8 kon nagatudlo kita sa iban?
10 Dapat ginaulikdan naton ang aton mga ginatudluan. Pamensaron mo nga mangin kauturan naton sila sa ulihi. (Basaha ang 1 Tesalonica 2:7, 8.) Indi mahapos para sa ila nga bayaan ang ila mga abyan sa kalibutan kag maghimo sang mga pagbag-o para maalagad si Jehova. Dapat naton sila buligan para mangin abyan nila ang mga kauturan sa kongregasyon. Ipabatyag sa imo ginatudluan nga abyan ka niya paagi sa pagbisita sa iya bisan indi iskedyul sang inyo pagtuon sang Biblia. Ang imo pagbisita sa iya, pagtawag, ukon pag-text nagapakita nga nagaulikid ka sa iya.
11. Ano ang gusto naton nga mabatyagan sang aton ginatudluan sa kongregasyon, kag ngaa?
11 May isa ka hulubaton nga nagasiling: “Kinahanglan magbuligay ang bilog nga baryo para ang isa ka bata mangin maayo nga tawo sa ulihi.” Gani makasiling man kita: “Kinahanglan magbuligay ang bilog nga kongregasyon para ang isa ka interesado mangin disipulo.” Gani dapat naton ipakilala ang aton ginatudluan sa mga kauturan sa kongregasyon nga makabulig sa iya nga mangin suod kay Jehova. Ang pag-upod niya sa katawhan sang Dios makabulig sa iya nga mangin abyan ni Jehova kag makapalig-on sa iya kon may problema sia. Gusto naton nga mabatyagan niya nga palangga sia sang kongregasyon kag ginakabig naton sia nga pamilya. Gusto naton nga handumon niya nga mangin bahin man sia sang isa ka pamilya nga nagapalanggaanay. Paagi sa sini, indi na sia mabudlayan nga untatan ang pagpakig-abyan sa mga tawo nga indi makabulig sa iya nga palanggaon si Jehova. (Hulu. 13:20) Gani bisan pa sikwayon sia sang iya mga abyan sang una, kabalo sia nga may matuod sia nga mga abyan sa organisasyon ni Jehova.—Mar. 10:29, 30; 1 Ped. 4:4.
SAMBITA PIRME ANG PARTE SA PAGDEDIKAR KAG PAGPABAWTISMO
Kon himuon sang imo ginatudluan sang Biblia ang mga dapat niya himuon, mabawtismuhan gid sia! (Tan-awa ang parapo 12-13)
12. Ngaa dapat naton sambiton sa aton ginatudluan ang parte sa pagdedikar kag pagpabawtismo?
12 Dapat mo pirme sambiton nga importante gid ang pagdedikar kay Jehova kag pagpabawtismo. Kay man, ginatudluan naton sang Biblia ang isa ka tawo para buligan sia nga mag-alagad kay Jehova kag magpabawtismo. Kon mga pila ka bulan na sia nga nagatuon sang Biblia kag nagatambong na sia sa mga miting, dapat nahangpan na niya nga ginatudluan naton sia sang Biblia kay gusto naton nga mangin isa sia ka Saksi ni Jehova.
13. Ano ang mga dapat himuon sang aton ginatudluan para mabawtismuhan sia?
13 May mga dapat himuon ang aton ginatudluan sang Biblia nga gusto magpabawtismo. Una, dapat niya kilalahon kag palanggaon si Jehova kag dapat sia magtuo sa Iya. (Juan 3:16; 17:3) Dayon, dapat mangin suod niya nga abyan si Jehova kag ang mga kauturan sa kongregasyon. (Heb. 10:24, 25; Sant. 4:8) Dapat niya hinulsulan ang iya mga sala kag untatan ang mga ginahimo niya nga malain. (Binu. 3:19) Kag bangod sa iya pagtuo, mapalig-on sia nga isugid sa iban ang iya natun-an nga kamatuoran. (2 Cor. 4:13) Dayon, magadedikar sia kay Jehova kag pamatud-an niya ini paagi sa pagpabawtismo. (1 Ped. 3:21; 4:2) Mangin malipayon gid ang tanan sa adlaw sang iya bawtismo! Kon ginahimo sang imo ginatudluan ang mga dapat niya himuon para mabawtismuhan sia, dayawa sia kag palig-una sia nga padayon nga mag-uswag.
HIBALUA PIRME KON NAGAUSWAG ANG IMO GINATUDLUAN
14. Paano mo mabal-an kon nagauswag ang imo ginatudluan sang Biblia?
14 Kon ginabuligan naton ang aton ginatudluan nga magdedikar kag magpabawtismo, dapat kita mangin mapinasensiahon. Pero dapat man naton hibaluon kon bala gusto gid niya alagdon si Jehova nga Dios. Makita mo bala nga nagatinguha gid sia nga tumanon ang mga sugo ni Jesus? Ukon basi gusto lang niya mabal-an ang mga topiko sa Biblia nga nanamian niya?
