Maghanda sing Maayo sa Pagtudlo
1. Kon nagadumala kita sing pagtuon sa Biblia, ngaa dapat naton buligan ang aton estudyante nga apresyahon ang iya natun-an?
1 Kon nagadumala kita sing pagtuon sa Biblia, dapat kita maghanda sing maayo agod mapahulag ang estudyante nga alagaron si Jehova. Dapat naton sia buligan nga apresyahon ang mga kamatuoran sa Biblia nga iya natun-an. Amo ini ang magapahulag sa estudyante nga alagaron si Jehova. (Deut. 6:5; Hulu. 4:23; 1 Cor. 9:26) Paano naton mahimo ini?
2. Paano ang pangamuyo makabulig sa aton sa paghanda sa isa ka pagtuon?
2 Mangamuyo Kon Nagahanda sa Pagtuon: Sanglit si Jehova ang nagapatubo sang binhi sang kamatuoran sa tagipusuon sang estudyante, nagakaigo nga espesipiko nga ipangamuyo naton ang estudyante kag ang iya mga kinahanglanon kon nagahanda kita para sa pagtuon. (1 Cor. 3:6; Sant. 1:5) Ina nga pangamuyo makabulig man sa aton nga mahibaluan kon paano pa gid naton sia mabuligan nga mapuno ang iya tagipusuon “sing sibu nga ihibalo” sang kabubut-on ni Jehova.—Col. 1:9, 10.
3. Paano kita maghanda nga ginahunahuna ang aton estudyante?
3 Hunahunaa ang Estudyante: Nahibaluan ni Jesus nga agod mangin epektibo kita sa pagtudlo, dapat naton hunahunaon ang aton tagpalamati. Duha ka tawo ang namangkot kay Jesus sang pareho nga pamangkot sa magkatuhay nga okasyon: “Ano ang dapat ko himuon agod mapanubli ang kabuhi nga walay katapusan?” Apang, lainlain ang pamaagi ni Jesus sa pagsabat sa amo nga pamangkot. (Luc. 10:25-28; 18:18-20) Gani, dapat naton hunahunaon ang aton estudyante samtang nagahanda kita. Ano bala nga mga teksto sa publikasyon ang aton basahon sa iya? Daw ano bala kadamo nga materyal ang aton tun-an upod sa iya? Ano bala nga mga punto ang mahimo mabudlay hangpon ukon batunon sang estudyante? Kon mahunahuna naton sing abanse ang pila ka pamangkot nga mahimo ipautwas sang estudyante, mas handa kita sa pagsabat sini sing maayo.
4. Ano ang nalakip sa maayo nga paghanda?
4 Repasuha ang Materyal: Bisan pa pila ka beses na naton nga natun-an ang materyal, una nga tion pa lang ini nga matun-an naton upod sa estudyante. Kon luyag naton lab-uton ang iya tagipusuon, importante gid maghanda kita sing maayo sa kada pagtuon. Kon ginahimo naton ini, mapalig-on man naton ang aton estudyante nga maghanda. Repasuha ang materyal, lakip ang mga teksto nga nasambit kag markahi ang panguna nga mga punto.—Roma 2:21, 22.
5. Paano naton mailog si Jehova?
5 Interesado gid si Jehova sa pag-uswag sang kada estudyante sa Biblia. (2 Ped. 3:9) Kon nagahinguyang kita sing tion sa paghanda sa kada pagtuon sa Biblia, ginailog naton ang kabalaka kag gugma ni Jehova.