15. Ano nga mga pamangkot ang makabulig sa aton para mabal-an kon nagauswag ang aton ginatudluan sang Biblia?
15 Hibalua pirme ang pag-uswag sang imo ginatudluan sang Biblia. Halimbawa, ginasugid bala niya ang iya ginabatyag para kay Jehova? Nagapangamuyo bala sia kay Jehova? (Sal. 116:1, 2) Nanamian bala sia magbasa sang Biblia? (Sal. 119:97) Regular bala sia nga nagatambong sa mga miting? (Sal. 22:22) Naghimo na bala sia sang mga pagbag-o sa iya kabuhi? (Sal. 119:112) Ginasugid na bala niya sa iya pamilya kag mga abyan ang iya mga natun-an? (Sal. 9:1) Kag ang pinakaimportante, gusto gid bala niya mangin Saksi ni Jehova? (Sal. 40:8) Kon wala niya ini ginahimo, mataktikanhon sia nga pamangkuta kon ngaa. Dayon istoryaha sia sing prangka pero sa maayo nga paagi.e
16. Paano mo mabal-an kon dapat mo na untatan ang pagtudlo sang Biblia sa isa ka tawo?
16 Dapat mo pirme usisaon kon bala padayunon mo pa ang imo pagtudlo sang Biblia sa isa ka tawo. Pamangkuta ang imo kaugalingon: ‘Wala bala niya ginahandaan ang inyo pagtuon? Wala bala sia gana magtambong sa mga miting? May malain pa bala sia nga mga ginahimo? Miembro pa bala sia sang butig nga relihion?’ Kon huo ang imo sabat, ngaa padayunon mo pa ang pagtudlo sa iya? Kon wala niya ginapabaloran ang iya mga natun-an kag indi niya gusto magbag-o, daw pareho lang nga nagatudlo ka sa isa ka tawo nga maglangoy pero indi niya man gusto nga mabasa.
17. Suno sa 1 Timoteo 4:16, ano ang dapat himuon sang tanan nga nagatudlo sang Biblia?
17 Importante gid nga tumanon naton ang aton responsibilidad nga tudluan ang iban para mangin disipulo sila, kag gusto naton nga buligan ang aton mga ginatudluan nga mag-uswag kag magpabawtismo. Gani gamiton naton ang Biblia sa pagtudlo kag ipakita naton nga ginapabaloran naton ang aton ginatudlo kag nagapati gid kita sa sini. Palig-unon naton ang aton ginatudluan nga mangin suod sa mga kauturan sa kongregasyon. Sambiton naton pirme ang parte sa pagdedikar kag pagpabawtismo, kag hibaluon naton kon nagauswag ang aton ginatudluan. (Tan-awa ang kahon nga “Ang Dapat Himuon sang Nagatudlo sang Biblia Para Mag-uswag kag Magpabawtismo ang Iya Ginatudluan.”) Nalipay gid kita nga makabulig kita sa mga tawo para maluwas sila! Gani himuon naton ang aton bug-os nga masarangan nga buligan ang aton mga ginatudluan sang Biblia nga mag-uswag kag magpabawtismo.
AMBAHANON 79 Tudlui Sila nga Magtindog sing Malig-on
a Isa gid ka pribilehiyo nga tudluan sang Biblia ang iban kag mabuligan sila nga tun-an ang panghunahuna kag paggawi nga gusto ni Jehova. Buligan kita sini nga artikulo kon paano pa gid kita mangin epektibo sa aton pagtudlo sa iban.
b Tan-awa ang artikulo nga “Ang Dapat Likawan Kon Nagadumala sing Pagtuon sa Biblia” sa Septiembre 2016 nga Workbook Para sa Miting.
c Kadtui ang PARTE SA AMON > EKSPERIENSIA.
d Sa JW Library®, kadtui ang MEDIA > OUR MEETINGS AND MINISTRY > TOOLS FOR THE MINISTRY.
e Tan-awa ang mga artikulo nga “Ang Gugma kag ang Pagpasalamat kay Jehova ang Magapalig-on sa Imo nga Magpabawtismo” kag “Handa Ka Na Bala nga Magpabawtismo?” sa Marso 2020 nga Ang Lalantawan.
f MGA PIKTYUR: Ginhagad sang sister sa iya Bible study ang isa ka utod nga madamo na sang eksperiensia sa pagtudlo sa iban. Pagkatapos sang pagtuon, ginbuligan sia sang utod nga mahangpan nga indi dapat nga sia lang pirme ang nagahambal.
g MGA PIKTYUR: Natun-an sang ginatudluan sang Biblia kon paano sia mangin maayo nga asawa. Sang ulihi, ginsugid niya sa iya bana ang iya natun-an.
h MGA PIKTYUR: Nalipay ang ginatudluan sang Biblia kag ang iya bana sang nagkadto sila sa balay sang utod nga nakilala niya sa Kingdom Hall.